Сезне өйдә көтәләр

Сезне өйдә көтәләр
Район Мәдәният йортында Саратов өлкәсе Шиханы бистәсендәге 71432нче хәрби частьта хезмәт итүче безнең солдатлар телекүпер аша әти–әниләре, якыннары белән очрашты. Аны Татарстан Республикасы хәрби комиссариатының Арча һәм Әтнә районнары буенча бүлек җитәкчесе, подполковник Алмаз Борһанов 5нче тапкыр оештырды.
Очрашуда чакырылыш рәисе урынбасары, район башкарма комитеты җитәкчесе урынбасары Надия Мифтахетдинова, кеше хокуклары буенча вәкил Ренат Һидиятов, Рәмис хәзрәт, Василиск атакай катнашты.
Безнең районнан 152 егет 22 частьта армия хезмәте үтә. Шуның 54е — Шиханы бис-тәсендәге 71432нче частьта.
— Егетләр армиягә китте дә, хәрби комиссариат аларны онытты, дип уйламагыз, — дип сөйләде ата–аналарга подполковник Алмаз Борһанов. — Без аларның һәркайсы белән даими кызыксынып торабыз. Һәр солдатка характеристика язып җибәрүләрен сорыйбыз. Уңай характеристикалар килеп тора.
— Бу частька шәхсән мин үзем делегация составында бардым, — дип сөйли Надия Мифтахетдинова. — Солдатларның хезмәт итү, яшәү, ял итү урыннары белән таныштым, егетләрнең үзләре белән сөйләштем: кыерсытмыйлармы, нәрсәдән канәгать һәм канәгать түгелләр. Андагы чисталык, тәртип, частьтагы команда җитәкчелегенең таләпчән һәм акыллы эш итүенә инанып, безнең балаларның ышанычлы кулларда икәнлеген күреп кайттым.
Телекүпер тоташтырылды. Элемтәгә часть командиры Владимир Попов чыкты. Экран аша залда утырган әти–әниләр, яшь хатыннар үзләренең улларын, ирләрен күрергә тырышты. Солдатлар да күзләре белән газизләрен эзләде. Дулкынландыргыч мизгелләр. Туган җирнең, әти–әниеңнең кыйммәтен ачыграк тою өчен еракка китеп кара, ди борынгылар. Ир–егетләрне бу аерылу солдат тормышы, туган җир кадерен тою, әти–әнине ярата, олылый белү сыйфатлары белән баетадыр.
Экранда — Яңа Кенәрдән игезәк егетләр Илнар белән Ленар Үтәгәновлар. Рәхәтләнеп елмаялар, билгеле, дулкынланалар да. Очрашуга әти–әнисе Фәнис белән Флүзә төпчек кызлары Илүзә (4 яшь) белән килгән. Дулкынланудан әллә ни сөйләшә алмасалар да, иң мөһиме бер–береңне күрү, тавышны ишетү.
— Икесе дә Казан дәүләт университетын тәмамлап, быел 31 майда армиягә китте, — дип сөйли әниләре Флүзә ханым. — Армиядән качып йөрмәделәр, барабыз, диделәр. Алар Яңа Кенәрдән Фәнис Аксаков, Илшат Хафизов — барысы дүртәү бер сыйныфта укып, югары белем алып, бүген бер частьта хезмәт итәләр.
Кысна авылыннан Халидә Шәмсиеваның да сөенече һәм дулкынлануы йөзенә чыккан. Яңа гына улы Фаил белән сөйләште.
— Пешекчелеккә укыды, — ди Халидә ханым. — Армиядә дә полигонда пешекче хезмәтен башкара. Олысы Ирекне армиягә озатканда бик борчылган идем, ул исән–сау әйләнеп кайткач, Фаил өчен алай хәвефләнмәдем, чөнки армиягә карата ышаныч туды.
— Президент белән очрашуга килгән кебек бик дулкынландык, — диләр Ташкичүдән Инзения белән Миңнулла Гыйниятуллиннар. — Рүзәл улыбыз техникумның 1нче курсын тәмамлады да армиягә үзе теләп китте. Хәрби ант кабул иткәндә янына бардык, андагы тәртипкә исебез китеп кайтты. Ул вакытта ябыгып киткән иде, хәзер тазарган. Аллага шөкер, арчалылар якташлар булгач, бер–берсен рәнҗетмиләр.
Әти–әниләр чиратлап уллары белән сөйләште.
— Улым, сине күрүебезгә бик шат.
— Бөтен авыл сиңа сәлам әйтте.
— Кара аны, тәртип “5”ле булсын!
— Исән–сау хезмәт итеп кайт!
Газизләргә теләкләрнең иң изгеләре, күңел түреннән чыкканнары. Әллә ниләр сөйләшерләр кебек иде, кая ул, экранга бөтен кеше алдында иң тәмле сүзләрне, иң җылы хисләрне әйтеп буламыни аны?! Ул йөрәктә, күңел сандыгында шул.
Ике айлык баласын күтәреп килгән Гөлшат Әхмәдуллинаның ире Ринатка (Яңа Кенәрдән) булган иң–иң җылы хисләре — нәни улы Самат. Сүзсез дә аңлашыла: бөтен экранны тутырып күрсәтелгән улына караган солдат әтинең күз яшьләре менә–менә тә-гәрәп төшәр сыман иде.
Ахырдан Арча кызы Зилә Шәйхетдинованың әниләр турында җырлавы очрашуны тагын да җылытып җи-бәрде.
Румия НАДРШИНА