Сәламәтлек — зур байлык

Сәламәтлек — зур байлык
Өчиле авылында быел ямь өстәп яңа медпункт бинасы калкып чыкты. Элеккесе бик тузган, искергән иде инде. Бәхеткә, фельдшер–акушерлык пунктлары төзү, төзекләндерү буенча республика программасы эшли башлады.
Узган ел безнең районда Мөндеш, Апаз авылларында “Азнакай Нефтемаш” заводы” акционерлык җәмгыяте беренче пунктларны төзеп куйды. Бина заводның үзендә әзерләнә, аны урыннарга алып барып җыясы гына кала.
— Өчиле авылы гына түгел, Чиканас, Иске Йорт халкы да бик шат, — ди Яңа Кырлай авыл җирлеге башлыгы урынбасары Радик Шәяхмәтов. — Урыны да бик уңышлы, мәктәп тә янәшәдә генә.
Фельдшер–акушерлык пункты мөдире Светлана Зыятдинова эш шартларыннан канәгать. Якты, иркен бинада кешеләрне кабул итү, ярдәм күрсәтү, дәвалау өчен бөтен мөмкинлекләр бар. “Мөндешләр белән сөйләштем, кыш көне дә бик җылы булды, диделәр”, — ди ул.
Дөрес, мөдир штатта берүзе. Әле бит шактый ара үтеп Чиканас белән Иске Йортка да барасы, аның карамагында 700гә якын кеше. Хезмәт хаклары да бик тыйнак — айга 13 мең сум.
Республиканың җирле берәмлекләр Советы рәисе Минсәгыйрь Шакиров, Сарай–Чокырча авылында булганда, ике авылга хезмәт күрсәтүче фельдшерның айга нибары 6 мең сум алуына бик гаҗәпләнгән, бу мәсьәләне Казанга кайткач күтәрәчәге турында әйткән иде. Бактың исә, монда тәүлек буе кеше сәламәтлеге турында кайгыртучы белгечне ярты штатка калдырганнар.
Киләчәктә бар да әйбәт булыр, дип ышаныйк. Республика җитәкчелегенең авыллардагы медпунктларны яңарту программасы кешеләр сәламәтлеге турында кайгыртуда мөһим адым. Быел Түбән Оры авылында да яңа медпункт эшли башлады. Урта Аты, Утар Аты, Шура, Иске Чүриле, Яңа Чүриле авылларындагыларын төзекләндерү тәмамланды. Пөшәңгәр, Шурабаш, Иске Ашыт, Сөрде, Югары Оры авылларындагыларын төзекләндерү төгәлләнеп килә. Боларын “Арча МСОсы” ширкәте башкара.
Өчиле мәктәбе директоры Әмир Нуретдинов янәшәдә яңа медпункт сафка керүгә бер шатланса, ул мәктәптә быел җылы бәдрәф төзелүгә сөенеп бетә алмый. Монысы да сәламәтлекне саклауга бәйләнгән. “Водоканал–Сервис” ширкәте җитәкчесе Тәлгать Миндубаев та эш барышын карарга килгән иде. Бәдрәф дигәч тә, аның да эше җитәрлек, канализация сузасы бар, сыйфатка да зыян килергә тиеш түгел.
Быел Иске Ашыт, Наласа, Сеҗе мәктәпләрендә җылытылган бәдрәфләр урнаштырылды.
Ильяс ФӘТТАХОВ