Бәхетле булырга һәркем хокуклы

Бәхетле булырга һәркем хокуклы
3 декабрь мөмкинлекләре чикләнгән кешеләрнең Бөтендөнья көне буларак билгеләп үтелә һәм ун көн дәвамында бара.
Бу көнне Арча Мәдәният йортында тантаналы чара үткәрелде. Анда район башкарма комитеты җитәкчесе урынбасары Надия Мифтахетдинова, район ветераннар советы рәисе Альберт Җамалиев катнашты һәм чыгыш ясады. Соңыннан Галиәсгар Камал исемендәге татар дәүләт академия театры коллективы Илгиз Зәйниевнең “Мәхәббәт турында сөйләшү” дигән моңсу комедиясен күрсәтте. Инвалидлар декадасы уңаеннан районда әлеге җәмгыять әгъзалары белән очрашулар күп булды: чәй табыннары артында район хакимияте, социаль тармак оешмалары вәкилләре белән җанлы сөйләшүләрдә инвалидларны борчыган проблемалар күтәрелде.
Декада башында сукырлар җәмгыяте әгъзалары белән шундый рухтагы түгәрәк өстәл узса, соңрак инвалидлар җәмгыятенең башлангыч оешмалары җитәкчеләре белән очрашуда проблемалар уртага салып сөйләшенде.
Гаилә әгъзалары үзләрен тулы хокуклы итеп тойсын өчен бөтен көчен куеп яшәсә дә, инвалидларга халык арасында булу да бик мөһим. Россиянең физик тәрбия һәм спорт отличнигы Фәрит Минхәеровның коляскадагы инвалидлар өчен изге эш башкаруын ишеткән бик күпләр рәхмәт укыды аңа. Ай ярым чамасы элек ул Арчада бочче секциясе оештырып, Рамил, Ришат, Зилә, Ралинә, Айрат һәм Ландышка үзләренең башкалар кебек сәләтле, тырыш икәнлекләрен тоярга ярдәм итте. Ә уен өчен таләп ителә торган махсус туплар комплектларын Рафаэль Муллагалиев бүләк иткән.
Бочче — борынгы Римда барлыкка килә. Татарстанда ул ике ел гына уйнала. Уен коляскада утыручы инвалидлар өчен махсус туплар ярдәмендә башкарыла. Анда 3әр кешеле ике команда яки ике командадан берәр кеше уйный ала. Бер командада 6 зәңгәр, икенчесендә 6 кызыл туп. Бер уенчы ак төстәге тупны уен кырына ыргыта. Башка уенчылар үз тупларын шуңа якынрак ыргытырга тиеш. Ахырдан судья тупларның арасын үлчәп, нәтиҗә чыгара.
Инвалидлар декадасы кысаларында безнекеләр “Арча” спорт комплексында Яшел Үзән районы командасы белән очрашты. Аңарчы алар Яшел Үзәндә булып кайткан иде. Шулай итеп, Арча егет–кызлары, бочче буенча Россия чемпионнары белән көч сынашып, тәҗрибә туплады.
Секциягә йөрүче яшьләр Фәрит Минхәеровка чиксез рәхмәтле. Балаларына игътибар биргән өчен әти–өнилөр дә бик канәгать.
—Улыбызның бар сөйләшүе хәзер бочче турында гына, балаларга вакытын да, көчен дә кызганмаган Фәрит абыйга барлык әти–әниләр исеменнән зур рәхмәт, — ди Ришатның әнисе Гөлнар Әхмәдуллина. — Биредә алар бер–берсе белән аралаша, мондый язмыш ияләре үзләре генә түгел икәнлеген, уңышларга ирешү өчен күп мөмкинлекләр булуын күрә. Авылда яшәсәк тә, улыбызны атнага ике тапкыр шөгыльләнергә алып киләбез, үзе дә барыр көнне зарыгып көтеп тора.
Остазлары шәкертләренә зур өмет баглый. 13 декабрь көнне алар Яр Чаллыга республика ярышына барачак. Киләчәктә безнекеләрне Россия җыелма командасында күреп, уңышларына сөенергә насыйп булсын!
Коляскадагыларның авыру диагнозлары төрле булганга, уенда да алар төрле категориягә бүленә. Ландышка, мәсәлән, шөгыльләнү өчен 20 мең сумнан артык торучы махсус җайланма таләп ителә. Кызның уенда катнашырга теләге көчле булса да, әлеге җайланмасыз шөгыльләнә алмый. Бу очракта тренер иганәчеләр ярдәменә өметләнә.
Без еш кына тормыштан зарланырга яратабыз. Ләкин әнә шундый көчле рухлыларны күрү һәр көннең бәйрәм булуын аңлата бит, югыйсә. Физик мөмкинлеге чикләнгән-нәрнең, бигрәк тә коляскада утыручыларның үз дөньясы. Алар тормышның без күрмәгән якларын да күреп, сәләтләрен төрле яклап файдаланып яшәргә тырыша. Күп очракта безгә, җиргә үз аякларыбыз белән басып, дөнья матурлыгын үз күзләребез белән күреп яшәүчеләргә үрнәк тә әле алар. Һәркем бәхетле булырга хокуклы, шуңа күрә күңелләребезне пакьләндереп, язмышларына битараф булмыйча, кулыбыздан килгәнчә аларга ярдәм күрсәтеп яши алсак иде.
Розалия ЗИННӘТОВА