Мәрхәмәтле бул, бала

Мәрхәмәтле бул, бала
16 ноябрь ел да Бөтендөнья толерантлык көне буларак билгеләп үтелә. Бу көнне балалар бакчаларында, мәктәпләрдә шушы темага бәйле сөйләшүләр алып барыла. Арчаның 1нче мәктәбендә шундый рухта түгәрәк өстәл артында аралашуда район башкарма комитеты җитәкчесе урынбасары Надия Мифтахетдинова, террорчылык һәм экстремизмга каршы көрәш комиссиясе сәркатибе Дамир Абдуллин, Раил хәзрәт Гыйләҗев, Василиск атакай да катнашты.
Толерантлык латин теленнән кергән сүз, түземлек, сабырлык, төрле милләт вәкилләренең гореф–гадәтен, дини һәм физик үзенчәлекләрен, мәдәниятен ихтирам итүне аңлата. Балаларда әлеге сыйфатларны тәрбияләү бакча яшеннән үк башланып, мәктәптә дәвам итә. Мәктәпләрдә төрле милләт балаларының бергә укуының уңай ягы бар: алар үзләре аралашып үскән милләт балаларының мәдәниятен, йолаларын, әйләнә–тирәне танып белүләрен арттыра, башкаларга ихтирамлы, мәрхәмәтле булырга өйрәнә. Бу киләчәккә бер–берсенә игътибарлы булу, ярдәм итү, игелекле эшләрне күбрәк башкару сыйфатлары тәрбияли.
Чарада 1нче мәктәпнең 10 һәм 11нче сыйныф укучылары толерантлык темасында гына тукталып калмыйча, терроризм турында да фикер алышты. Соңгы елларда ешаеп киткән террорчылык күренешләре дә толерантлыкка нык бәйләнгән. Никадәр генә тырышсак та, арабызда күңелләре каралыкка омтылган адәмнәр бар икән шул...
Тарихи чыганаклардан мәгълүм булганча, бүгенге Татарстан җирендә янәшә гомер иткән халыклар гомергә бер–берсе белән килешеп, аңлашып, гореф-гадәтләрен, мәдәниятләрен, яшәү рәвешен, динен, телен хөрмәт итеп яшәгән.
Арчабызда да төрле милләт вәкилләре тату гомер итә. Бер–берсенең гореф–гадәтләре белән санлашып, хөрмәт итеп яши. Чөнки тыныч тормышның көче бер-дәмлектә, бергәлектә.
Розалия ЗИННӘТОВА