Бәйрәмнәр имин үтсен

Бәйрәмнәр имин үтсен
Кышкы һава шартлары, температураның үзгәреп торуы, автомобиль юлларында бозлавыклар хасил булуы нәтиҗәсендә юл хәрәкәте куркынычсызлыгын тәэмин итү мөһим проблемаларның берсенә әверелә.
Хәер, кеше тормышы, язмышы белән бәйле бу мәсьәлә елның ел буена әһәмиятле урын алып тора. Чөнки юл һәла-кәтләренең артуы, бер мәгъ-нәсезгә кеше, аеруча балалар гомере өзелүе берәүне дә битараф калдырмый. Безнең Арча районы юлларында да бу елны аварияләр ешаеп китте. Еллык күрсәт-кечләр белән таныштыру өчен без ЮХИДИнең Арча бүлек-чәсе җитәкчесе вазыйфаларын башкаручы Илдар Нотфуллинга мөрәҗәгать иттек.
—Арча районы юлларында быел 69 юл һәлакәтендә 21 кеше һәлак булды, 94 кеше зыян күрде. Узган елның шушы чорында 52 авария булып, 8 кеше һәлак булган, 77се зыян күргән. Шушы һәлакәтләрнең 6сында балалар катнашкан һәм 2се һәлак булып, 6сы төрле авырлыктагы тән җәрәхәтләре алган. Узган ел 4 һәлакәттә 1 бала үлеп, 4се зыян күргән.
Каникуллар башлана. Бу вакытта балалар үзләрен иреккә чыккандай хис итә. Шуңа аларга карата аеруча игътибарлы булырга кирәк. 23 декабрьдән 10 гыйнварга кадәр дәвам итәчәк “Игътибар—балалар!” акциясе дә шуны күздә тота. Каникул көннәрендә транспорт чарасы белән идарә итүчеләргә Яңа ел чыршылары куелган, балалар күп уйный торган урыннарда аеруча сак булырга кирәк. ЮХИДИ идарәсенең Арча бүлекчәсе хезмәт-кәрләре тарафыннан да шушы чорда мәктәп яны лагерьларында профилактик чаралар, рейдлар оештырылачак.
—Юл һәлакәтләренең нинди төрләре еш очрый? Сәбәпләре нинди?
—Ел да кисәтеп, кабатлап торуга карамастан, һаман да шул бер урында “абыналар”. 25 очракта транспорт чаралары бәрелеште, аларда 12 кеше үлеп, 42се яраланды. Узган ел 24 очракта 3 кеше үлеп, 40ы төрле авырлыктагы тән җәрәхәтләре алган булган. 18 очракта транспорт чарасы әйләнгән һәм аларда 4 кеше һәлак булган, 27се тән җәрәхәте алган. 17 очракта җәяүлеләрне бәрдергәннәр. Анда да 5 кеше үлгән, 12 кеше зыян күргән.
Сәбәпләренә килгәндә, күпме кабатласак та, һаман да шул бер үк: кызу тизлек (23 һәлакәттә 7 кеше үлгән, 23е зыян күргән), исерек килеш руль артына утыру (19–5–21), тыкрыкларда юл хәрәкәте кагыйдәләрен бозу (8–3–12).
Быел район юлларында булган 999 юл–транспорт һәлакәтендә машиналарга зыян килде, 7317 (узган ел шушы чорда 4869 иде) юл хәрәкәте кагыйдәләрен бозу очраклары теркәлде. Казан–Малмыж юлының иң күп юл–транспорт һәлакәтләре була торган урыннарына 6 автоматик видеофиксация приборлары куела. Алар ярдәмендә тизлек режимын бозган 55321 очрак (узган ел 47238) билгеле булды.
—Профилактик максатта нинди чаралар үткәрелә?
— Юл хәрәкәте кагыйдәләренә балачактан өйрәтергә кирәк. Шул исәптән балалар бакчаларында, мәктәпләрдә төрле чаралар оештырыла, аларда ЮХИДИ хезмәткәр-ләре дә катнаша. Даими рәвештә көндезге һәм төнге рейдлар үткәрүне, транспорт белән идарә итүчеләрне атна саен массакүләм тикшерүне гадәткә керттек.
Форсаттан файдаланып, кышын балык тотарга яратучылар өчен дә киңәшләремне бирәсем килә. Машиналар, кар чаналары белән боз өстенә кермәгез. Аның тормышыгыз өчен аянычлы тәмамлануы бар. Җәяү, чаңгыда булганда да, саклык чаралары турында онытмагыз. Саклык бервакытта да зыян итми. Бәйрәмнәрегез тыныч һәм имин үтсен!
Гөлсинә ЗӘКИЕВА