Армиягә китә егетләр

Армиягә китә егетләр
Иртәнге сәгать 6 тулмаган әле. Арча уянып кына килә. Йомшак кына кар явып үткән. Трактор шәһәр үзәген кардан чистарта. Поездга төшүчеләр ара–тирә күренгәли. Район хәрби комиссариаты янында ыгы–зыгы сизелә: егетләрне армиягә озаталар. Гармун тавышы ишетелми. Ә барыбер дә гармун белән күңеллерәк. Узган пәнҗешәмбедә 11 егет армиягә алынды, шуның 8е — Арчадан.
Кай арада Арчада яшәүче, заманында “Сельхозхимия” предприятиесендә эшләгән Гәүһәрия белән Мәүлет Зыятдиновларның оныгы Рамил үсеп җиткән дә, 18 яше тулган?! Әле кайчан гына оныгыбыз бар, дип сөенеп, нәниләрен бакканнар. Инде бүген егет ар-миягә китә.
— Иптәшләрен җыеп, күңелле генә озату мәҗлесе оештырдык, — дип сөйли Гәүһәрия ханым. —Арчадагы социаль белем акаде-миясенә укырга кергән иде. Үзе китәм, диде.
Яңа Кенәр авыл җирлеге башлыгы урынбасары Әгъзам Гайфуллин да монда. Район үзәгенә иң ерак төбәкләрнең берсе— Шурабаш ягыннан ул.
— Көзге чакырылышта безнең төбәктән 4нче егет китә, — ди Әгъзам Гайфуллин. — Бүген бездә армиядән качып йөрүче егетләр юк.
Яңа Сәрдәдән Мәүлидә белән Наил Абдрахмановлар уллары Илфатны озата.
— 5 бала безнең, — ди Мәүлидә ханым. — 2 малай, 3 кыз. Олысы Булат армия-дән кайтты инде. Севастопольдә моряк булып хезмәт итте. Кайтканына 1 ел була. Казанда МЧСка эшкә урнашты. Эшкә урнашуда армиядә хезмәт итүе ярады. Институтта укуын дәвам итә. Бүген менә икенчесен — Илфатны озатабыз. Бала өчен ата–ана йөрәге авырта инде...
Яңа Кишеттән армиягә китүче Фирдүс Кәримов:
— 2 энекәш, 1 сеңелкәш бар минем, — ди. — Мәктәпне тәмамлап, Казан электр элемтәсе техникумына укырга кергән идем, менә хәзер армиягә китәм.
— Армиягә барудан качарга исәп юк идеме соң? — дип сорыйм.
— Ю–ук, — дип елмая егет.
Бу турыда Татарстан Республикасы хәрби комиссариатының Арча һәм Әтнә районнары буенча бүлек җитәкчесе, подполковник Алмаз Борһанов белән дә сөйләштек.
— Хәзер элеккеге кебек армия хезмәтеннән качу бик күзәтелми, —ди ул. — Чөнки мәктәпләрдә укучылар һәм әти–әниләр белән аңлату эшләре алып барыла. Ар-миядәге хәлләрнең уңай якка үзгәрүе дә яшьләргә тәэсир итми калмый.
Быел районга Татарстан хәрби комиссары, генерал–майор Сергей Погодин яшьләр белән очрашуга кайт-ты. Ул вакытта хәрби комиссар болай дип сөйләгән иде:
— Егетләрне хәрби хезмәткә әзерләү буенча Арча иң яхшы районнарның берсе. Сезнең солдатлар армиядә әйбәт хезмәт итә.
Армиянең заманча техника белән тәэмин ителүе һәм мондый техника белән идарә итәргә булдыклы, белемле яшьләр кирәклеге турында да әйтте генерал–майор. Солдатның ышанычлы Ватанны саклаучы булып өлгерүе мөһим. Ә моның өчен армиядә бары тик хәрби хезмәт белән генә шөгыль-ләнергә кирәк. Бу максаттан күп уңайлыклар тудырыла. Мәсәлән, ашханәдә махсус пешекчеләр эшли һ.б.
Баланың исән–сау армия хезмәтен үтеп кайтуы ата–ана өчен зур куаныч.
— Бүгенге көндә 300дән артык егет медицина тикшерүе үтә, — дип сөйли Алмаз Борһанов армиягә китүчеләргә һәм әти–әниләргә. — Шуларның 100е сәла-мәтлеге буенча хәрби хезмәткә яраклы түгел. Баланы армиягә яраклы дип табу ата–ана һәм егетнең үзе өчен дә зур бәхет.
Арчада яшәүче Раил Нәҗметдинов та армиягә китә.
— 3нче мәктәпнең 9 сыйныфын тәмамлагач, агросәнәгать көллияте филиалында (120нче училищеда) төзүчелеккә укыдым, — дип сөйли. — Узган ел тәмамладым. Вакытны сузганчы, армиядә хезмәт итеп, бурычны үтәп кайтырга кирәк. Минем әти Гадил дә хезмәт иткән. Германиядә. Дуслар да армиягә китә. Язын ике дустым алынды, көзен тагын берсе китте.
Әти–әнисенә өч малай алар. Олысы — Раил. Булачак солдатлар арттан үсеп килә.
Арчадан Рамил Зыятдинов:
— Армиягә бармаган егет чын ир–егет түгел инде ул, — ди. — Әти–әнидән, туганнардан, дуслардан аерылып читтә яшәп карарга, мөстәкыйльлеккә өйрә-нергә кирәк. Армиядән чыныгып, үзгәреп кайтырмын, дип уйлыйм.
Юлга кузгалыр алдыннан район комиссариатында булачак солдатлар, әти–әниләр белән җыелып сөйләшү булды. Подполковник Алмаз Борһанов киңәшләрен әйтте, Рәмис хәзрәт догалар укып, егетләрнең Ватан алдындагы изге бурычларын намус белән үтәп, исән–сау әйләнеп кайтуларын телә-де.
Урамга чыккач, кочаклашып хушлаштылар. Бала өчен ата–ана йөрәге авырта шул... Армия хезмәтен тутырып кайткан сөенечле көннәр алда әле.
...Автобус кузгалды. Хәерле юл, егетләр!
Румия Надршина