Күңел чишмәсе ургылып ага

Күңел чишмәсе ургылып ага
27 ноябрьдә Арча Үзәк китапханәсендә Роза Шәйхетдинованың “Күңелем чишмәсе” дип аталган шигырьләр җыентыгын тәкъдир итү кичәсе узды. Китапханәнең өлкәннәргә хезмәт күрсәтү бүлеге мөдире Әлфия Галимова оештырган әлеге иҗат кичәсенә тиң кичәдән Роза апаның дуслары, якыннары, “Яшәү яме” клубына йөрүче каләмдәшләре, Түбән Мәтәскә мәктәбе укучылары озакка җитәрлек рухи азык туплап китте.
3нче сыйныфларда укыган чагы. Күрше бакчасына алма урларга кергән малайларны карап торганнан соң Розаның күңелендә шигырь туа. Бу аның тәүге шигырен язу белән бәйле хатирә. Аннан соң күп булыр әле ул истә калырлык мизгелләр... Педучилищены тәмамлагач, Кама Тамагына укытучы булып китү, анда эшләгән елларда төрле мәдәни чараларда катнашып, шигырьләрен район газетасында даими бастыру, сөйгәне Ренат белән кавышып яңа тормыш кору, Арчага кайтып урнашулары, 3 кыз үстерүләре, яшьли ирен югалтканнан соң толлык ачысы... Болар һәммәсе күңел түреннән шигырь булып саркып чыккан. “Мин шигырьне җаныма авыр вакытларда язам”, — ди шагыйрә. Юк, бик дөреслеккә туры килми бу сүзләр. Җанга үтеп керерлек шигырьләр иҗат итү өчен авыр чаклар гына җитми, шагыйрь җанлы булып туу кирәк.
Яшүсмер елларында Роза каләмнең ниләр тудырырга сәләтле икәнлеген белеп алгач, канатланып иҗат итә башлый. Бүген тәкъдир ителгән китабында аның төрле елларда язылган иҗат җимешләре арасында әнә шул яшьлек елларындагылары да бар. Дүрт бүлектән торган китаптан бүгенге кичәдә Роза ханымның шатлыклы кичерешләрен уртаклашучы һәркем үз җанына аваздаш шигырьләрне тапкан, чыгыш ясаучы һәрберсе бу турыда әйтеп китте. Дуслары гына түгел, якташлары да күп иде аның биредә. Алар туган як сәламен генә ирештереп калмыйча, Роза апалары белән чиксез горурлану хис-ләрен дә җиткерде. Якташлары Нәзир Фәхретдинов белән Илфат Әскәров хәтта шигырьләрен көйгә дә салган, Расих Галимҗанов, Илфат Әскәров башкарган ул “карлыгачларның” тәүге шаһитлары да бүгенге тамашачы булды.
Роза Шәйхетдинова Чөмә–Елга кызы. Язучы Заһидә Го-мәрованы биргән шушы җирдә туып, урман кочагына сыенып утырган хәтфә үләнле авылының җылысын тоеп үскән кызның хыялый күңеле ничек шигырь язуга ымсынмасын?! Өстәвенә, ул Мөхәммәт Мәһдиев якташы да бит әле. Якташына карата хөрмәт, ихтирам хисләре Роза апаның шактый шигырендә урын алган.
“Күңелем чишмәсе”н бер кулга алгач, аерыласы килми, җырлап торучы шигырьләренә аның шатлык–сагышлары, тормыш рәвеше, кешелеккә, табигатькә булган мәхәббәте, туган ягын өзелеп сагынуы, аналарга карата олы ихтирам хисләре дә сыйган. Бу темаларга кагылмаган бер генә шагыйрь дә юк, әмма һәрберсе аны үзенчә тасвирлый, укучының күңел кылларына үзенчә кагыла. Роза апаның иҗаты да үзгә: сагышлы, уйланырга мәҗбүр итә торган.
Киләчәктә шагыйрә тагын берничә китабы дөнья күрер дип өметләнә. Бу китабы өчен Роза Шәйхетдинова район башлыгы Алмас Назировка олы рәхмәтен белдерә.
Якты йөзле, тәмле сүзле Роза апа гына түгел, кичәдә катнашкан һәркем бүген күңелләренә илһам, яңа дәрт, көч туплап таралышты. Бел-мәссең, әлеге чара бәлки әле кыймаган каләм әһелләренә дә дөньяга чыгарга этәргеч булыр. Ә без исә, шундый күңел бәйрәме бүләк итүче Роза Шәйхетдиновага озын гомер, сәламәтлек һәм яңа иҗат уңышлары теләп калабыз.
Розалия ЗИННӘТОВА