Бәхетле әтиләрне ЮХИДИ хезмәткәрләре каршы алды

Бәхетле әтиләрне ЮХИДИ хезмәткәрләре каршы алды
Бу көн Сарай–Чокырчадан Рафис Әмиров белән Сәрдәбаштан Илдар Степанов өчен икеләтә истәлекле булды. Арча бала тудыру йортына сабыйларын алырга килгән бәхетле әтиләрне ЮХИДИ идарәсенең Арча бүлекчәсе хезмәткәрләре каршы алды һәм гаиләгә машинада баланы утыртып йөрү өчен махсус җайланма бүләк итте.
Люцияне ул көнне, иреннән тыш, чәчәк бәйләмнәре, шарлар белән әтисе, уллары — 14 яшьлек Дамир белән 8 яшьлек Рәсим, туганнары каршылады.
—Үзебез ике бала үстек, икебездә дә икешәр малай иде. Менә хәзер киленебез Люция нәни Әминәне алып кайтты,—ди Рафисның сеңлесе.—Теләгебез шул—исән–имин генә үссеннәр.
Шунда түзмәде, сүзгә Рафисның әтисе, хәзер инде биш онык бабасы Хәмит Әмиров та кушылды.
—Киленебез бик әйбәт. Дус, тату яшибез, Аллага шөкер. Баланың баласы балдан татлы, диләр. Оныкларымны бик яратам. Кечкенә кызыбыз да гаиләгә бәхет өстәсен,—диде ул.
Сәрдәбаштан Илдар Степановның бәхете күзләренә үк чыккан, йөзендә шатлыклы елмаю балкый. Малай туган бит! Альмир булачак! Кызлары Алинә белән Айзилә дә ишектән күзләрен алмыйча бәби күтәргән әниләрен көтәләр.
—Ә тагын кыз бала туган булса?—дип сорыйм Илдардан.
—Миңа барыбер иде. Кызларымны да бик яратам. Исән–сау гына булсыннар.
—Нәни Альмирга игътибар зуррак булачак бит хәзер. Көнләшмәссезме?—дигән сорау-га кызлар икесе беравыздан: “Юк, без аны күптән көттек инде. Тизрәк күрәсе килә”,—дип җавап бирделәр һәм шунда ишектән чыгып килүче әниләре Гөлназның кочагына ташландылар.
Балаларны озата чыккан Арча үзәк хастаханәсенең бала тудыру бүлеге өлкән акушеркасы Ралия Шакирова әниләргә һәм, әлбәттә инде, әтиләргә матур теләкләрен җиткерде. Аннан сүзне ЮХИДИнең Арча бүлекчәсе җитәкчесе вазыйфаларын башкаручы Илдар Нотфуллин алды.
—Быел 10 айда гына районыбыз юлларында 57 юл–транспорт һәлакәте теркәлде. Шуларда 16 кеше һәлак булды, 78е төрле авырлыктагы тән җәрәхәтләре алды. Бишесе балалар катнашында иде. Бер бала һәлак булды. Беренче сәбәп—машинада балалар утыртып йөртү өчен махсус җайланма булмау. Шуны күздә тотып без бүген ике гаиләгә дә яңа туган балаларыгыз өчен махсус җайланма бүләк итәбез,—диде ул.
Бик зур һәм кирәкле бүләк. Чөнки ике гаиләдә дә машина бар. Ике әти дә аның беренче чираттагы мөһим әйбер икәнлеген аңлый.
—Балаларыбызның юлда исән–имин йөрүләре өчен кирәк ул. Ата–ана өчен алардан да кадерлерәк тагын нәрсә бар?—диделәр Рафис белән Илдар мондый зур һәм кирәкле бүләк тапшыручыларга рәхмәт-ләрен белдереп.
Моны һәр әти һәм әни аңласын, балалары тормышы һәм килә-чәге алар кулында икәнен истән чыгармасын иде.
Гөлсинә ЗӘКИЕВА