Яши, яшәрә Алан

Яши, яшәрә Алан
Алан авылы урамнарында кар күп. “Монда башка авылларга караганда кар ел да күбрәк була, — ди “Курса МТСы” ширкәте җитәкчесе Рәүф Гыйлаҗетдинов. — Авылның үзенчәлекле яклары бу гына түгел”.
Муниципаль район башлыгы Алмас Назиров та: “Район үзәгеннән ераграк киткән саен халык тырышрак”, — ди. Моңа бик күп мисаллар китерергә мөмкин.
Узган гасырның утызынчы елларында барлыкка килгән авыллардан Алан гына гөрләтеп яши. 1928 елда басуларга йөреп эшләргә ерак дип, Югары Курсадан берничә гаиләнең күчеп урнашуыннан башлана аның тарихы.
— Ялкау кеше каядыр күченеп йөрми инде ул, — дим хуҗалык җитәкчесенә. — Алан халкының бердәмлеге, булдыклылыгының сәбәбе дә шундадыр.
— Югары Курса үзе дә ныклыгын югалтмады, — ди Рәүф Гыйлаҗетдинов. — Кешесе дә күп, иң күп терлекне шул авылда асрыйлар.
Узган ел өч Курсаны асфальт юл тоташтырды. Аланга цивилизация рәхәт-лекләре соңрак килә. Тимер юл аръягында яшәүнең үз кыенлыклары бар. Электр уты да соң гына килде аларга. Балалар Югары Курсадагы мәктәпкә йөреп укыды. Ике укучы кызның поездга тапталып үлүе зур фаҗига булган иде. Ике яклап килүче составларның берсен үткәреп җибәргәннәр, икенчесен күрми калганнар...
Аланлыларның үз авылларын ничек яратуларын күреп сокланасың. Нинди генә авырлыклар кичерергә туры килсә дә, “җәһәннәм почмагы”на килеп урнашкан әби–бабаларын сүгеп йөрмәде, кул селтәп ташлап китмәде алар. Бүген инде газлары да, утлары да, мәктәп, клублары, хәтта медпунктлары да бар. Һәр ел үз Сабантуйларын үткәрәләр, спорт ярышларында, башка чараларда аланлылар да алда булыр.
— Соңгы ике елда алты егет авылда калды, — дип куана җитәкче. — Минзанур Шакиров яшь гаиләләр программасы буенча яңа йорт торгызды. Тагын ике кеше чиратта тора.
Минзанурның әтисе Марат хуҗалыкның алдынгы тракторчысы булды, хәзер бригадир. Улы да хезмәт юлын механизатордан башлады, хәзер баш инженер. “Үсә егет”, — ди җитәкче. Маратның икенче улы Салават та механизатор, кышын терлекләр карый.
Раил Нәҗмиевның әтисе Рафаэль “КамАЗ”да эшли, улына да шундый ук машина биргәннәр. Бер гаиләдә ике “КамАЗ”!
Алдынгы тракторчы Әхәт Шәрәфиевның улы Рәискә “МТЗ–1221” тракторы биргәннәр.
Ирек Гыйбадуллин “МТЗ–82”дә эшли. Әтисе ферма мөдире, әнисе сыер савучы.
Динар Шакиров та “МТЗ–82” тракторында. Әтисе механизатор, әнисе терлекче.
— Егетләр клубта үткәрелә торган чараларда да актив катнаша, — ди мөдир Рәсим Низамов.
— Аларга бернәрсә дә кызганыч түгел, — ди Рәүф Гыйлаҗетдинов. — Яңа ел алдыннан теннис өстәле алып бирдек үзләренә.
Ильяс ФӘТТАХОВ