Киңәш, ярдәм сорап

Киңәш, ярдәм сорап
Бөтендөнья татар конгрессы башкарма комитеты рәисе, Татарстан Республикасы Дәүләт Советы депутаты Ринат Закиров 12 ноябрьдә “Бердәм Россия” партиясе Арча җирле бүлекчәсенең кабул итү бүлмәсендә гражданнарны кабул итте.
Депутатка гозер белән килүчеләр арасында олы яшьтәге кешеләрнең күп булуы гаҗәп түгел. Сугыш чоры авырлыкларын өлкәннәр белән бергә күтәргән балалар бүген әби–бабайлар инде. Әтиләре сугышта үлеп калып ятим үскәннәре гомер буе әрнеп–рәнҗеп яши. Алар сөйләгәннәрне тыныч кына тыңлап торып та булмый.
— Минем әни алты баланы берүзе үстерде, — дип сөйләде аларның берсе. — Шул ук вакытта озак еллар сыер савучы булып та эшләде. Без черек бәрәңгене дә туйганчы ашый алмадык, бала дип тормадылар, олылар белән эшкә йөрдек. Әни бернинди рәхәт күрми үлеп китте. Хөкүмәт безнең турында уйлый микән?
— Ун яшемдә, икенче сыйныфта укыганда урман кисәргә җибәрделәр, — ди Дания апа. — Аякта чабата, әни кузгалаклар җыеп аш пешереп җибәрә. Алтмыш километрны җәяү барабыз, җәяү кайтабыз. Аннан кайткач, сал агызырга җибәрделәр. Эшләдек тә эшләдек инде, ул без күргәннәр...
Ринат Зиннур улы һәрберсен игътибар белән тыңлый, һәркайсына җылы сүз әйтергә тырыша.
— Соңгы вакытта сугыш һәм тыл ветераннарына игътибар артканны күреп торасыз, — ди ул. — Әйе, ул вакытта алай булмаган. Мин әтисез үскән сугыш елы балаларына да Җиңүнең 70 еллыгы уңаеннан ниндидер ярдәм булмый калмас, дип ышанам. Монысы ил җитәкчелеге карамагында. Ә менә сезнең гаризагызны министрлыкка тапшырырмын.
Дания апа белән эш катлаулырак булып чыкты. Алар читтән күчеп кайткан. Закон буенча торак шартларын яхшырту өчен биш ел пропискада тору шарт.
Үзбәкстаннан күчеп кайт-кан гаилә башлыгы Әфган сугышында катнашкан. Аңа да шушы шартны үтәргә туры килә, аны торак шартларын яхшырту исемлегенә керткәннәр инде.
— Миңа Бөтендөнья татар конгрессы башкарма комитеты рәисе буларак чит илләрдәге милләттәш-ләребез еш мөрәҗәгать итә, — ди Ринат Закиров. — Мин аларга күчеп кайтканчы башта андагы шартларны өйрәнергә, төрле кыенлыкларга әзер торырга киңәш итәм.
Депутат Әлифба авторы Сәләй Вагыйзовның улы Камил әфәнде белән җылы әңгәмә корып алды. Билгеле булганча, Сәләй Вагыйзов Самара өлкә-сендә туган. Аның якташлары Камышлы авылында ул яшәгән нигездә музей оештырмакчылар, өйне төзекләндерү өчен ярдәм кирәк. Ринат Закиров әлеге мәсьәләне аерым очрашып өйрә-нергә вәгъдә итте.
Күкчә Бирәзәдән килүчеләр авылга юл юк, балалар җәяү йөри, дип зарлана. Шәһәрнең ВЛКСМ-ның 70 еллыгы урамында яшәүчеләр урамны төзекләндерүдә ярдәм сорый һ.б.
Ильяс ФӘТТАХОВ