Яңа елны каршылыйбыз

Яңа елны каршылыйбыз
Яңа ел аеруча балалар өчен күңелле бәйрәм. Кыш бабай, Кар кызы белән очрашу, бүләкләр алу, яшел чыршы янында җырлап–биеп күңел ачу—тулы бәхет өчен сабыйларга тагын ни кирәк. Өстәвенә, әле аларны сөендереп, каникуллар башлана. Балаларны бу көннәрдә берсеннән–берсе матур, күңелле чаралар көтә. Шуларның берсе—чыршы бәйрәмнәре. Алар 25–28 декабрь көннәрендә балалар бакчаларында, мәктәпләрдә үтәчәк. Мәктәп яны лагерьлары да 25 декабрьдә үзенең ишекләрен ача.
Арча стадионындагы урман гүзәлен күпләр күрергә дә өлгергәндер. Мәһабәт чыршы, тирә–юнендәге кардан ясалган әкият геройлары, шугалак кунаклар көтә. 26 ДЕКАБРЬДӘ үзәк чыршыны ачу тантанасында ул аллы–гөлле утларга күмеләчәк. Мондый гүзәллек балаларның гына түгел, өлкәннәрнең дә күңелен били.
28 ДЕКАБРЬДӘ район Мәдәният йортында район башлыгының Яңа ел чыршысы иң алдынгы һәм актив балаларны үз янына җыячак. Кыш бабайның алар өчен дә бүләкләре бар. Шул ук көнне Яңа Кенәр балалар иҗат йортында Кыш бабай призына “Күңелле стартлар” үткәрелә. Бу приз иң оста, иң өлгер, иң җитез балага эләгәчәк. Монысы инде спорт сөючеләр колагына: хоккей буенча кышкы сезонны ачу 28 декабрьдә 9 сәгатьтә 5нче гимназия шугалагында була.
31 ДЕКАБРЬДӘ, Яңа елга каршы төндә үзәк чыршы янында кичке 8 сәгатьтә җырлы–биюле, уен–көлкеле тамаша башлана. Биредә 2014 елны каршы алырга, төне буе күңел ачарга мөмкин. Монысы кич һәм төнлә, ә көндез нишләргә, дисәгез, иртәнге 9 сәгатькә стадионга төшегез, биредә Кыш бабай призына чаңгы ярышлары үтәчәк. Узышта катнашмасагыз да, җанатар булып, ярышучыларга көч өстәп торырсыз.
Каникулларда өйдә ятуга караганда спорт белән шөгыльләнүне кулай күрүчеләр өчен Яңа елның беренче көннәреннән башлап нинди генә ярышлар оештырылмый. 4 ГЫЙНВАРДА “Арча” спорткомплексында йөзү, 6–8нче сыйныф укучылары арасында мини–футбол турнирлары, күңелле стартлар, стадионда Сәламәтлек көне кысаларында Кыш бабай призына төрле спорт ярышлары, Арча үзәк китапханәсендә кышкы уеннар, күңел ачулар булачак. Алар бар да 9 сәгатьтә башлана. Ә нәни-ләрне бу көнне Арча Мәдәният йортындагы Яңа ел чыршысы 10 сәгатьтә үз тирәсенә җыя. Рәхәтләнеп уйна, көл, каникулларның рәхәтен күр. Ярышлар, күңел ачулар, бәйрәмнәр әле моның белән генә дә бетми. 5 ГЫЙНВАРДА 6–8 сыйныф укучылары 5нче гимназия шугалагында хоккей уйнаячак, “Арча” спорткомплексында 7–8 сыйныф укучыларының баскетбол буенча иптәшләрчә очрашуы үтәчәк.
Каникулларның алдагы көннәре дә берсеннән–берсе кызыклы чараларга бай. 6 ГЫЙНВАРДА, мәсәлән, стадионда укучылар арасында чаңгы ярышлары, “Арча” спорткомплексында 6–8 сыйныф кызлары арасында баскетбол турниры, 7 ГЫЙНВАРДА сәнгать мәктәбендә чыршы янында Раштуа бәйрәме, 8 ГЫЙНВАРДА Укучылар сараенда авиамодельләштерү буенча, шахмат сөючеләр өчен ярышлар, “Арча” спорткомплексында йөзү буенча турнир, шахмат, шашка, кул көрәше, өстәл теннисы буенча ярышлар, стадионда чаңгы ярышы буенча район беренчелеге (эстафета), китапханәдә күп белүчеләр турниры, Яңа Кырлай мәктәбе шугалагында хоккей буенча иптәшләрчә очрашу була. 9–10 ГЫЙНВАРДА “Арча” спорткомплексы тагын сезне үзенә чакыра. Бу көннәрдә биредә волейбол буенча иптәшләрчә очрашу һәм өстәл теннисы буенча турнир үтәчәк. 9 гыйнварда 7нче мәктәп шугалагы хоккей сөючеләрне үзендә көтә.
Каникул көннәрендәге спорт ярышларын 11 ГЫЙНВАРДА Айдар Галимҗанов истәлегенә җыелма командалар арасында хоккей буенча район беренчелеге тәмамлый. Ул 5нче гимназия шугалагында 9 сәгатьтә башлана. 13 ГЫЙН-ВАРДА кичке 6 сәгатьтә үзәк чыршы яңадан иске Яңа елны каршыларга барыгызны да үз янына җыя.
Каникул көннәрендә спорт сөючеләр өчен стадиондагы шахмат һәм шашка, өстәл теннисы, өстәл уеннары йортлары ишекләре көне буе ачык.
Гөлсинә ЗӘКИЕВА