Тәмәке тартмавың хәерле

Тәмәке тартмавың хәерле
Күптән түгел халык сәламәтлеген тәмәке тарту зыяныннан саклау буенча Федераль закон кабул ителде. Шул уңайдан район прокуроры урынбасары Радик Хәбибуллин белән әңгәмә оештырдык.
— Радик Мөдәрисович, яңа закон белән газета укучыларыбызны таныштырсагыз иде.
— “Халык сәламәтлеген тәмәке тарту һәм тәмәке төтене зыяныннан саклау турында” Федераль закон кабул ителүе уңаеннан “Административ хокук бозулар турындагы Россия Федерациясе Кодексына һәм “Реклама турында”гы Федераль законга үзгәрешләр кертү турында”гы 274нче (2013 елның 21 октябре) Федераль закон тарафыннан тәмәке тартуга каршы көрәшүче законнарны бозган өчен җәзалар билгеләнде. Балигъ яшенә җитмәгән балаларга тәмәке тарту тыела, телевизор экраннарыннан тәмәке тарту күренешләрен күрсәтү һәм тәмәке сату чикләнә.
— 18 яшенә җитмәгән балаларның тәмәке тартуы ачыкланса, ата–аналар административ җаваплылыкка тартылачак, шулаймы?
— Әйе. Әгәр дә олыларның балаларның тәмәке тартуында катнашы бар икән, ул вакытта алар 1–2 мең сумга штрафка тартыла. Ә инде балаларның тәмәке тартуында әти–әниләрнең дә йогынтысы булса, җәза катырак, аларга штраф 2–3 мең сум.
— Нинди урыннарда тәмәке тартырга ярамый?
— Эш урыннарында, шәһәр, шәһәр яны, һава транспортларында, ябык спорт корылмаларында, сәламәтлек саклау, мәгариф, мәдәният учреждениеләрендә, дәүләт җитәкчелеге органнары биналарында һ.б. Ярамаган урыннарда тәмәке тарткан өчен штраф 500 сумнан алып 1500 сумга кадәр.
— Балалар мәйданчыкларында тәмәке пыскытучыларга җәза бармы?
— Аларга җәза катырак: штраф 2–3 мең сум.
— Кемнәр җәзага тарта?
— Ярамаган урыннарда тәмәке тартучыларны полиция хезмәткәрләре, дәүләт янгын күзәтчелеге инспекторлары, санитар табиблар, транспорт, торак инспекторлары штрафка тартачак.
— Тәмәке сату кагыйдәләрен бозган өчен нинди штрафлар каралган?
— Тәмәкене рекламалау, телевизор экраннарыннан тәмәке тартканны күрсәтү, сату кагыйдәләрен бозган өчен штраф күләме билгеләнде. Аерым алганда, балигъ булмаган балаларга тәмәке саткан өчен урындагы кешеләргә 30–50, оешмаларга 100–150, гражданнарга 3–5 мең сум штраф каралган.
— “Реклама турында”гы Федераль законда нәрсәләр тыелуы хакында да әйтеп үтсәгез иде.
— Әлеге законда тәмәкене, тәмәке продукциясен, тәмәке тарту әйберләрен, аерым алганда, трубкаларны, кальяннар, сигарет кәгазьләрен, зажигалкаларны рекламалау тыела.
— Федераль закон кайчан көченә керә?
— 2013 елның 15 ноябреннән.
Румия САТТАРОВА