“Җидегән чишмә” — җиңүче

“Җидегән чишмә” — җиңүче
2 декабрьдә “Җидегән чишмә” Арча халык театры яңадан Галиәсгар Камал исемендәге татар дәүләт академия театры сәхнәсендә Туфан Миңнуллинның “Әлдермештән Әлмәндәр” спектаклен күрсәтте. Бу юлы инде җиңүче буларак.
Арчалылар “Идел–йорт” халык театр коллективларының XIII төбәкара фестивалендә иң югары баскычка күтәрелде—Гран–прига лаек булды һәм 1 миллион сумлык сертификат белән бүләкләнде.
Фестиваль танылган татар драматургы, прозаик, публицист Туфан Миңнуллин истәлегенә багышланды һәм анда барлыгы 136 коллектив катнашты. Йомгаклау этабына үткән 20 коллектив арасында Татарстаннан гына түгел, Башкортстаннан, Ульяновск, Самара өлкәлә-реннән, Мәскәүдән иң көчле халык театрлары коллективлары бар иде. Аларның хезмәтләрен дәрәҗәле шәхесләрдән торган жюри әгъзалары бәяләде.
Бу көнне биредә дипломантларны һәм лауреатларны бүләкләү тантанасы булды. Аларны Татарстан Республикасы мәдәният министрының беренче урынбасары Ирада Әюпова, Татарстан Республикасы Мәдәният министрлыгының милли мәдәниятне үстерү үзәге җитәкчесе Фәнзилә Җәүһәрова, жюри рәисе, Россиянең һәм Татарстанның халык артисты Әзһәр Шакиров тәбрикләде.
—Мондый дәрәҗәле фестивальдә безнең халык театрының иң югары исемгә лаек булуы белән чиксез горурланам. Аның артында нинди зур, тырыш хезмәт ята! Әдәбиятыбыз, мәдәниятебез булганда театрыбыз киләчәктә дә үсәр, чәчәк атар,—диде үзенең чыгышында Арча муниципаль район башлыгы Алмас Назиров.
Соңыннан фестиваль традициясе буенча Гран—при иясе “Җидегән чишмә” Арча халык театры республикабызның иң мәртәбәле сәхнәләренең берсендә—Г.Камал театрында Туфан Миңнуллин әсәре буенча сәхнәләштерелгән “Әлдермештән Әлмәндәр” спектаклен күрсәтте. “Сезнең талантлы коллектив икәнлегегезне башта ук күреп алдым һәм хәзер дә шул фикердә калам. Жюри рәисе буларак мин арчалыларга ике тавыш бирдем!”—диде соңыннан Әзһәр Шакиров. Туфан аганың кызы Әлфия Миңнуллина һәр үзешчән артистка чәчәк бәйләме бүләк итте, хатыны Нәҗибә Ихсанова рәхмәтен белдерде. Туфан Миңнуллин да коллективның бу кыю адымын хуплар иде. Театр коллективы өчен бу үзе зур дәрәҗә.
“Җидегән чишмә” Арча халык театрын олы бүләге белән чын күңелдән котлыйбыз, аларга киләчәктә дә иҗат уңышлары телибез!
Гөлсинә ЗӘКИЕВА