Батырлык туган илне яратудан башлана

Батырлык туган илне яратудан башлана
9 декабрьдә илебез Ватан Геройлары көнен билгеләп үтте. Безнең районда да шушы уңайдан очрашулар, тантаналар уздырылды, аларда Геройлар үзләре, хәрби һәм тыныч хезмәт ветераннары катнашты.
Арчаның 2нче урта мәктәбендә мондый чараларны аеруча күңел җылылыгы биреп, истә калырлык итеп үткәрәләр. Бу юлы да шулай булды. Әмма монда бер чигереш ясап алу кирәктер.
Тантанада катнашкан Татарстан Республикасы хәрби комиссариатының Арча һәм Әтнә районнары буенча бүлек җитәкчесе Алмаз Борһанов бу мәктәптә хәрби–патриотик тәрбия бирүгә зур игътибар бирелүен билгеләп үтте.
— Иң беренче кадетлар сыйныфы да шушында оешты, — диде ул. — Әле менә мәктәп директоры Рамил Мөхәммәдьяров белән тагын бер яңалык турында уйлаштык. Район мәктәпләренә хәзерге вакытта исән булган Россия Геройларын беркетеп чыктык. Укучылар алар белән элемтәгә кереп хат алыша башлады.
Икенче мәктәп укучылары Россия Герое, хәзерге вакытта Россия армиясе Генераль штабында эш-ләүче полковник Дмитрий Сафин белән элемтә урнаштырган. Аны Геройлар көнендә очрашуга чакырганнар. Кырык эшен кырык якка куеп кайтырга вакыт тапканы өчен зур рәхмәт аңа! Район башкарма комитеты җитәкчесе Илшат Галимуллин да бу очрашуның укучылар күңелендә тирән эз калдырырлык мөһим вакыйга булуын билгеләп үтте.
— Геройлар күп булмый, — диде ТРның Арча һәм Әтнә районнары буенча бүлек җитәкчесе А.Борһанов. — Геройлык патриот булудан башлана. Ә һәркем патриот була ала. Патриот булу — әти–әнине, туган җирне, мәктәпне, укытучыларны, туган илне ярату дигән сүз.
Әфганчыларның район оешмасы рәисе Сергей Баһаветдиновның да чыгышы ялкынлы, үтемле булды.
Укучылар әдәби–музыкаль өлешне дә матур, тәэсирләндерерлек итеп әзерләгәннәр. Алар безнең районнан чыккан Советлар Союзы, Социалистик Хезмәт Геройлары турында хатирәләрне яңарт-ты, батырлыкларын күз алдыннан үткәрде.
Габдулла Тукай исемендәге Арча педагогика көллиятендә дә тарихка кереп калырлык вакыйгалар булды. Әлеге уку йорты үзендә укыган атаклы педагоглар, галимнәр, әдәбият һәм сәнгать эшлеклеләре белән генә түгел, ә араларында ике Социалистик Хезмәт Герое, бер Россия Герое булу белән дә горурлана ала. Шуларның берсе — районыбызның Әрнәш авылында туган Илсур Шәйхетдинов Арча педагогика училищесында укыган. Ул тантанада ясаган чыгышында үзенең укытучыларын бик җылы итеп искә алды. Аңа укытучы булып эшләргә насыйп булмый, комсомол юлламасы белән механикалаштыру училищесына җибәрелә. Армиядән кайткач, бульдозерчы булып эшли башлый, “Татнефтепроводстрой” трестының идарә җитәкчесе дәрәҗәсенә кадәр кү-тәрелә.
— Тормышта батырлыкка һәрвакыт урын бар, — диде ул. — Без Төмән сазлыкларында торбалар салдык. Беркайчан да күңелегезне төшермәгез, алга максат куеп, шуңа омтылып яшәргә кирәк.
— Без бүгенге очрашуга килгән барлык кунакларга, Социалистик Хезмәт Герое Илсур Шәйхетдиновка, Россия Герое Дмитрий Сафинга, безнең училищеда укыган Россия Герое Олег Исаевның әти–әнисенә, сыйныф җитәкчесенә, сыйныфташларына бик рәхмәтле, — диде көллият директоры Гөлнара Гарипова.
Озак еллар училище директоры булган хезмәт ветераны Илдус Сәгъдиев Ватан Геройларын зур хөрмәт белән искә алды, студентларга теләкләрен җиткерде.
Район башкарма комитеты җитәкчесе урынбасары Надия Мифтахетдинова районыбызның үз Геройлары белән чиксез горурлануын белдерде, алар яшь буыннар өчен дә Ватанны ярату, фидакарьлек үрнәге булып тора.
Күңел кылларын тибрәндерә торган да көн бу. Кызганыч, Олег Исаев беркайчан да бу уку йорты коридорлары буйлап үтә алмый инде. Герой исеме аңа үлгәннән соң бирелә. Әти–әнисенең күзләрендә яшь, аларга карап безнең дә йөрәк бәгырьләре өзгәләнә. Әмма Олег Исаев исеме көллияттә мәңге яшәячәк, бүген ачылган истәлек тактасы аның безнең арада булуын искәртеп торачак.
— Истәлек тактасын ясау-да республиканың хәрби комиссары Сергей Погодин үзе ярдәм күрсәтте, — ди Алмаз Борһанов.
Истәлек тактасы Социалистик Хезмәт Герое Илсур Шәйхетдинов хөр-мәтенә дә куелды.
Ильяс ФӘТТАХОВ