Яңа елны яңа фатирда

Яңа елны яңа фатирда
Яхшы хәтеремдә, 2005 ел башында сәнгать мәктәбенә халыкны җыеп, социаль ипотека турында аңлаттылар. Бу яңалыкка шикләнеп караучылар күп булды. Ай–һай, озак вакытка кредитка фатир алып, гомерлек кабалага төшү түгелме икән бу?!
Ул вакытта Арчада яшәп тә, теләсә каян фатир алу мөмкинлеге бар иде. Кайберәүләр Казаннан фатир алып отты. Бүген инде социаль ипотекага фатирны бары тик теркәлгән яшәү урыны буенча гына алып була. Тора–бара халык бу программага ышанды.
Районда социаль ипотека йортлары күз алдында калкып чыга. Алар төзелешен хәйраннар калып күзәтәбез. Арчада почта каршында төзелгән бик матур 5 катлы бинаның да, нәрсә булыр икән бу, дип төзелеп беткәнен көттек. Архитектура ягыннан Арчаны бизәп торучы әлеге йорт социаль ипотеканыкы булып чыкты.
— Арча төбәкара вәкиллегенә кергән алты район арасында Арча районы социаль ипотека программасы буенча йортны иң күп төзүче, — ди “Татарстан Республикасы Президенты каршындагы дәүләт торак фонды” Арча төбәкара вәкиллеге җитәкчесе Ленар Закиров. — Район башлыгы Алмас Назиров әлеге программаның үтәлешенә бик зур игътибар бирә. Узган ел шундый 10 йорт төзелеп, файдалануга тапшырылды. Арчаның Көнбатыш өлешендә тезелеп киткән әлеге социаль ипотека йорт-ларын “Арча МСОсы” (җитәк-чесе Зиннур Гарифуллин), “Икстрой” (Илдар Зиннәтуллин), “Строй–Мастер” (Рамил Шәңгәрәев), “Энергосервис” (Рамил Әхмәтгалиев) ширкәтләре төзеде. 12шәр фатирлы, 3әр катлы йортлар алар. Пушкин урамындагы 30нчы йортны “Энергосервис” ширкәте төзүчеләре эшләде. Интернационал урамындагы 5нче йортны казанлылар күтәрде.
2005 елдан барысы 70 йорт төзелеп, файдалануга тапшырылган. 1200 гаилә фатирлы булган. Узган ел 192 гаилә фатир алган. 184е чиратта тора.
—Быел тагын 200гә якын гаилә фатирлы булыр дип көтелә, — ди Ленар Закиров.
Социаль ипотекага фатир алуның өстенлекле ягы шунда — фатир озак вакытка аз процентлы (7 процент) кредитка бирелә. Аны, нигездә, бюджет ситемасында эшләүчеләр ала. Торак мәйданының һәр гаилә әгъзасына 18 квадрат метрдан артмавы шулай ук социаль ипотекага фатир алу өчен төп шарт булып тора.
...Пушкин урамы Арчаның иң тыныч урамнарының берсе. Камалиевлар гаиләсе шушы урамнан (30 йорт) өч бүлмәле фатир алуларына сөенеп бетә алмый.
— Яңа ел алдыннан гына әти–әниләрне, туганнарны җыеп өй туе уздырдык, бик күңелле булды, — дип куанып сөйли Ләйсән Камалиева.
— 13 квадрат метрлы тулай торак бүлмәсендә яшәгәннән соң мондый иркен яңа фатирга күчү үзе бер бәхет инде ул, — ди Рафис Камалиев. — Моңарчы Казанда яшәдек. Туган ягыбыз Арчага кайтырга булдык. Өч малай үстек без.
Гади хезмәт кешесенең һәр баласы өчен йорт салырга, фатир сатып алырга мөмкинлеге юк. Балаларының яңа фатирлы булуы ул ата–ана өчен дә куаныч.
Социаль ипотекага фатир алу өчен, килешү төзеп, исәпкә басканнан соң туган һәр балага республика бюджетыннан 200 мең сум күчерелә. Моңа өстәп ана капиталын да файдаланырга була. Камалиевларның икенче балалары тууы үзе белән әнә шундый уңыш та алып килә.
Рафис транспорт полициясендә эшли, Ләйсән һөнәре буенча шәфкать туташы.
... Арчаның бәхетле яшь гаиләләре Яңа елны яңа фатирда каршылады. Инде менә төзеләсе җиде йорттан тагын 30 гаилә, конкурста отып, фатир алу хокукына ия булды.
Румия НАДРШИНА