Авылдашлар белән

Авылдашлар белән
Ашытбаш мәдәният йортында “Туган ягым — моңнар чишмәсе” исеме белән Рәис Шәкүров һәм аның сәхнәдәш дуслары тарафыннан “50 ел сәхнәдә” дигән кичә оештырылды.
Рәис абый Ашытбаш авылы егете. Районда аны белмәгән кеше юктыр. Бар яктан да булган ул. Зоотехник–технолог һөнәрен үзләштереп, бик күп еллар авыл фермасында мөдир булып эшләде. Тукай урманчылыгында умартачы да. Күрше–тирә авыллардан килгән яшьләрне умартачылык серләренә өйрәтә, укыта. Бакчасында нинди генә яшелчәләр үсми, ишегалдын тутырып кош–корт, мал–туар асрый. Ярминкәләр, авылда Сабантуйга мәйдан җыюлар, концертлар аннан башка узмый. Оста җырчы, нәфис сүз остасы, гармунчы да. Кыскасы, авылда олысына да, кечесенә дә кирәкле кеше.
Юбилей кичәсенә дә бик күп еллар авылдан–авылга концертлар куеп йөргән иптәшләрен, тамаша залын тутырып авыл халкын, дусларын, сыйныфташларын, туганнарын җыя алган.
Рәис абыйга җылы, матур, изге теләкләр теләнде, истәлекле бүләкләр бирелде, юбиляр көчле алкышларга, чәчәкләргә күмелде.
Җырчылар Һавария Каюмова, Гөлфия Мәгъсүмова, Фәнис Заһидуллин, автор башкаручы Илһам Вәлишин, җырчы–гармунчы Рәдис Шәкүров, Басыйр Шәяхмәтов, юмор остасы, җырчы–гармунчы Шәүкәт Вәлишин, сәхнә ветераннары Сәвия Каюмова, Вәсилә–Рәшит Шәвәлиевлар, Руминә Хисамиева, гармунчы Равил Мөгаллимов, “Гөлләрем”, “Наз” балалар бию төркеме, алып баручы Фәрхәт Зыятовның чыгышлары тамашачының күңелен яулады. Җырчыларның моңлы җырлары, гармунчыларның уйнаган дәртле көйләре йөрәкләргә үтеп, күңел кылларын тибрәтте.
Рәис абый тамашачыларга төрле сораулар әзерләгән, җавап бирүчеләргә үзе җитештергән бүләкләрне тапшырды.
— Мин ни өчен бүген бирегә шуның кадәр кеше килүнең сәбәбен беләм, — диде алып баручы Фәрхәт Зыятов. — Чөнки Рәис Шәкүров һәркемгә кирәк, ул төн уртасында сыер да бозау-лата, бөтен уй–теләге — авылдашларына яхшылык эшләү.
Өч сәгатьтән артык барган концерттан, без бары тик уңай тәэсирләр генә алып, Рәис абыйның татлы балы белән өйләргә таралыштык.
Рузалия РӘХМӘТУЛЛИНА