Машинагыздагы бензин сыйфатлымы?

Машинагыздагы бензин сыйфатлымы?
Ягулык–майлау материалларының сыйфат күрсәткечләре ГОСТ таләпләренә туры килергә тиеш. Сыйфат начар икән, беренчедән, алар кирәгеннән артык күп тотыла, икенчедән, транспорт чарасының ватылуына китерә. Кулланучыга сыйфатсыз нефть продуктлары килеп җиткәнче һәр этапта аны контрольдә тотарга кирәк. Ягулык–майлау материалларының сыйфатын тикшерү буенча айлык та шуны максат итеп куйды. Арчада кулланучылар нинди бензиннан файдалана соң?
Барыбызга да билгеле булганча, бездә ягулык белән тәэмин итүче ике оешма— “Арча нефть продуктлары” акционерлык җәмгыяте һәм “Татнефть АЗС центр” ширкәтенең Казан филиалы бар.
Бензин аларга заводтан ук сыйфат паспорты белән килә. Керү белән һәр вагон, цистернадагы ягулык материалына лаборатор анализ ясала, ягулык–майлау материаллары составындагы һәр матдәнең (күкерт, сумала, су һәм башкалар) күләме тикшерелә. Сыйфат ГОСТ таләпләренә туры килмәгән очракта, ул кире җибәрелә. Без әлеге оешмаларның икесендә дә бензин сыйфатына кагылышлы сорауга әнә шундый җавап алдык.
Моннан тыш, автозаправкаларга бензин ташучы һәр машинага сыйфат паспорты бирелә, график буенча ай саен автозаправкалардагы ягулык–майлау материалларыннан контроль анализ алына, ул лабораториядә тикшерелә, беркетмә төзелә икән.
Югары инстанцияләрдән көтмәгәндә килеп тикшерүләр оештырылуы, сынауга нефть продуктын алып, сыйфатына бәйсез экспертиза үткәрелүе, Татарстан Республикасының ягулык–энергетика ресурслары белән рациональ тәэмин итү һәм сыйфат буен-ча дәүләт идарәсенең сыйфат мәсьәләсенә җитди каравы да күңелдә ышаныч уята.
2011 елдан составында күкертнең күләменә карап бензинны төрле классларга бүлеп йөртәләр. Хәзерге вакытта Арчада Евро4 һәм Евро5 класслы ягулыкка сорау зур. Нинди класслы бензин алуыгызны белү өчен паспортын карарга була. Аны күрсәтүләрен һәр сатып алучы таләп итәргә хокуклы.
Күргәнегезчә, монда да конкуренция бар. Конкурентлар булганда бары тик яхшы сыйфатлы продукция сату юлы белән генә клиентлар игътибарын яуларга була.
Һәркемгә мәгълүм, сатучы үз товарын яманлый алмый. Шуңа оешмаларда да, автозаправкаларда эшләүчеләр дә бу сорауга уңай җавап бирде. Арча автозаправкаларында бензин салучыларның да фикерләрен тыңлап китик.
— “Арча нефть продуктлары” җәмгыяте автозаправкаларында гына бензин салам. Сәбәбе—кулымда ташлама ясаучы карточка бар. Сыйфатына игътибар иткәнем юк. Бөтен бензин да бердер инде ул.
—Миңа күбрәк “Татнефть” автозаправкаларында тәкъдим ителгән бензин ошый.
— Соңгы вакытта яңа чыккан ЭКО бензинын куллана башладым. Машина җиңел барган кебек. Ул туры килмәсә, “Лукойл” оешмасы автозаправкаларында бензин сатып алам.
—Бәясен арттыралар, ә сыйфатын яхшырталар, димәс идем. Классы үзгәргәнгә карап, бензинында үзгәреш сизмим. Элек тә шул бензин иде, хәзер дә шул ук.
Һәркемнең фикере үзенчә. Берәүгә бер нәрсә ошый, икенчегә юк. Ягулык–майлау материаллары сатучылар тискәре фикерләргә җавап итеп гаепне башта бензиннан түгел, ә машинадан эзләп карарга тәкъдим итә. Бәлкем, шулайдыр да. Чөнки ягулык–майлау материалларын шул ук заводлардан, хәтта безнең “Арча нефть продуктлары” җәмгыятеннән алып кайтып саткан Балтач районында берничә автозаправкасы булган ”Юлдаш” ширкәтенең дә сатып алучылар тарафыннан бернинди зарлану сүзләре ишеткәне юк икән. Татарстан Республикасының ягулык–энергетика ресурслары белән рациональ тәэмин итү һәм сыйфат буенча дәүләт идарәсе учреждениесе җитәкчесе урынбасары Гүзәл Сәмигуллина әйтүенчә, “Татнефтепродукт” һәм “Татнефть” оешмалары саткан ягулык сыйфаты буенча дәүләт стандартларына туры килә. “Дөрес, соңгы сынау нәтиҗәләре әле атна ахырында гына билгеле була”,—диде ул.
Гөлсинә ЗӘКИЕВА