Гаиләләре игьтибарсыз калмаска тиеш
Гөлсинә Зәкиева
Татарстанда хәрбиләргә һәм аларның якыннарына ярдәм итүнең киң системасы эшли.
Махсус хәрби операциядә катнашучылар һәм аларның гаиләләре өчен ярдәм чаралары каралган.
Татарстан Республикасында махсус хәрби операциядә катнашучыларга һәм аларның гаилә әгъзаларына ярдәм итүнең киң колачлы системасы гамәлдә. Бүген республикада төрле ташламалар һәм социаль гарантияләр бар.
Ярдәм төрле юнәлешләрне үз эченә ала: медицина ярдәме, социаль түләүләр, белем алу мөмкинлекләре, эшкә урнашу, үз эшеңне башлап җибәрү һәм башкалар.
Аеруча игътибар хәрби-ләрнең гаиләләренә бирелә. Хәрбиләрнең балалары мәктәпләрдә бушлай кайнар аш белән тәэмин ителә, көллиятләргә һәм югары уку йортларына кергәндә алар өчен ташламалар каралган. Моннан тыш, гаиләләр чыгымнарны компенсацияләү һәм адреслы ярдәмнән файдалана ала.
Мөһим юнәлешләрнең берсе – медицина һәм психологик ярдәм. Махсус хәрби операциядә катнашучылар дәвалану һәм тернәкләнү узу, белгечләрдән консультация алу мөмкинлегенә ия.
Тыныч тормышка кайткан хәрбиләргә һөнәри белем алу өчен яңадан укыту һәм эшкә урнаштыруга ярдәм итү программалары да гамәлгә ашырыла. Аларга яңа һөнәр үзләштерүдә, квалификациясен күтәрүдә һәм эш табуда ярдәм күрсәтелә ала.
– Махсус хәрби операциядә катнашучыларга һәм аларның гаиләләренә ярдәм итү – безнең эшчәнлекнең төп өстенлекләренең берсе. Татарстанда ярдәм чараларының киң системасы булдырылган һәм ул даими рәвештә тулыландырыла. Безнең бурыч – һәр гаилә дәүләтнең игътибарын һәм реаль ярдәмен тойсын, – диләр халыкны социаль яклау бүлегендә.
Республика халкы да мондый ярдәм чараларының мөһимлеген билгеләп үтә.
– Кешеләр илне яклаганда, аларның гаиләләре дә игътибарсыз калмаска тиеш. Республикада ярдәм программалары күп булуы – бик мөһим. Бу хәрбиләрнең гаиләләренә ышаныч һәм терәк бирә, – ди алар.
Татарстанда махсус хәрби операциядә катнашучылар һәм аларның гаиләләре өчен түбәндәге ярдәм чаралары гамәлдә:
- торак-коммуналь хезмәтләр өчен ташламалар;
- мәктәпләрдә балаларга бушлай туклану;
- уку йортларына кергәндә ташламалар;
- медицина һәм психологик ярдәм;
- тернәкләндерү программалары;
- яңадан укыту һәм эшкә урнашуда ярдәм һәм башкалар.
Шулай ук халыкны социаль яклау бүлеге тарафыннан үз эшен башлап җибәрү өчен акча бирелә.
Махсус хәрби операциядә катнашучыларга һәм аларның гаиләләренә ярдәм чараларын киңәйтү буенча эш дәвам итә. Республика хакимияте федераль структуралар һәм җәмәгать оешмалары белән берлектә яңа ярдәм программалары эшли.