Спортчылар артистлар ролендә

Спортчылар артистлар ролендә
Узган шимбәдә “Газиз Арчам! Даның зурдыр, юлың туры, сиңа багышлана ул–кызларың җыры!” дигән девиз астында үткәрелгән концертлар бәйгесендә “Арча” һәм “Олимп” балалар–яшүсмерләр спорт мәктәпләре коллективлары “бил алышты”.
Ярыш рухы, җиңү шатлыгы күңелләренә үк сеңгән спортчылар бу тойгыны район Мәдәният йорты сәхнәсендә дә югалтмады, бер–берсен уздырып чыгыш ясады, тамашачыны сөендерде. Көчле алкышлар алар өчен пьедесталның иң югары баскычына күтәрелү белән бер булды.
Бәйгене “Олимп” балалар–яшүсмерләр спорт мәктәбе коллективы башлап җибәрде. Беренче номер итеп скетчны кертүләре дә уңышлы чыкты, тамашачыны шунда ук сәнгать дөньясына бөтереп алып кереп китте. Темасын эзләп тә ерак китмәгәннәр. Игътибар беләнрәк карасаң, безнең көндәлек тормышыбыз да кайвакыт үзе бер кәмиткә әверелә. Монда да муеннан эш, гаилә мәшәкатьләрен кырыйга куеп коллектив белән шушы концертка әзерләнүләрен, аның кызыклы ягын тотып алып, оста итеп күрсәтә белгәннәр. Вокаль ансамбльләр егетләр яки кызлардан түгел, ә кызлар һәм егетләрдән торуы белән үзенчәлекле, башкару осталыклары да игътибарга лаек. Фольклор күренешләре дә моңарчы бер дә күренмәгән һәм күңелле. Алар “Кияү мунчасы”н күрсәтте. Элек кияү белән кызны уфалла арбасына утыртып урам буйлап кияү мунчасына алып бара торган булганнар. Менә шуны искә төшерде спортчы артистлар. Яшьләр “мунча” кергәндә озатучылар җыр–бию, уен–көлке белән күңел ачты. Инструменталь ансамбль чыгышы, тренерлар Хәйдәр Зәйнуллин, Фәнис Мөхәммәтшинның җырлаулары, йога буенча инструктор 70 яшьлек Анна Плесовскихның чыгышы, җитәкче Венера Таджибаеваның шигырь сөйләве, румын халыкларының сюжетлы биюе алкышлар белән бәяләнде.
“Арча” балалар–яшүсмерләр спорт мәктәбенә мондый яхшы чыгыштан соң авыррак булыр дисәң, кая ул, алар да искиткеч матур концерт күрсәтте. Халык уен кораллары ансамбле керәшен халыклары көйләренә тукталган. Үзенчәлеге, башкару осталыгы, сәхнә культурасы, киемнәре—бар да сокланырлык. Скетчларыннан халык рәхәтләнеп көлде. Авыл хатыны (Ринат Насыйбуллин) телевидениегә хуҗалык эше турында сөйләргә бара һәм ялгышып төнге тапшыруга эләгә. Алып баручы (Илшат Габдрахманов) белән бер–берләрен аңламау нәтиҗәсендә көлкеле сөйләшү килеп чыга. Коллектив “Килен төшкәндә” фольклор күренешен тәкъдим итте, алар бу йоланың бүгенге көнгә кадәр сакланып килгән урыннарын (киленне мендәргә бастыру, бал–май каптыру) алганнар. Күңелле һәм кызык. “Арча” балалар һәм яшүсмерләр спорт мәктәбе җитәкчесе Ринат Гәрәев белән хуҗалык эшләре буенча җитәкче урынбасары Роберт Шәриповның, Гөлназ Җәләлетдинованың җырлауларын, Алия Мозаффарованың биюен, хезмәт ветераны Габдуллаҗан Бәйрәмовның хромкада уйнавын, ковбой биюен тамашачы яратып кабул итте. Егетләрдән генә торган вокаль ансамбльнең (концертларда бу сирәк күренеш) тигез тавыш белән матур җырлавы күңелгә үтеп керде.
— Бүгенге концерт алдагыларыннан аерыла, күтәрелеш сизелә, әзерлек күренә, чыгышлар тере бара. Кызык та, күңелле дә,— жюри әгъзалары фикере әнә шундый.—Ярыш рухы керде. Бу тамашачыда да кызыксыну уята.
Гөлсинә ЗӘКИЕВА