Журналистлар белән очрашу

Журналистлар белән очрашу
11 гыйнварда Татарстан Республикасы Дәүләт Советы Рәисе Фәрит Мөхәммәтшин район һәм республика газета–журналларында спорт темасын яктыртучы журналистлар белән очрашты.
Дәүләт Советындагы музей белән танышканнан соң, каләм ияләре парламент Рәисенең сәламәт яшәү рәвешенә багышланган чыгышын тыңлап, үзләрен борчыган сорауларга җавап алды.
Соңыннан журналистлар “Санкт–Петербург” волейбол үзәгендә булып, “Зенит” — “Ярославич” һәм “Динамо” — “Уралочка” волейбол матчларын карады.
Фәрит Мөхәммәтшин, үзе дә ТР волейбол федерациясе Президенты буларак, шәһәр һәм районнарда әлеге спорт төренә игътибаргы арттырырга кирәклеген искәртте.
Волейбол дигәннән, ул күп чыгымнар таләп итми торган спорт төрләренең берсе булып санала. Узган гасырның 80–90 елларында авыл яшьләре арасында бик популяр иде (чөнки ул елларда багынып утырырга компьютерлар юк). Ләкин бүген дә яшьләр арасында әлеге спорт төрен үз итүчеләр юк түгел. Иң шатлыклысы — соңгы өч елда урта һөнәри белем бирү йортлары арасында районның кызлар командасы беренчелекне бирми, егетләр дә гел призлы урыннар яулый.
Мәктәп укучыларыннан башлап, урта (арада хәтта өлкәннәр дә бар) яшьтәге оешма, учреждение җитәкчеләре дә волейбол уйный бездә. Педагогика көллиятендә, “Олимп” спорт мәктәбендә әлеге спорт төре буенча махсус түгәрәкләр эшләсә, җитәкчеләрнең оста уйнавын җәйге һәм кышкы “Сәламәтлек” спартакиадасы кысаларындагы ярышларда күзәтергә мөмкин. “Алар шулай ук Укучылар сараеның спорт залында да шөгыльләнә”, — ди район яшьләр эшләре, спорт һәм туризм бүлеге җитәкчесе Зиннур Сәгыйтов. Күптән түгел республика күләмендә муниципаль хезмәткәрләр арасында уза торган ярышларда катнашып, 4нче урынга лаек булганнар.
Зиннур Сәгыйтов яшьләрне волейболга тарту буенча бар күңелен биреп эшләүче тренерлар турында горурланып сөйли. Арча педагогика көллиятеннән Мөдәрис Гарипов, Яңа Кенәр лицееннан Тәлгать Әхмәтов, Курса–Почмак мәктәбеннән Алмаз Зәйнетдинов, “Арча” спорт комплексыннан Нияз Гатауллин әнә шундыйлар рәтендә. Алар мәктәбендә тәрбияләнгән волейболчылар үзләре дә киләчәктә шәкертләренең юл күрсәтүче остазлары булыр, дип өметләнә җитәкче.
Розалия ЗИННӘТОВА