Укытучы — кеше язмышы режиссеры

Укытучы — кеше язмышы режиссеры
Укытучы! Элек–электән зур дәрәҗәгә ия булган, яшь буынга белем биргән, изгелеккә, матурлыкны күрергә, дөньяны таный белергә өйрәткән. Өстәвенә, бер генә чара да аның катнашыннан башка үтмәгән. Укытучы агитатор да, җырчы, биюче дә, артист та булган.
Г.Тукай исемендәге Арча педагогика көллиятендә үткәрелгән “Урта һөнәри белем бирү учреждениеләре ел укытучысы—2013” республика бәйгесендә укытучыларга үзләренә хас булган бөтен сыйфатларын, осталыкларын ачып бирергә туры килде.
Бәйгегә Казан, Түбән Кама, Әлмәт, Бөгелмә, Яшел Үзәннән, Саба, Кукмара, Любяннан һәм башка шәһәрләр, район үзәклә-реннән барлыгы 23 укытучы килгән иде. Алар бар да төрле юнәлештә белем би-рүче урта һөнәри уку йортларыннан һәм төрле фән укытучылары.
—Яхшы укытучы булу өчен укыткан фәнеңне генә түгел, белем биргән студентларыңны да яратырга кирәк. Бүгенге бәйге менә шундый девиз белән үтә,—диде бәйгедә катнашучыларга, җанатарларына, тамашачыларга мөрәҗәгать итеп Арча педагогика көллияте җитәкчесе Гөлнара Гарипова.—Аннан бу үзегезне күрсәтү, иҗади потенциалыгызны ачыклау, тәҗрибәгез белән уртаклашу өчен менә дигән мөмкинлек тә.
—Сәнгать һәм осталык бәйрәме дә бу. Белемегез һәм күнекмәләрегезне зур осталык белән халыкка җиткерә белү—үзе талант. Хезмәтне яратып, күңел биреп башкару—үзе сәнгать. Сезнең Арчага килеп, “Әлифба” авторлары Рәмзия Вәлитова белән Сәләй Вагыйзов 40 ел гомерләрен студентларга белем бирүгә багышлаган урта һөнәри уку йортында сынау үтү—үзе зур дәрәҗә,—диде район башкарма комитеты җитәкчесе урынбасары Надия Мифтахетдинова һәм укытучыларга уңышлар теләде.
Бәйгедә катнашучыларның осталыкларын педагогия фәннәре докторы Светлана Матвеева җитәкчелегендәге дәрәҗәле жюри бәяләде.
—Республика бәйгесендә җиңүче Бөтенроссия бәйгесендә катнашу хокукын да яулаячак,—диде ул.—Аның максаты—иҗади эшләүче укытучыларны барлау һәм аларга ярдәм итү.
Беренче булып укытучылар иҗади төстә үз–үзләрен тәкъдир итте. Алардагы фантазиягә, актерлык осталыгына сокланырлык. Шигырь дә сөйләделәр, җырладылар да, әкият дөньясы белән дә бәйләп, шундый оста итеп үзләре, хезмәтләре белән дә таныштырдылар.
—Укытучы ул—кешеләр язмышы режиссеры. Шуңа мин бер дә икеләнмичә бу һөнәрне сайладым. Минем тирәмдә—яраткан студентларым—менә дигән актерлар,—диде Түбән Кама шәһәреннән Лариса Крюкова.
Һәр укытучы чыгышында хезмәтләренә мәхәббәт, студентларына карата ярату хисе ярылып ята иде. Тик аны һәрберсе үзенчә әйтеп бирде.
Бәйге өч көн дәвамында барды. Сынауларның икенче өлеше “Дәрес—осталыкның иң югары ноктасы” дигән исем астында үтте. Монда укытучылар ачык дәрес бирде.
Ә өченче көнендә ярышларга нәтиҗә ясалды. Бәйгенең ябылу тантанасын Арча педагогика көллияте коллективы бик матур оештырган иде. Җиңүчеләрне билгеләү, үз һөнәре осталарын бәяләү күңелле вакыйга. “Урта һөнәри белем бирү учреждениеләре ел укытучысы—2013” бәйгесендә катнашучыларның барысына да сертификат тапшырылды. Яшь укытучылар арасыннан беренче урынны Казан энергетика көллиятеннән Раил Шәмсетдинов, тәҗрибәле укытучылар арасыннан Яр Чаллы педагогика көллияте укытучысы Лейла Богданова яулады. Бәйгедә беренче, икенче, өченче урыннар алучыларга 50, 40, 30 (яшь укытучыларга—45, 35, 25) мең сум акчалата бүләк тапшырылды.
Кунаклар Арчаның истәлекле урыннары белән дә танышты, педагогика көллиятендәге “Әлифба” музеенда булды, Яңа Кырлайга Габдулла Тукай музей комплексына да барды. Республиканың төрле төбәкләреннән килгән укытучылар бәйгене югары дәрәҗәдә оештырган, бу көннәрне истә калырлык итеп үткәрергә мөмкинлек биргәннәре өчен Арча педагогика көллияте коллективына рәхмәтләрен белдерде.
Гөлсинә ЗӘКИЕВА