Ватанны саклау — изге бурыч

Ватанны саклау — изге бурыч
18 октябрьдә район Мәдәният йорты тиздән армия сафларына китәчәк һәм урта гомуми белем мәктәпләренең югары сыйныфларында укучы егетләрне “Хәрби хезмәткә чакырылучылар көне”нә җыйды.
1 октябрьдән хәрби хезмәткә көзге чакырылыш башланды. Агымдагы елның 31 декабренә кадәр дәвам итәчәк чакырылышта Арча һәм Әтнә районнарыннан 88 егет хәрби кием киячәк. Ә бүгенге көндә Россиянең 22 хәрби частенда 191 егетебез, хәрби бурычларын үтәп, тынычлыгыбызны саклый. Үз илеңә хезмәт итү, Ватан алдындагы бурычыңны үтәү ул — горурлык. Әти–әни канаты астында үскән егетләр армиядән тормышның, туганнарның, туган җирнең кадерен белергә өйрәнеп кайта.
Хәрби комиссар Алмаз Борһанов, һәр часть белән элемтәдә булып, егетләрнең хәлләрен белешүе, комиссариатның хезмәт итүче егетләргә карата җаваплы булуы турында сөйләде. Районыбызга частьлардан әзерлекле егетләр җибәргәннәре өчен рәхмәт сүзләре еш килә. Егетләр армиягә мылтык тотарга, атарга өйрәнеп, физик тәрбия буенча махсус дәресләрдә әзерлек белән китә. Солдатның якыннарына карата да район хәрби комиссариаты җитәкчелегенең мөнәсәбәте уңай, еш кына частьлар белән әти–әниләр арасында телекүпер оештырыла, бер–берләрен күреп аралашу бәхетенә ирешәләр.
Бүгенге очрашуда егетләргә ТР хәрби комиссариатының Арча һәм Әтнә районнары буенча бүлек җитәкчесе Алмаз Борһанов, “Сугышчан туганлык” хәрби оешмасы җитәк-чесе Сергей Баһаветдинов, Арча ветераннар советы рәисе, отставкадагы офицер Альберт Җамалиев үзләренең изге теләк-ләрен юллап, үгет–нәсыйхәтләрен бирүдән тыш, Бөек Ватан сугышы ветераннары Халисә Гафурова һәм Хак Шәфигуллин дәһшәтле елларда күргән авырлыкларын сөйләп, тыныч, имин елларда хезмәт итеп, туган якларына исән–сау әйләнеп кайтуларын теләделәр. Арча егете Азат Низаметдинов белән Сарай–Чокырчадан Алмаз Исламгалиев тантаналы шартларда Бөек Ватан сугышы ветераны Хак Шәфигуллин кулыннан армиягә чакыру кәгазе алдылар. Соңыннан Рәмис хәзрәт Гарифуллин егетләргә хәерле сәфәрләрендә изге теләкләр теләп, дога укыды.
Туган җирдән еракларга киткәч, анда узган һәр мизгел кадерле була. Бүгенге очрашу турында уйланганда Расих Галимҗанов, Дамир Гасыймов, Зәлия Шәйхетдинова, Зилә Зиннәтова тарафыннан башкарылган моңлы җырлар да исләренә төшеп, сагыну хисе күңелләрен меңгә телгәләп алыр...
Розалия ЗИННӘТОВА