Нәтиҗә ясалды

Нәтиҗә ясалды
Арча район Советының социаль, икътисад, авыл хуҗалыгы, тирә–як мохитне саклау һәм законнар үтәлеше, җәмәгать тәртибен саклау, җирле үзидарә мәсьәләләре буенча даими комиссияләренең берләштерелгән чираттагы утырышы булды. Утырышны район башлыгы урынбасары Любовь Осина алып барды.
Район башкарма комитеты җитәкчесенең беренче урынбасары Рафил Исмәгыйлев үткән 10 айның социаль–икътисад күрсәткечләре турында сөйләде.
—Елны игенчелек буенча уңышлы, дип әйтеп булмый, — дип сөйләде Рафил Исмәгыйлев. — Баштагы корылык, кайбер авыл хуҗалыгы предприятиеләренең банкротлыгы белән бәйле кыенлыклар, дәүләтнең финанслата ярдәменең җитәрлек булмавы һәм башка сәбәпләр игенчелектә һәм шулай ук терлекчелектә дә продукция җитештерүнең кимүенә китерде.
Узган ел белән чагыштырганда мөгезле эре терлекләрнең баш саны 3 меңгә якын кимегән. Ә менә “Татарстан”, “Аю”, “Ак Барс–агро” ширкәтләрендә мал санының артуы күзәтелә. “Северный” ширкәте терлек саны кимүенә шулай ук юл куймаган.
—Кыенлыкларга карамастан, районда терлек-ләрнең баш санын саклап калу һәм арттыру, авыл хуҗалыгы продукциясен күбрәк җитештерү өчен мөмкинлекләр бар, — диде Рафил Исмәгыйлев. — Күп кенә фермалар ныклап төзекләндерелде, җитәрлек азык базасы булдырылды, заманча техника һәм җиһазлар, тәҗрибәле җитәкчеләребез бар. Иң мөһиме — хәзер коллективларда хезмәткәрләрне эшнең соңгы нәтиҗәсе белән кызыксындыра белү һәм, әлбәттә, лаеклы хезмәт хакы түләү. Сөт бәясе узган ел белән чагыштырганда ике тапкырга кыйммәтләнде. Бу өлкәдә эшләүчеләрнең, эш сыйфатына таләпне арттыру белән бергә, хезмәт хакларын күтәрергә мөмкинек бар, дип уйлыйм.
Башка тармакларда хәл уңайрак. Сәнәгать һәм эшләп чыгаручы предприя-тиеләрдә тулай җитештерү күләме 31 процент үсеш биргән, эшләүчеләр арткан.
Төзелеш оешмаларыннан “Арча МСОсы”, “КСМ”, “Татавтодор”ның Арча филиалы эш күрсәткечләре арту ягында.
— Узган елның шушы чоры белән чагыштырганда “Икстрой” һәм “Строймастер” ширкәтләренең хезмәт күрсәткечләре бик тыйнак, — дип ассызыклап үтте Рафил Исмәгыйлев. — Хезмәт хаклары үсеше 8 процент кына тәшкил итә. Һәм, әлбәттә, бу безне канәгатьләндерми.
Транспорт һәм элемтә предприятиеләре “Арча АТПсы”, ЗУЭС һәм РУПСның (почта) тотрыклы эшләве билгеләп үтелде.
“Жилкомбытсервис”, “Тепло–Сервис”, “Водоканал–Сервис” ширкәтләре башкарган эшләр узган елга караганда күләмлерәк. “Землемер”, “Агрохимия”, “Газ–Сервис”, “РАН–Упаковка” ширкәтләре хезмәт күрсәткечләре узган елга караганда кимрәк.
— Аз хезмәт хакы белән коллективта кешене тотып булмый, — дип искәртте Рафил Исмәгыйлев.— Без сәүдә оешмаларын аз хезмәт хакы түләгәннәре өчен даими рәвештә тәнкыйтьләп киләбез. Район күрсәткеченнән аларның уртача хезмәт хакы ике тапкырга кимрәк. Бу үзеннән– үзе хезмәт хакын “конвертлата” бирүләре хакында шик тудыра.
Бары тик лаеклы хезмәт хакы белән генә кешедә эшкә кызыксыну уятып һәм аны коллективта тотып була. Республика күләмендә уртача хезмәт хакы 25 мең сум тәшкил итә. Безнең районда — 16 мең сум.
Район бюджеты турыдан–туры оешма, предприятиеләрнең ничек эшләвенә, алар керткән салымнарга бәйле. Гомумән алганда, салым һәм салым булмаган керемнәр буенча еллык план үтәлеше начар булмаса да, салым түләүдә кыенлыклар бар. Предприятиеләрнең бирәчәге 20 млн. сумлап тәшкил итә.
Район торак–коммуналь хуҗалыгы, энергетика һәм элемтә секторы мөдире Илфат Рәхимов торак–коммуналь хезмәтләрне яхшырту, киләсе елга тарифлар турында сөйләде.
— Торак–коммуналь хезмәтләргә түләүләр турында халыкка алдан аңлатырга кирәк, — диде Любовь Осина. — Тарифларны Татарстан Дәүләт Комитеты билгеләгәнен аңласыннар иде.
— Электр, газ, су, канализация, җылылык белән тәэмин итү, калдыкларны чыгару бәяләре Татарстан Республикасы тарифлар буенча Дәүләт Комитеты карары нигезендә раслана, — дип аңлатты Илфат Рәхимов.
Район башлыгының коррупциягә каршы көрәш мәсьәләләре буенча ярдәмчесе Дамир Абдуллин 2012–2014 елларда районның коррупциягә каршы комплекслы программасы үтәлеше турында сөйләде.
Соңыннан җирле үзидарә җитәкчеләренә шәхси хуҗалыкларда өч һәм аннан да күбрәк сыер асраучыларга саву аппаратлары бирү өчен сертификатлар тапшырылды.
Румия НАДРШИНА