Депутатларны беләбезме

Депутатларны беләбезме
Редакциягә Арчаның шәрыкъ өлешендәге Сибгатуллин урамында яшәүче Сәвия Абдуллина шалтыратты.
— Урамга бик әйбәт итеп асфальт җәйделәр. Әмма юлны тар итеп эшләделәр, — дип сөйләде ул. — Машиналар тыз–быз чаба. Җәяүлеләр дә шуннан йөри. Каршыга машина килсә, юл кырыена чыгарга бик уңайсыз. Юл биегрәк итеп эшләнде. “Бәләкәч” балалар бакчасына килүчеләргә уңайсыз.
Шушы ук урамда яшәүче икенче бер ир–ат (исемен әйтмәде):
— Урамга авыр йөк машиналарын кертмәскә иде, — диде. — Дөбер–шатыр, бакчадагы балаларга да тынычсыз. Юл да тар. Күпербаш ягыннан бакчага кадәр озын ара түгел. Авыр йөк машиналарына керүне тыю турындагы билге куелса, әйбәт булыр иде.
Бу турыда ЮХИДИ бүлекчәсе җитәкчесе вазыйфаларын башкаручы Илдар НОТФУЛЛИН белән сөйләштек.
— Шәһәр башкарма комитетына җыелышып хат язсыннар, бергәләп бу юлны өйрәнербез һәм тиешле чара күрербез. Урамга тизлекне киметү, авыр йөк машиналарын үткәрмәү билгеләрен куярга була, – диде ул.
Сәвия ханым Абдуллина шәһәр Советы депутатларының нәрсә эшләве белән дә кызыксынды.
Шәһәр һәм район Советлары депутатларына халык мөрәҗәгать итәме, аларның ярдәмнәре бармы? Шушы сораулар белән без берничә депутатка мөрәҗәгать иттек.
Беренчеләрдән булып эшмәкәр Алимас ӘМИРОВ белән сөйләштек. Ул Күпербаш һәм Арчаның шәрыкъ өлешендәге берничә урам участогында шәһәр Советы депутаты. Күбрәк туган авылы Күпербаш турында сөйләде:
— Су кертелде, ике күпер, яктылык эшләнде. Чиратта — зиратның коймасын тотып аласы бар. Авыл яшьләре хоккей тартмачыгын эшләп куйды. Халык соравы ул тормыш көйсезлекләреннән килеп чыга. Зур проблемалар хәл ителә бара.
“Водоканал Сервис” ширкәте җитәкчесе Тәлгать МИНДУБАЕВ:
— Өчиле ягында район Советы депутаты булып торам. Ни эшләгәнне авыл җирлеге башлыгыннан сорый аласыз, — диде.
Шунда ук Яңа Кырлай авыл җирлеге башлыгы Газинур СӘФӘРОВ белән элемтәгә кердек.
— Бөтен эшне бергә башкарабыз, — дип сөйләде ул. — Мәктәпкә, фельдшер–акушерлык пунктына су керттек. Техника кирәк булса, шуңа мөрәҗәгать итәбез. Менә әле генә Яңа Кырлайга хоккей тартмасы урынын ясатты. Җыелышларга да килә.
Арча һәм Әтнә районнары буенча Пенсия фонды җитәкчесе Рузилә НУРМӨХӘММӘТОВА — Арча станциясендә Тукай, Такташ, Көньяк, Сафиуллин һ.б. урамнар участогында шәһәр Советы депутаты.
—Нинди генә сорау белән мөрәҗәгать итсәләр дә, аларның берсе дә ачык килеш калмый, — ди ул. — Тиешле оешмалар белән хәл итәргә тырышабыз. Шәхсән үзем пенсия, социаль мәсьәләләр буенча сорауларны ачыклап ярдәм итә алам.
“Жилкомбытсервис” ширкәте җитәкчесе Альберт ХӘКИМОВ:
— Питомник белән Зур Бирәзәдә мин шәһәр Советы депутаты, — ди. —Халык сораулары буенча байтак эшләр башкарабыз. Зур, карт агачларны кистердек, зиратларны чистартканда бункерлар куйдык, үзләре акча җыеп юлларга таш ташыттылар, аларны җәяргә грейдерлар бирдек, юлларын кардан чистартырга булышабыз. Шәһәр башкарма комитеты белән бергә аңлашып эшлибез.
Депутатларыбызны белеп торыйк, аларны без халык мәнфәгатьләрен кайгыртучылар буларак сайладык. Сөйләшүне дәвам итәрбез әле.
Апаз авылыннан республика клиник хастаханәсендә дәваланучы Раилә ИБРАҺИМОВА:
— Чирдән савыга алмыйча интектем. Республика клиник хастаханәсенә эләгә алмадым. Я урын юк, я нәрсә... Шуннан үзебезнең җирлектәге район Советы депутаты Мансур абый Әхмәтовка мөрәҗәгать иттек. Аның ярдәме белән республика клиник хастаханәсенә дәваланырга килдем. Хәлем күпкә яхшырды. Казан мине кеше итте. Бик зур рәхмәт депутатыбызга, “Ватан” хуҗалыгы җитәкчесе Мансур абый Әхмәтовка, аның халыкка ярдәме бик зур.
Румия НАДРШИНА