Яшьләр районның киләчәгенә битараф түгел
Республика көне алдыннан районыбызга “Мин.Син.Татарстан” яшьләр автобусы килде
Махсус автобус Арча стадионында туктады. Марафонны оештыручылар белән районның эшче яшьләре очрашты.
Алар арасында мәгариф, мәдәният хезмәткәрләре бар иде. Башта оештыручылар федераль һәм республика дәрәҗәсендә гамәлгә ашырылучы дәүләт программалары турында сөйләде. “Сезнең һәрберегез Татарстан Республикасы Яшьләр парламентының яңа составына керергә мөмкин”, – дип билгеләп үтте алар.
Шулай ук “Мин.Син.Татарстан” очрашуы кысаларында арчалар республикабыз турында кызыклы сорауларга җавап бирде, интеллектуаль ярышларда, команда уеннарында катнашты, районның киләчәге турында үз фикерләрен белдерде. Чара башында барлык катнашучылар анкеталар тутырды, алар нигезендә районның яшь кадрларының гомуми картинасы төзеләчәк. Уеннар барышында оештыручылардагы күтәренке кәеф катнашучыларга да күчте, алар, кызыксынып, һәр бәйгедә катнашты.
Алда арчаларны командаара ярышлар көтә иде. Икенче бәйгедә алар тизлеккә Татарстан турында сорауларга җавап бирде. Сораулар авыр булмаса да, кызыклы иде. Аларга җавап бирү өчен белемнәрне генә түгел, тапкырлык һәм зирәклекне дә эшкә җигәргә туры килде. Мәсәлән, боларның кайсылары безнең күршеләр: Ульяновск өлкәсе, Марий Эл Республикасы, Иркутск өлкәсе? Ульяновск өлкәсе һәм Марий Эл Республикасы Татарстан Республикасы белән чиктәш, шуңа күрә Иркутск өлкәсе артык. Татарстан флагы төсләре, тарих, истәлекле урыннар, милли ризыклар – сорауларның тематикасы төрле һәм кызыклы иде.
Өченче өлештә катнашучылар район үсеше картасын тутырдылар. Өч минут эчендә аларга районда нәрсәне яхшыртырга теләүләрен күрсәтергә кирәк иде. Ахырда һәр команда үз тәкъдимнәре белән чыгыш ясады. Заманча балалар мәйданчыклары, мәктәпләрне ныклап төзекләндерү, шәһәр халкы өчен туристик проект, милли аяк киеме җитештерүне торгызу, махсус хәрби операция геройларына багышланган аллея, ат спорты белән шөгыльләнү өчен ипподром, медицина хезмәте күрсәтүнең сыйфатын яхшырту, яшьләрнең ялын оештыру – тәкъдимнәр һәм идеяләр төрле иде. Аларның кайберләре оештыручыларда да кызыксыну уятты. Алар буенча катнашучыларны проектлар эшләргә һәм республикада гамәлгә ашырыла торган грант бәйгеләрендә канашырга чакырды.
Ахырда марафонда катнашучыларның һәркайсына истәлекле бүләкләр тапшырдылар.
Исегезгә төшерәбез, яшьләр автобусы “Мин. Син. Татарстан” республика районнарында 15 августтан 5 сентябрьгә кадәр эшләде. Ул республиканың 20 районында булып чыкты. Очрашуларның максаты – яшьләрнең гражданлык активлыгын арттыру һәм 2024 елда узачак сайлаулар турында мәгълүмат бирү.
Резеда Хәкимҗанова