Җанга газиз туган як

Җанга газиз туган як
Гариф ага Ахунов йөрәк хисләрен шигырь юлларына да салды:
И туган як, туган як,
Җанга газиз булган як.
Ятим үстем Тукай күк,
Җылытты
тик туган як.
Олуг язучыбыз Арча халкының, район җитәкчелегенең җылы мөнәсәбәтен, кунакчыллыгын, үзен зурлавын, ихтирам итүен тоймаган булса, аның күңелендә мондый сүзләр тумаган булыр иде. Исән вакытта Гариф Ахунов Арчада хөрмәтле һәм кадерле кунак, каләм тиб-рәтүчеләргә олы остаз булды, туган ягында мәктәп укучылары, һөнәр алучы яшьләр, халык белән очрашуы аның үзен дә яңа иҗат эшенә рухландырды. Ул повесть, романнар, тәнкыйть һәм публицистик мәкаләләр язды, аның күңелендә шигырь юллары туды, йөрәктәгесен сүрәт итеп кәгазьгә төшерде, мәшһүр җәмәгать эшлеклесе булды. Аның әсәр-ләрен артистлар театр сәхнәсендә уйнады, без аларны нәфис фильм һәм спектакльләр аша экраннардан карадык.
Шөкер, олуг әдипләребез эшен яшьләр дәвам итә. Гариф Ахунов исәндер кебек. Менә бүген дә сәхнәгә елмаеп килеп чыгар да, сәләтле яшьләргә олы бүләкне үзе тапшырыр сыман. Чөнки аның рухы биредә, халкы белән.
Тантанада район башлыгы Алмас Назировның катнашуы, Казаннан халык шагыйре Роберт Миңнуллин, язучылар берлеге идарәсе рәисе Рафис Корбан, шагыйрә, Гариф Ахуновның кызы Наилә Ахунова, шагыйрь якташыбыз Наил Касыймовның кайтуы премия алучыларны cөендереп, тантананы тагын да күтәреп җибәрде. Язучылар дөньясын чын йөрәге белән аңлаган (моның шулай икәнен Казан кунаклары да әйтте) Алмас Назиров:
— Язган әсәрләр буыннан–буынга күчә, яшьләр аны, иҗат эшен тагын да камилләштереп дәвам итә, — дип сөйләде. — Безнең район язучыларга бай. Габдулла Тукай, Гомәр Бәширов, Гариф Ахунов, Мөхәммәт Мәһдиев... — яшь буынга өйрәнергә, тагын да яхшырак иҗат итәргә маякларыбыз бар.
И–и, туган тел, синең аша йөрәктәгене халыкка җиткерәбез... Башлангыч сыйныф укучысы Диләрә Булатованың Лена Шакир-җан язган “Туган тел” шигырен укуы барыбызны дулкынландырды.
Әремнәрдән әче,
Балдан татлы телем...
Туган тел, йомшак вә җор теле белән Гариф Ахунов халкын тәрбияләде. Бүген әнә, аның эшен лаеклы дәвам итүчеләргә район башлыгы Алмас Назиров карары белән әдәбият, мәдәният һәм сәнгать өлкәсендә ирешкән уңышлары өчен Гариф Ахунов исемендәге премияне тапшырдылар. Менә алар: Урта Курса авылы кызы, Курса– Почмак мәктәбе 11 сыйныф укучысы Айгөл Садриева, студент, Иске Му авылыннан Нурсөя Минзина, Арча агросәнәгать һөнәр көллияте укытучысы Лилия Вәлишина, Укучылар сараеннан “Осталар шәһәре” студиясе (җитәкчесе Наталья Хәкимова), Арча сәнгать мәктәбендә рәсем иҗаты белән шөгыльләнүче Айгөл Хуҗина, сәнгать мәктәбенең музыка бүлеге (думбра) укучысы Анастасия Орлова, сәнгать мәктәбенең “Гүзәлкәй” вокаль ансамбле (җитәкчесе Гүзәл Минхәерова).
Язучылар Гариф Ахуновның кешеләрне яратуы, якты бер шәхес, мәҗлесләр-не алып бару сәләтенә ия күңелле тамада булуы турында сөйләде.
...Дулкынланып Гариф Ахуновның кызы Наилә ханымның сәхнәгә күтәрелүен көттек. Менә ул безнең алда. Аннан бертөрле әтисенең гадилеге, яктылыгы сирпелеп тора. Йомшак күңелле икән...Арчага кайтып төшүгә, зиратта әтисе каберенә чәчәкләр куеп искә алулары да бик дулкынландырган аны. Күз яшьләре аша Арча станциясе зиратына җирләнгән әтисенең каберен карап торган Сәрвәр апага рәхмәт укыды, Гариф Ахунов исемендәге премияне булдыручыларга, аны тапшыру тантанасын оештыручыларга олы рәхмәтен җиткерде. Бәлки әле бу премия республика дәрәҗәсенә күтәрелер, дигән теләген дә әйтте.
Тантананы ЗАГС бүлегенең әйдәп баручы белгече Миләүшә Рәхимова алып барды. Сценариен Үзәк китапханәнең өлкәннәргә хезмәт күрсәтү бүлеге мөдире Әлфия Галимова язды. Яңадан–яңа иҗади эшләргә рухландырган матур бер кичә булды ул.
Румия НАДРШИНА