Яшь гвардиячеләр яшьләргә үрнәк

Яшь гвардиячеләр яшьләргә үрнәк
Тернәкләндерү үзәгенә илтүче юл буендагы коймаларда төрле әкият персонажлары, стеналары шулай ук төрле рәсемнәр белән бизәлгән күп фатирлы йортларны күргәнегез бармы? Арагызда “Кем ясады икән боларны?” дип гаҗәпләнүчеләр дә бардыр. Әлеге гүзәллекне тудыручылар һәм эскизларны ясаучылар районыбызның сәләтле мәктәп укучылары — “Яшь гвардия” штабы әгъзалары.
Заманында яшь буынны тәрбияләүнең үз системасы бар иде. Мәктәп укучылары башта октябрят, пионер, аннан комсомол сафларына кабул ителеп, аның кануннары белән яшиләр, җәмәгать эшләрендә катнашып, киләчәк тормышка әзерләнәләр иде. Советлар Союзы таркалгач ул сафлар да әкренләп юкка чыкты. Ләкин яшьләрне тәрбияләүдә яңа юнәлешләр барлыкка килде. Безнең районда андыйлардан “Яшь гвардия”не мисалга китерергә була.
Яшь гвардиячеләрнең төп җыелу урыны — Арча Укучылар сарае. Дистә еллап эшләүче (башта ул җәмгыять була) штабны бүген Лия Ильина җитәкли. Яшь гвардиячеләрне һәркайда күрергә мөмкин: өмәләрдә, төрле массакүләм чараларда, илкүләм истәлекле даталарга багышланган митингларда, тантаналы кичәләрдә дә аларның чыгышы аерылып тора.
— Андый чараларда катнашучы укучылар аеруча актив, сәләтле, — ди Лия Юрьевна. — Гадәттә, безгә инде холык–фигыль, акыл ягыннан формалашкан укучылар килә. Алар талантлы да, мөстәкыйль дә, дөньяга үз карашлары һәм күңелләрендә хыялларын, идеяләрен тормышка ашыру нияте бар. Алар заманча бии дә, гитарада да уйный белә.
Район җирлегендәге мәктәпләрдә белем алучы 14 яше тулган һәм аннан өлкәнрәк балаларның һәммәсе дә яшь гвардияче. Шуңа аларны авылларда да күрергә мөмкин. Өлкән, ярдәмгә мохтаҗ әби–бабайларга булышучы мәктәп укучылары шул яшь гвардиячеләр инде. Авыллардагы укучылар дигәннән, һәр авыл мәктәбендә (әлбәттә, Арча мәктәпләрендә дә) штабның беренчел җитәкчеләре бар. Алар айга бер тапкыр Укучылар сараена җыелып фикер алыша. Лия Ильина да региональ штабтан яңалыклар белеп кайтса, шунда ук мәктәпләрдәге штабларга тарата.
Штабта, нигездә, региональ проектлар белән эшләсәләр дә, үз проектлары да бар. “Ләкин проектларны тормышка ашыру өчен финанс ягы катлаулырак. Әйтик, бүгенге көндә балаларга чыгышлар ясау өчен җылы куртка, чалбар, шарфлар кирәк”, — ди җитәкче. Аларның эшчәнлегенә битараф калучылар юк, әлбәттә, төрле чаралар үткәргәндә иганәчеләрнең, район хакимиятенең ярдәмен еш тоялар. Мәсәлән, Борһанов урамында һәр елны үткәрелә торган бәйрәм өчен 100 мең сум күләмендә грант отканнар. Әлеге чараны үткәрү өчен ТР Яшьләр эшләре, спорт һәм туризм министрлыгы да акчалата ярдәм итә. Экология елы кысаларында узган бәйгегә ТР Экология министрлыгы ярдәм күрсәтсә, “Үз шәмеңне кабыз!” бәйгесе ел да район хакимияте ярдәменнән башка узмый. Әлбәттә, “Яшь гвардия” штабы “Бердәм Россия” партиясенең Арча җирле бүлекчәсе каршында эшләгәнлектән һәр чарага бергәләп, киңәшләшеп әзерләнәләр.
Ай саен мәктәпләрдәге актив укучылар җыелышып бер–берсе алдында хисап тота һәм үзләре ишеткән, күргәнне яшьтәшләренә дә тарата.
Укучылар сарае базасында “XXI гасыр яшьләре” клубына йөрүче балалар лидерлык сыйфатларын гына үзләштереп калмый, оештыру, проектлар эшләү серенә дә төшенә һәм төрле чаралар үткәргәндә практика да ала. Тырыш хезмәтләре өчен клубның биш кызы Казанда узучы профилактик волонтерлар форумына сайланган.
“Яшь гвардия”челәрнең хезмәт җимешләрен әле киләчәктә дә күрергә насыйп булыр. Чөнки ел ахырына кадәр уздырылачак чараларга бүгеннән үк ныклы әзерлек бара. Ә укучылар үзләре оештыручы да, кирәксә чыршы бәйрәмендә Кыш бабай, Кар кызы да була алалар...
Розалия ЗИННӘТОВА