Йогышлы чирләргә бирешмә

Йогышлы чирләргә бирешмә
Әңгәмәдәшебез — район хастаханәсенең балалар консультациясе мөдире Алсу Кузнецова.
— Алсу ханым, кышка таба барсак та көннәр җылы, юеш, инфекция-ләрнең үрчүенә бик уңайлы мохит. Салкын тиеп авырулар буенча районда хәл ничек тора?
— Әлегә грипп юк. Ә менә салкын тиеп авырулар ел әйләнәсендә күзәтелә. Чыннан да, бүген көн-нәрнең жылы, дымлы булуы йогышлы инфекция-ләрнең күпләп үрчүенә китерә. Авырый башлауга антибиотикка ябышмаска кирәк. Иң башта салкын тиеп авыруның төрен ачыкларга киңәш ителә, ягъни авыру вируслы инфекция белән чирлиме, әллә бактерияле беләнме. Ә диагнозны бары тик табиб кына билгели. Әгәр дә бала (олылар да) вирус белән зарарлана икән, басым ясап әйтәм, вирусны антибиотик бетерми, аның симптомнарын чамалауга (төчкерү, күзләр кызару, яшь агу һ.б.) кичекмәстән вируска каршы көрәшүче препаратлар кулланырга киңәш ителә, кабатлап әйтәм, һичшиксез, табибка барырга кирәк.
— Баланың башы азрак кайнар булса, котыбыз алына, температураны төшерә торган сироп эчертергә ашыгабыз...
— Ашыкмаска кирәк. Температура 37,5тән артып китсә генә аны төшерә торган препарат куллану зарури. Организм гадәттә, тән температурасын күтәреп, вируска, бактериягә каршы көрәшә.
— Бала авырып китсә, аптекадан сатып алынган витаминнар эчертергә тырышабыз.
— Витаминнарны бары тик табиб киңәше белән генә эчертергә кирәк. Салкын тиеп авырганда витаминнар зыян гына китерергә, ягъни вирус- ларны тукландырырга мөмкин.
— Халык медицинасы буенча киңәшләрегез.
— Гөлҗимеш, мүк җиләге, сырганакны элек–электән кулланганнар һәм файдасын күргәннәр. Бүген дә бу җимешләрдән файдаланырга киңәш итәм. Гөлҗимешне кичтән термоска салып куйсаң, икенче көнне эчәргә витаминлы эчемлек әзер була. Мүк җиләген, сырганакны сытып, җылымса су белән морс ясасаң файдалы. Суган, сарымсакның файдасы турында һәркайсыбыз белә, аларны өстәлгә, карават янына турап куйсаң да ярый. Аяк киеме коры булсын, һава торышына карап баланы киендерергә кирәк. Көчкә кыймылдап йөрерлек булмасын, авызын шарф белән томаламаска. Бүлмә-ләрне һәрдаим җилләтергә.
— Гриппның кеше организмы өчен куркыныч икәнен белеп торабыз, әмма вакцина ясатырга омтылмыйбыз.
— Быел районга балаларга “Гриппол +” дигән әйбәт вакцина кайтты. Иң башта үземә ясатып карадым. Кайткан вакцинаны бакча, мәктәп балаларына ата–аналар ризалыгы белән тулысынча ясап бетердек. Гриппка каршы вакцинага халыкта тискәре караш яши. Матбугат, телевидение аша да күбрәк начар нәтиҗәләр турында гына сөйлиләр. Ә нишләп аның яхшы ягын да күрсәтмәскә. Грипп вирусы белән катлауланып киткән үпкә ялкынсынуыннан үлем белән тәмамланган очраклар җитди уйландырсын иде. Грипптан вакцина ясатсаң, грипп белән авырган очракта да авыру хәле катлауланмаячак. Вакцина дөнья цивилизациясе уйлап тапкан казаныш.
— Иммунитеты нык кешенең чирләргә биреш-мәвен беләбез. Ә ничек нык булырга?
— Хәрәкәт, саф һава, дөрес туклану. Бездә бала һава күрми. Бакчага машина белән бара–кайта. Зурраклар компьютер каршында. Бакчага йөри торган балага гади, арзанлы сандал, киҗе мамык колготкилар кидерергә кирәк. Кибет ризыгына салынмаска. Йорт шартларында эшләнгән эремчек, үзебезнең җирлектә үскән җиләк–җимеш, яшелчә-ләр, өйдә пешкән ботка, ашлар белән тукланырга — бернинди дә йогуртлар, чит ил жиләк–жимеше кирәкми.
— Киңәшләрегез өчен рәхмәт.
Румия НАДРШИНА