Төньяк балкышы

Төньяк балкышы
Ашытбаш авылы мәктәбендә шахмат уены буенча “Төньяк балкышы” кубогына чираттагы ярышлар булып узды.
Кече яшьтән шахмат уйнаган кеше тормышында да чираттагы йөрешне ясар алдыннан бар булган вариантларны исәпләп, анализлап карарга, күп нәрсәне алдан чамаларга өйрәнә.
“Төньяк балкышы” кубогына уеннар 2000 елда Ашытбаш мәктәбендә башлана. Идея авторлары — элеккеге хәрби офицер, педагог, җәмәгать эшлеклесе һәм тренер Сөләйман Галиуллин, Ашытбаш урта мәктәбе укытучысы, тренер Наил Сабирҗанов. Алар шушы эшкә күңел салып, оештырып йөрүчеләр. Ел саен колачын киңрәк җәя барган уеннар бераздан Шушмабашта үткәрелә башлый. Моңа укучылар гына түгел, зурлар да тартыла. Шушмабаш, Ашытбаш, Арча педагогика көллияте, Урта Курса, Яңа Кишет, Апаз, Шекә командалары аеруча актив катнаша. Көчле шахматчылар аерылып чыга. Болар — Шекәдән бертуган Алмаз, Гөлназ һәм Фазыл Вильдановлар, Апаздан Илмир һәм Инсаф Нигъмәтҗановлар, Гөлчәчәк Шәфигуллина, Урта Курсадан Рамилә Шаһниева, Ашытбаштан Нәркизә Кавиева, Шушмабаштан Камил Кәримов. Саный башласаң, күп алар. Һәм бу, әлбәттә, сөенечле фал!
Бәхеткә, бу якларда һәр төрле спортның яшь буынны тәрбияләүдә булган әһәмиятен аңлый торган җитәкчеләр эшли. Мәктәп җитәкчеләре шушындый ярышларны уздырырга мөмкинлек тудырса, хуҗалык җитәкчеләре (Газинур Сафин, Рөстәм Хәйруллин) иганәче буларак ярдәм итә. Турнир тәмамлангач җиңүчеләргә дә, катнашучыларга да истәлекле бүләкләр тапшырыла.
Быелгы ярышлар 16 яшькә кадәр булган укучылар арасында уздырылды. Ашытбашның үзеннән тыш, Шушмабаш, Шекә, Наратлык, Кысна, Мәмсә, Ташкичү авылларыннан командалар килгән иде. Шахматчылар арасында егетләр күп булса да, бик сәләтле кызлар да бар. Мәсәлән, Ашытбаштан Нәркизә Кавиева шундыйлардан. “Сәләт” лагере җиңүчеләре арасында уздырылган Татарстан турнирында да җиңү яулаган. Күп тапкырлар район чемпионы исеменә һәм “Төньяк балкышы” кубогына лаек булган. “Кечкенә вакытта ук зурларны ота иде инде ул”, — ди тренеры Сөләйман Галиуллин. Быел да ул кызлар арасында 1 урынны алды. Егетләр арасында иң көчлеләрдән булып Шушмабашның көрәшче егете Камил Кәримов танылды. Аларга “Төньяк балкышы” кубогы тапшырылды.
Егетләр арасында иң яхшы нәтиҗә күрсәтүчеләр — Ташкичүдән Рәмис Галәветдинов, Ашытбаштан Дамир Солтанов, бертуган Гатауллиннар, Шекәдән Фазыл Вильданов булды. Кызлар арасында Шекәдән Зөлфия Сабитова, Кыснадан Гөлназ Сафина үзләрен иң оста уенчылар буларак күрсәтте. Шекә кызы Зөлфиянең игезәк туганы Әлфия дә көчле шахматчы икән. Кызганыч, бүгенге турнирга ул килә алмаган.
Командаларга килгәндә, быелгы уен түгәрәк системасы буенча барды. Һәр команда үзара көч сынашты. 1 урынны Ашытбаш җыелма командасы алды. Кубокка да алар ия булды. II урынны Шушмабаш командасы яулады. Мондый ярышларда беренче тапкыр гына катнашуына карамастан, Ташкичү мәктәбе командасы да уңай нәтиҗәләргә иреште.
Зөлфия ГАНИУЛЛИНА.
Ашытбаш