Тырыш халык яши бу төбәктә

Тырыш халык яши бу төбәктә
Апаз авыл җирлегенә кергән авылларда нигезләр дә нык, йорт–җирләр дә таза. Күренеп тора, бу якларда тырыш халык яши, шуңа тормышлары да мул. Шушы җирлектә очрашуга, тәҗрибә уртаклашырга килгән авыл җирлекләре башлыклары, беренче чиратта, шуңа игътибар итте. Авыл көне гаилә фермаларын, фермер хуҗалыкларын, шәхси эшмәкәрлекне һәм шәхси секторда ярдәмче хуҗалыкларны үстерү буенча эшнең торышына багышланды.
Биредә һәр җиргә бәйрәм, Яңа ел рухы иңгән. Кая гына барма, мәктәпме ул, балалар бакчасымы, кибетме я булмаса мәдәният йорты тирәсеме, һәркайда әкият геройлары сыннары белән кар шәһәрчекләре барлыкка килгән. Аннан халкы бик кунакчыл. Пөшәңгәр, Апаз, Хәсәншәех мәктәпләрендә кунакларны ипи–тоз, баллы төш белән каршы алдылар, Апаз балалар бакчасында тәрбияләнүчеләр каз өмәсе күренешен тәкъдим итте. “Кунакларны шулай каршы алу безнең районның күркәм традициясе. Бик зур тәрбия чарасы да. Апаз авыл җирлегенә караган кайсы мәгариф учрежде-ниесенә кермә, мәктәпме ул, балалар бакчасымы, һәрберсендә тәртип, уңай шартлар, яхшы оештырылган чаралар”,—дип билгеләп үтте район башлыгы урынбасары Любовь Осина.
Хәсәншәех фельдшер–акушерлык пункты күпләр көнләшерлек. Авылда һәм шундый шартлар! “Фельдшер, процедура, кабул итү, теш табибы, стерильләштерү һәм башка бүлмәләр бар. Көнгә 20ләп кеше кабул ителә”,—ди 30 ел пунктны җитәкләүче Рәм-зия Закирова.
Бу төбәктә мәчетләр, зиратларга да игътибар зур. Хәсәншәех мәчете имамы Шамил Әхмәтгалиев бик теләп эш тәҗрибәсе белән уртаклашса, армиядә хезмәт иткәннән соң Казан мәдрәсәсен тәмамлап, Апаз мәчетенә кайткан Башкортстан егете, яшь имам Гайсә Гобәйдуллин өчен әле бар да алда. “Хуҗалык аңа ай саен 10 мең сум хезмәт хакы биреп бара. Фатир белән тәэмин итү мәсьәләсе дә карала. Коммуналь хезмәтләр чыгымнарын Фатыйх Сибагатуллин түли. Шулай һәр тарафтан ярдәм булганда эшлисе генә кала”,—ди Ринат Садыйков.
—Апаз ягы ярдәм итәргә әзер торган якташлары—иганәчеләре булуы белән бәхетле. Бездә дә эшмәкәр Шамил Хаҗиев, хуҗалык җитәкчесе Шәйдулла Сәлахов һәрдаим булышып тора. Алар булганда җайлы,—ди Сеҗе авыл җирлеге башлыгы Гөлфия Гыйбадуллина.
Тик алар белән дә уртак тел таба, сөйләшә белергә кирәк. Апаз авыл җирлеге башлыгы хуҗалык җитәкчеләре белән дә тыгыз элемтәдә торып эшли, халык арасында да ихтирам казана. Авыл халкы тырышлыгы һәм матди ярдәме белән Пө-шәңгәр авылы зиратын коймалап алганнар, чистартканнар, мәдрәсәгә телевизор, DVD юнәт-кәннәр.
Бу көнне җитәкчеләр Апазда — Әхмәтхановлар, Пөшәңгәрдә Низамовлар гаилә фермалары белән дә танышты. Әхмәтхановлар гаилә фермасы әле 2012 елның җәендә генә оешкан. “Грантның ярты суммасын алып, шул акчага 30 баш терлеккә исәпләнгән уңайлыклары булган ике торак, склад төзедек. Икенче өлешенә терлек алырга планлаштырабыз”,—ди Марат Әхмәтханов. Мөмкинлекләре җитәрлек, 156 гектар җирләре, машина, трактор, комбайннары, иң мөһиме — теләклә-ре, бу адымнарының уңышлы буласына ышаныч бар.
Низамовлар крестьян–фермер хуҗалыгы 2010 елда оешкан һәм бүген уңышлы гына эшләп килә. “Миллион сум субсидия бирделәр. Тик кая ул гына җитсен. Кредит алдым. 30 баш терлекнең 15е сыер. Көнлек савым 15 килограмм. Көнгә 130—150 килограмм сөт сатам. 19 сумнан. Чиста керем турында сөйләшергә иртәрәк әле, шулай да уңышлар сөендерә”,—ди Илһам Низамов.
Халыкны эш белән тәэмин итү максатыннан хуҗалык җитәкчесе тырышлыгы белән Апазда 200 башка исәпләнгән яңа ферма төзелгән. Кунаклар анда да булды, шартлары белән танышты, зоотехник Рөстәм Хәбибуллинга сорауларын бирде.
Авыл көненең йомгаклау өлеше Хәсәншәех мәдәният йортында үтте.
Гөлсинә ЗӘКИЕВА