Арча радиосына 10 яшь

Арча радиосына 10 яшь
Еллар дәвамында үзенең ышанычлы һәм тугры тыңлаучыларын булдырган, алар белән тыгыз элемтәдә торган, киңәшләрен биргән, очрашулар оештырган, уйнаган, җырлаган, табышмаклар чишкән Арча радиосы 10 еллык юбилеен район Мәдәният йорты сәхнәсендә йөзләгән тамашачылар алдында зур концерт белән билгеләп үтте.
Аны Татарстанның атказаган мәдәният хезмәткәре Расих Галимҗанов башкаруында 10 ел дәвамында яңгыраган “Арча радиосы” гимны (Фәнис Тимашев сүзләре, Илгиз Баязитов көе) ачты, “Арча” телерадиокомпаниясе” җитәкчесе Рамил Мөхетдинов һәм беренче көненнән алып бүгенгә кадәр иңне–иңгә куеп атлаган Рәзилә Зиннәтова башлап җибәрде.
103,6 FM дулкыны аша эфирга чыккан Арча радиосы 2003 елда район башлыгы Алмас Назиров инициативасы һәм ярдәме белән оеша. 2007 елда “ТАТМЕДИА” акционерлык җәмгыяте аны үз канаты астына ала. Тагын бер елдан телевидение дә эшли башлый һәм тапшырулар ТНВ каналы буенча трансляцияләнә.
—Бүген сезне һәр йортта көтеп алалар, күрше районнарда, хәтта Казанда да тыңлыйлар. Интернет өстенлек алган чорда үз тыңлаучыларыңны табу, аларның мәхәббәтен яулау, һичшиксез, мактауга лаек,—диде Арча муниципаль район башлыгы урынбасары Любовь Осина.
Район башкарма комитеты җитәкчесе урынбасары Надия Мифтахетдинова да коллективны туган көне белән котлады, киләчәктә дә һәр йортта көтеп алган 103,6 FM радиодулкыны булып калуларын теләде.
Юбилей кичәсендә Арча радиосы гына түгел, аның тынгы белмәс хезмәткәрләре дә бүләкләргә лаек булды. Рәзилә Зиннәтовага район башлыгының Рәхмәт хаты, баш редактор Гөлшат Моратова, диктор Гөлнара Ситдыйкова, юрист Гөлназ Газыймова, реклама белгече Альбина Галимова “ТАТМЕДИА” акционерлык җәмгыятенең Мактау грамоталары белән бүләкләнде.
Бу көнне Арча радиосында эшлә-гән һәркем үзенең хезмәтен тамашачы хөкеменә тәкъдим итте. Резеда Гарифуллина күпләр яратып өлгергән “Тормыш сукмаклары”ның чираттан тыш тапшыруына 55 ел тигез гомер иткән Фәүзия һәм Мәхмүт Сафиннарны чакырган иде. Альбина Галимова күп еллардан бирле тыгыз элемтәдә торып эшләгән иң актив реклама бирүче-ләрен билгеләп үтте. Гөлнара Ситдыйкова даими тыңлаучысы Зөлфия Галәветдинованы сәхнәгә чакырды. Айдар Вәлиев белән Лилия Фәйзрахманова табышмаклар әйтеп, тамашачылардан җавап алдылар. Эльмира Вафина белән Ленар Гыйлаҗев 10 еллык юбилей уңаеннан 10 рәттә, 10 урында утыручы тамашачыны бүләкләп китүне кирәк таптылар, Ленар тамашачылар белән кызыклы уен оештырды, соңыннан үзләренә яраткан җырын бүләк итте.
Арчалыларга танылырга өлгергән үзешчәннәребез “Татар моңы” бәйгесе лауреатлары Дамир Гасыймов, Рафил Җәләлиев, Зәлия Шәйхетдинова башкарган җырлар юбилей бүләге булып барып иреште. Арча радиосын котларга шулай ук танылган эстрада җырчылары Татарстанның атказанган артисты Рөстәм Закиров, Алсу һәм Азат Фазлыевлар, Нурзадә, Гүзәл Идрисова, Илназ Бах, ИлГәрәй, нәфис сүз остасы Әлфия Хәбибуллина, Ранил Гарипов та кайткан.
Юбилей кичәсе “Сәфәр” төркеме башкаруында Арча радиосының яңа гимны белән тәмамланды.
Гөлсинә ЗИННӘТОВА