Яңа мәчеттә беренче намаз

Яңа мәчеттә беренче намаз^
15 октябрь иртәсендә Татарстанның 1227 мәчетендә Корбан гаетенә багышлап вәгазьләр укылды, 120 меңнән артык кеше намазга басты.
Соңгы елларда Гает бәйрәмнәренә җитәкчеләребезнең дә килүе гадәти хәлгә әверелде. Республика Президенты Рөстәм Миңнеханов бу юлы күрмәүчеләр өчен тернәкләнү үзәге дә буларак торгызылган “Ярдәм” мәчетендә гыйбадәт кылды. Республика мөселманнарының Диния нәзарәте рәисе Камил хәзрәт Сәмигуллин Гает вәгазен һәм намазын “Кол Шәриф” мәчетендә алып барды. Биредәге чараны “Яңа гасыр” телеканалы турыдан–туры тапшырды.
Районыбыз мәчетләрендә дә бу көнне аеруча җанлылык хөкем сөрде. Арча шәһәренең көнбатыш өлешендәге һәм Урта Курсадагы яңа мәчетләрдә беренче намазлар укылды.
Арча шәһәрендә дүртенче мәчет халкыбызга игелекле хезмәтен башлап җибәрде. Шәһәребезнең тиз үсеп килүче бу өлешенә Аллаһ йорты бик кирәк иде. Зур Бирәзәләр дә аның төзелүенә бик шат, ерак түгел, тау гына менәсе. Мөндеш, хәтта Буадан килүчеләрне дә очраттым мин бу бәйрәм иртәсендә.
— Мәчетне төзүгә минем дә өлеш керде!— ди хезмәт ветераны Мансур Туктаров, горурлык белән. — Бүгенге бәйрәм шуңа күрә икеләтә шатлыклы.
Әйе, бик күпләр манарасы күккә ашкан мәһабәт бинага карап шулай дип әйтә ала. Гает намазына да әнә бабайлар, аталар, уллар бергәләп килгән. Һәркайсы шат, йөзләр нурлы, бер–берең белән иртә таңнан җылы итеп күрешү, хәл–әхвәл сорашу ничек күңелле!
Килүчеләрнең күбесе Аллаһ ризалыгы өчен мәчет намазы укыды. Менә иртәнге намазга чакырып азан яңгырады. Рәмис хәзрәткә оеп беренче иртәнге намазны укыдылар, бәйрәм уңаеннан тәкъбир әйттеләр. Рәмис хәзрәт күңелләргә сеңдереп вәгазь укыды. Шундый әзерлекле үз яшьләребез булу аеруча куанычлы. Рәмис хәзрәт Иске Кырлай авылында туган, Россия ислам университетын тәмамлаган.
Гает намазы укылгач, имам бәйрәм белән котлады. Аннан соң Корбан гаете хөтбәсе укылды.
Соңыннан муниципаль район башлыгы Алмас Назиров, бәйрәм белән котлап, мәчетне төзүдә матди ярдәм иткән, күңеленнән теләп торган һәркемгә рәхмәт әйтте, яңа мәчет халыкка игелекле хезмәт итәр, дигән ышаныч белдерде.
Ильяс ФӘТТАХОВ