Афәрин, акыллым

Афәрин, акыллым
Моңарчы районда мәктәпкәчә учреждениеләрдә тәрбияләнүче балаларның җыр бәйгесе булганы юк иде. Ул район бакчаларының музыка белгечләре берләшмәсе җитәкчесе, 10нчы балалар бакчасында эшләүче Лилия Харитонова идеясе белән беренче тапкыр оештырылды.
10нчы бакча музыка залына балалар белән бергә аларның музыка җитәкчеләре дә килгән иде. Аллы–гөлле күлмәкләрдән курчактай кызларның, җитди күренергә тырышкан малайларның чыгышын “сөбханалла” дия–дия, сокланып һәм елмаеп тыңладык. Аларның барысын да әйтеп үтәсе килә. 1нче бакчадан — Айсылу Сәфәргалиева, Азалия Калачева, 2нче бакчадан — Мәликә Сабирова, Әдилә Нигъмәтҗанова, 3тән — Эмилия Гыйниятова, Камилла Матиева, Ранил Җәләев, Ислам Габдрахманов, 4тән — Камил Носратов, Диләрә Хәсәнова, 5тән — Азат Мостафин, Ләйлә Закирова, Диләрә Җамалиева, 8дән — Камилә Габдрахманова, Гөлүсә Гарифҗанова, 10нчы бакчадан — Данил Закиров, Искәндәр Хафизов, Искәндәр Сабиров, Исмәгыйль Газыймов, Яңа Кенәр бакчасыннан Зөһрә Галимҗанова.
— 17 ел эшлим, — ди 2нче балалар бакчасы музыка җитәкчесе Йолдыз Абдуллина. — Әмма мәктәпкәчә яшьтәгеләр белән мондый бәйгенең булганы юк. Ә менә Әдилә Нигъмәтҗанова белән “Йолдызлык” бәйгесендә катнашкан булды. Сәләтле бәләкәчләрне күрсәтә дә белергә кирәк. Мондый бәйгедә катнашуыбызга бик сөендем.
1нче балалар бакчасында 20 ел музыка җи-тәкчесе булып эшләүче Вероника Капралова:
— Бакчада бәйрәмнәрне күп үткәрәбез, әмма аларны балалар һәм ата–аналардан башка беркем дә күрми, үзебез дә район бакчаларындагы сәләтле балаларны белмибез. Бу үзенә күрә тәҗрибә уртаклашу һәм башкаларның эше белән дә танышу.
Балаларның чыгышын жюри составында район мәгариф идарәсе методисты Гөлфирә Феоктистова, сәнгать мәктәбе укытучысы Альбина Фатыйхова, 5нче бакчадан заманында музыка житәкчесе булып эшләгән тәрбияче Клара Шиһапова бәяләде.
— Арча шәһәре бакчаларында юктан да кызыклы чаралар уйлап таба белгән, аларны минуты–сәгате белән оештыручы, махсус белемле, балалар өчен җан атучы музыка белгечләрен әйтеп үтәсе килә, — ди методист Гөлфирә Феоктистова. — Алар: апалы–сеңелле Вероника Капралова (1нче бакча) белән Лилия Харитонова (10нчы бакча), Йолдыз Абдуллина (2нче), Милена Мөхетдинова (4нче), Ләйлә Алиева (8нче бакча) һ.б.
Бүген дә музыка җитәкчеләре һәр баланың чыгышын яратып тыңлады, афәрин, “акыллым”, дия–дия, сабыйларның аркаларыннан сөеп үсендерде. Үзе бер җылы, дулкынландыргыч мохит. Кеше баласы өчен шулай җан атып торсыннар әле! Бакчада музыка белгече булу — үзе бәхет.
Арча педагогика көллиятендә музыка бүлеге җитәкчесе булып эшләгән Равилә Гатина да биредә иде.
—Сәләтле балалар бар, — ди ул. — Миңа бигрәк тә 10нчы бакчадан малайлар триосы (Данил Закиров, Искәндәр Хафизов, Искәндәр Сабиров) һәм 8нче бакчадан кызыллы–аклы матур күлмәктән Камилә Абдрахманова ошады. Бүген монда сәләтле балалар гына килгән. Аларның барысына да Мактау грамоталары һәм бүләкләр тапшырылды. Без аларны тагын да зуррак сәхнәләрдә күрербез әле.
Румия НАДРШИНА