Уңышлар телик

Уңышлар телик
Республикада “Форпост” җәмәгать тәртибен саклау буенча яшьләр оешмалары җитәкчеләре арасында оештырылган бәйгедә Арча районы “Форпост” үзәге җитәкчесе Руслан Галәветдинов беренче урынны алды.
Күңелле яңалык. Шул уңайдан без Русланны редак-циягә кунакка чакырдык.
—Бу оешмада беренче ел гына эшлим, — дип шаккатырды Руслан. Инде тәҗрибәле лидерлар арасында беренче урынны алырга да өлгергән! Быел гына академия тәмамлаган (кызыл дипломга!) егет ничек уңышка ирешкән? Шул ук сорауны аның үзенә дә бирдем.
— “Форпост”ның тәҗри-бәле җитәкчеләре үзләренең башкарган хезмәтләре турында сөйләде, ягъни жюри алдында хисап тотты, — дип сөйләде Руслан. — Ә мин темага башкачарак якын килдем. Җәмәгать тәртибен саклау буенча яшьләр белән эшләүне яратуымны, эшне тагын да ничек нәтиҗәлерәк оештырып булуы хакында, бу темага ижади якын килеп, үземчә аңлатырга тырыштым. Бер генә күренешне әйтеп үтәм. Форпост сүзендәге хә-рефләр булып Арча педагогика көллиятенең “Форпост” оешмасыннан 7 студент сәхнәгә чыкты, командада 8 студент булганлыктан 8нче кеше өндәү билгесенә “әверелде”. Шулар янына минем сәхнәгә йөрәк булып чыгуым жюри әгъзаларының да күңелен нечкәртеп җибәрде бугай... Залдагылар да куәтләп, дәррәү кул чапты.
Ә чынбарлыкта оешманың максаты нидән гыйбарәт соң? Хәер, исеме үк әйтеп тора: яшьләр арасында җәмәгать тәртибен саклау. Аның өчен полиция бар ич, диярсез. Килешәм. Әмма бу оешмаларның вәкаләте башкачарак. Тәртип дигән нәрсә яшь кешенең башында, ягъни аңында булырга тиеш.
— Күпкырлы кызыклы эш бу, — ди Руслан. — Һәр уку учреждениесендә оешты алар.
Аңлашыла да, бу оешма әгъзалары иң элек эшне үзләреннән башларга тиеш. Иң мөһиме — дисциплина. Үзең тәртипле булмасаң, башкаларны ничек тәртипкә чакырып булсын?! Ә оешмага теләге булган һәркем керә ала. Димәк, аларның саны үсү ягында. Бу инде тәртипле яшьләр күбәя бара, дигән сүз. Һәм янәшәдәгеләргә дә аларның уңай тәэсире тими калмас, дип ышанасы килә.
Эшне нинди юнәлештә алып бара алар? Руслан да башта бу эшкә ничектер кереп китә алмый. Аннан, асылын төшенеп алгач, кызык була башлый. Эш планын төзи. Яшьләр арасында хокук бозуларны булдырмау, ирекле рәвештә җәмәгать тәртибен саклауны оештыру максатыннан төрле чаралар үткәрәләр. Спорт ярышлары, хәрби–патрио-тик юнәлештәге уеннар, “Наркотиклардан башка тормыш”, “Ришвәт алмыйм һәм бирмим дә” һ.б. темаларга багышланган чаралар уздырып, наркомания һәм җинаятьчелеккә каршы көрәш буенча дәүләт программаларында катнашалар. Әле беркөнне генә Арча социаль белем бирү академиясендә наркотикларга каршы класс сәгате үткәрделәр. Якын көннәрдә 1нче мәктәптә Бөек Ватан сугышында һәлак булганнарны искә алу кичәсен оештырачаклар.
Кыскасы, аларның максаты — яшьләр арасында нинди тискәре күренеш бар — шуларны бетерү яки булдырмый калу. Аларга уңышлар телик.
Румия НАДРШИНА