Мәңге яшь “Ләйсән”

Мәңге яшь “Ләйсән”
Татарстанның атказанган мәдәният хезмәткәре Зилә Шәйхетдинова җитәкчелегендә Габдулла Тукай исемендәге Арча педагогика көллияте каршында эшләп килүче “Ләйсән” кызлар халык вокаль ансамбле 45 елдан артык инде җырны юлдаш итеп сәнгать юлыннан атлый.
Яше белән ярты гасырга якынлашса да, әле бүген дә ул яшьлек, гүзәллек нуры сибә. Чөнки Арча педагогика көллиятендә белем алучы иң талантлы кызларны үзенә туплаган бу коллектив буыннан –буынга алмашынып бара, көллиятне тәмамлаганнары урынына икенчеләре килә. Шуңа “Ләйсән” кызлары мәңге яшь күңелле. Әтнә районының Түбән Бәрәскә авылы мәдәният йортында үткән иҗат концертында да сәнгать дөньясын балкытучы бу йолдызлардан бөркелгән нур тамашачы күңелен мизгел эчендә биләп алды.
“Ләйсән” вокаль ансамбле халык һәм композиторларыбыз иҗат иткән җырларны эшкәртеп, тамашачы күңеленә үтеп керерлек матур, чиста, җиңел итеп, профессиональ югарылыкта 3–4, хәтта 7 тавышка, шулай ук музыкаль инстру-ментсыз (а,капелла) башкара.
—Һәр җыр артында—зур хезмәт һәм кызларның түземлеге,—ди ансамбль җитәкчесе Зилә Шәйхетдинова.—Үзең белгәннең барысын да өйрәтергә туры килә. Ансамбль шуннан тора да.
Ансамбльгә килгән кызларның күбесенең җырлау күнекмәләре дә булмый, кайберләре хәтта ноталарны да белми. Зилә Шәйхетдинова аларны җырларга гына түгел, дөрес киенергә, сәхнәдә үзләрен тотарга, бизәнергә, шулай ук ничек матур итеп тамашачы каршына чыгарга, елмаерга өйрәтә. Җырларга биюләр куярга да күп вакыт китәдер. Күп җыр бию хәрәкәтләре белән бара бит. Бәлкем, шуңа да, кызлар җырлаганда алардан күзеңне алмыйча үзең дә сизмәстән моң дөньясына кереп чумасың. Чөнки кызлар ул тойгыларны җыр сәнгатенә генә хас булган бизәлеш белән тамашачыга оста һәм үтемле итеп җиткерә ала. “Җәмилә”, “Чияле”, “Нәфисә” җырларын башкарганда ансамбль чыгышы биюләр белән тулыландырыла. Монда ярдәмгә бию коллективы килә.
“Ләйсән” кызлары аерым–аерым да җырлады. Аларның талантлы булуларын исбат-лаучы тагын бер мисал иде бу. Гөлия Гыйззәтуллина, Айсылу Гарипова, Рисәлә Әхмәтханова, Илмира Гатина белән Алия Әмирова вокал дуэты, Гүзәл Шакирова чыгышлары, аларның көчле, матур, моңлы тавышлары соклану уятты. Юкка гына “Ләйсән” вокаль ансам-бле районда гына түгел, республика, ил күләмендә үз тамашачысын булдырган, мәхәббәтен яулаган, халык ышанычын аклаган коллектив булып саналмый. Яр Чаллы, Казан, Самара, Иваново, Екатеринбург, Киров һәм башка бик күп төбәкләрдә чыгыш ясап, җиңүләр яулаган коллектив ул. Алар безнең йолдызларыбыз, киләчәгебез. Халык ансамбле исемен яулаганнар икән, димәк, алар моңа лаек. Чөнки аның киләчәге, яраткан тамашачысы, 45 ел буе бөтен күңелен, тырышлыгын, энергиясен биреп эшләгән, ансамбльнең тоткасы булган җитәкчесе Зилә Шәйхетдинова бар, педагогика көллиятен тәмамлап ансамбльдән дә китүче кызларга лаеклы алмаш бар. Концертта алар да чыгыш ясады һәм тамашачы мәхәббәтен яулады.
—Мин пенсиядәге укытучы. Арча педагогика көллиятендә белем алдым. Зилә һәм Флорес Шәйхетдиновлар шул вакытта килде. Бүген Зилә ханымның иҗат җимешен — “Ләйсән” кызлар халык ансамбле чыгышын күреп чын күңелдән сөенеп һәм горурланып утырдым. Тавыш куелышы, кызларның сәхнәдә үз–үзләрен тотышы, затлы киемнәре — бар да чын профессионалларча,—диде соңыннан Сөембикә Шаһиева–Садриева.
“Ләйсән” кызлар халык вокаль ансамбленә киләчәктә дә иҗади уңышлар, сәхнә йолдызлары буларак тагын да яктырак януларын телибез.
Гөлсинә ЗИННӘТОВА