Иртә буран, кич тә буран...

Иртә буран, кич тә буран...
Алдагы елларда кар ноябрь урталарында ятса, быел ул декабрь башын көтте. Кышның беренче көненнән үк кар–бураннар башланды. Шәһәр урамнарын кардан чистарту хезмәтен башкаручы “Жилкомбытсервис” ширкәте өчен мәшәкатьле чор.
—Безне мондый һава торышы куркытмый,—ди ширкәт җитәкчесе Альберт Хәкимов.—Кышның киләсе билгеле иде бит. Техника җитәрлек, барын да алдан әзерләп, төзекләндереп, кар эттергеч-ләрне ясап куйдык. Эретеп ябыштыручылар Алим Сираҗиев, Равил Абушаев, Сергей Козловның куллары алтын, теләсә нинди хезмәтне җиренә җиткереп, тоткарлыксыз башкарып куялар. “Монолит” ширкәтеннән дә “Амкадор” автотөягече һәм грейдер алып торабыз. Алар станциядә, тимер юлның өске ягында басу кырыенда урнашкан урамнарны кардан арындыра.
Тракторчылар да кар яуган көннәрдә иртәнге 4тән эшкә чыга. Күбесе “Жилкомбытсервис” ширкәте оешкан көннән бирле эшли. Үзләре дә хезмәт тәҗрибәләреннән чыгып урынлы һәм эшлекле киңәшләр бирерлек. Тракторчылар Марат Җәләев, Таһир Зиннәтуллин, Садыйр Әхмәтжанов, Илшат Җәләев, Фаил Хисаметдинов, Фәрит Билалов, автогрейдерда Камил Зиннәтов, “Амкадор” автотөягечендә Рафаил Зиннәтов, Рифат Сөләйманов, тозлы–комлы катнашма сибүче машинада Закир Хәкимов турында җитәкчеләр уңай фикердә генә.
—Көчле бураннар булганда алар төнге 12гә кадәр кар чистартуда. 3–4 сәгать кенә ял эләккән вакытлары да бар. Рифат Сөләйманов —Яңасаладан, Рафаил Зиннәтов Гөберчәктән килеп йөри. Алар мондый көннәрдә өйләренә дә кайтып тормый,—ди Альберт Хәкимов.—Ай саен график төзелә, эшне контрольдә тоту өчен дирекция составыннан җаваплы кешеләр билгеләнә.
Шәһәрдә 150гә якын урам бар, шуңа әле Айван, Төбәк–Чокырча, Зур Бирәзә, Күпербаш авыллары да өстәлә. Барысын да берьюлы чистартып бетерү мөмкин түгел. Беренче чиратта автобус маршрутлары үткән урамнар, балалар бакчалары, мәктәп яннары йөри алырлык хәлгә китерелә. Арча үзәгендә, тимер юл вокзалы янында машиналар күп булу ул тирәләрне вакытында кардан арындырырга мөмкинлек бирми. Шуңа кичләрен, ял көннәрендә эшләргә туры килә. “Юл юк, урамнан чыгып булмый, дип тә шалтыраталар. Барсаң, капка төбендәге карны күршесе юлга чыгарып өйгән була. Бу вакытта без башка урыннарны чистарта алыр идек. Халык шуны да истә тотсын иде”,—ди җитәкче.
Ял көнне Арча үзәгендә көне буе эш кайнады. “Жилкомбытсервис” ширкәте хезмәткәрләре мәйданны, юлны кардан арындырды. Кышкы карлы көннәр алар өчен, чыннан да, кызу урак өстен хәтерләтә. Бу көннәрдә бигрәк тә. Көн дә яуган карны чистартып кына өлгер.
Юлларны кардан чистарту тагын бер оешмага— “Татавтодор” акционерлык җәмгыятенең Арча филиалына йөкләнгән. Алар Казан—Малмыж юлын (Биектау чигеннән алып Балтач белән чикләшкән урынга кадәр), шулай ук Зур Бирәзә тавыннан башлап Олы Әтнә, Арчадан Теләче чигенә кадәр араны, Сеҗе, Яңа Кенәр (Байкалга кадәр), Яңасала, алардан кереп киткән авыл юлларын, Казаннан кайтканда көньяктан шәһәргә керүче юлны, автовокзалдан шәһәр үзәгенә кадәр араны, яңа елга кадәр килешү нигезендә Комсомол, Зур, Банк урамнарын кардан арындыра. “Моның өчен бездә техника җитәрлек,—ди баш инженер Рамил Галаутдинов.—Тозлы–комлы катнашма сибүче һәм кар җыештыручы 7 зур машина, 4 автогрейдер, шәһәр урамнарында карны җыеп, щетка белән себереп баручы 2 трактор, кар өемен юл кырыена атучы 4 техника, шулай ук 4 кар төягеч, эттергеч, 3 бульдозер бар. Эшчеләр карлы–буранлы көннәрдә вакыт белән хисаплашмый”.
Гөлсинә ЗӘКИЕВА