Илебездә 9 декабрьдә Ватан Геройлары көне билгеләп үтелде.
Ватан Геройлары көнен гомуми белем бирү оешмаларында батырлык дәресләре үткәрү, ветераннар һәм геройлар белән очрашу, һәйкәлләргә чәчәкләр салу белән билгеләп үтү кабул ителгән. Арча районында да бу көнне батырлар истәлегенә Җиңү паркында чәчәкләр салынды. Чарада Арча муниципаль районы башлыгы Илшат Нуриев, Арча һәм Әтнә районнары буенча хәрби комиссар Азат Вахитов, район мәдәният идарәсе җитәкчесе Илфар Әюпов, Надир хәзрәт, “Сугышчан туганлык” оешмасы әгъзалары катнашты.
Россия Федерациясендә беренче мәртәбә Ватан Геройлары көне 2007 елның 9 декабрендә билгеләп үтелә, әмма бу бәйрәмнең күп гасырлык традицияләре һәм тирән тарихи тамырлары бар.
Бу көнне үзләрен Ватанга хезмәт итүгә багышлаган һәм югары дәүләт бүләкләре алган кешеләрне хөрмәтлиләр.
Россия Герое исеме бирелүчеләрнең гомуми саны (2024 елның 31 гыйнварына) 1417 кеше тәшкил итә, шуларның 603е үлгәннән соң бирелгән.
Гөлнур Минһаҗева