Сюрпризлы яңа ел

Сюрпризлы яңа ел
Яңа ел якынлашканын күрәсең, күңелең белән тоясың килсә, кичләрен Арча үзәгенә чык, я булмаса көндез стадионга төш. Оешмалар тирә–юнендә акрынлап җемелдәшеп утлар яна, кардан ясалган әкият геройлары сыннары пәйда була башлады. Бу өлкәдә балалар бакчалары, мәктәпләр өлгеррәк булып чыкты. Китапханә тирәсе, мәдәният учагы каршы аллы–гөлле энҗе бөртекләреннән торган яктылыкка күмелде. Тиздән башка оешмалар яны да әкият шәһәрчеген хәтерләтер.
Стадионда “Кар шәһәрчеге—2014”не төзү эшләре башланып киткән. Ул аерым бер темалар буенча композицияләрне үз эченә алачак. Берсе Кыш бабай, Кар кызы, 2014 ел символы булган Ат сынын кардан төзеп куйса, икенчеләре Маша һәм Аю, Крокодил Гена һәм Чебурашка, Бүре белән Куян (“Ну, погоди!”), Ниф–ниф, Нуф–нуф, Наф–нафны иҗат итү белән шөгыльләнә. Аннан Кәҗә белән Сарык, Су анасы, Шү-рәледән башка нинди әкият дөньясы була алсын ди. Кар шәһәрчегенең нәкъ уртасында 20 метрлы, мәһабәт яшел чыршы да урын алган инде.
—Чыршы җылы көнне кайтып калды, ылыслары коелырлык булмады. Шуңа матур да. Әле энҗе нурлар белән бизәп тә җибәрсәк, тагын да тулыланачак,—ди “Жилкомбытсервис” ширкәте җитәкчесе Альберт Хәкимов.—Аңа 10000 яктырткычы булган 50 гирлянда, 300 стробоскоп (яктылык дулкыннары кабындыручы прибор) эленәчәк. Чыршы янында зур сәхнә, читтә шуарга тау ясалачак.
Шыпырт кына колагыгызга тагын бер яңалыкны җиткерергә телибез—бу Яңа ел сюрпризы—быел стадионда, чыршы каршында ук чып–чын шугалак булачак. Шунда ук прокатка алып тимераякта шуа алачаксыз. Кышкы спорт төрләрен яратучылар өчен үзе бер бәйрәм.
26 декабрьдә кичке 6да стадионда үзәк чыршыны ачу тантанасы булачак. Анда оешма, предприятие, учреждениеләр “Яңа ел йолдызнамәсе” парадында катнашачак, соңыннан алар көнчыгыш йолдызнамәсе символларын яклап чыгыш ясаячак. “Кышкы әкият—2014” кар фигуралары бәйгесенә дә шунда нәтиҗә ясалачак. Ә инде Яңа ел төнендә чыршы янында ял итәргә яратучылар өчен театральләштерелгән күңел ачу тамашасы тәкъдим ителәчәк.
Яңа ел бәйрәменең каникуллар белән тоташып китүе балалар өчен икеләтә шатлык. Бу көннәрдә һәркайда чыршы бәйрәмнәре, төрле спорт ярышлары, экскурсия-ләр, культпоходлар, Яңа Кырлайга Кыш бабайның урман әкиятенә сәяхәтләр, төрле күңел ачу кичәләре оештырылачак. Моннан тыш, укуда алдынгы, җәмәгать эшләрендә актив 5–9 сыйныфта укучы һәм күп балалы гаи-ләләрдән 200 бала район башлыгы чыршы бәйрәмендә катнашачак, Кыш бабай кулыннан бүләкләр дә алачак. Ә менә 40 балага республика чыршы бәйрәмендә күңел ачу бәхете елмаячак. Алар—уку отличниклары, балалар хәрәкәте активистлары, олимпиадаларда, спорт ярышларында җиңүчеләр.
Бүләксез нинди Яңа ел, ди инде ул. Балачакта аның шунысы куандыра да. Бу турыда да онытмаган район җитәкчеләре. Балалар бакчаларында тәрбияләнүче һәм 1–9 сыйныфта белем алучы 7343 бала Кыш бабай күчтәнәче алачак. Бер капка 265 сумлык тәм–том тутырыла. Шулай ук бүләкләр Яңа Кенәр интернат мәктәбендә тәрбияләнүчеләргә, “Өмет чыганагы” тернәкләндерү үзәгендәге инвалид балаларга да бирелә.
Яңа ел бәйрәмнәре 13 гыйнварда стадионда искечә Яңа елны каршылауга багышланган театральләштерелгән тамаша белән тәмамланачак.
Озын ялларыгыз күңелле узсын, Яңа ел һәрберегезгә бары тик бәхет, шатлыклар гына алып килсен!
Гөлсинә ЗӘКИЕВА