Полиция хезмәткәрләре һәрчак уяу

Полиция хезмәткәрләре һәрчак уяу
Хокук бозулар һәм җинаятьләрне профилактикалау максатыннан Россия Эчке эшләр министрлыгының Арча районы буенча эчке эшләр бүлеге хезмәткәрләре җәмәгатьчелек тәртибен саклау буенча даими рәвештә рейдлар үткәрә. Узган шимбәдә шундый рейдларның берсендә безгә дә катнашырга туры килде.
Сәяхәтебез Күпербаш авылы мәдәният йортыннан башланды. Биредә ял көннәрендә төнге 11 сәгатькә кадәр дискотека була.
—Бу бию кичәләре безнең инициатива белән оештырыла,—ди мәдәният йорты җитәкчесе Миләүшә Вәлиева.— Хәзер безгә дискотекага якын–тирә авыллардан, Арчадан да киләләр.
—Яшьләрне тәртипсез дип әйтергә теләмим, шулай да кеше күп җыелган җирдә төрле хәлләр була. Тәртип ягы ничек?
—Полиция хезмәткәрләренең дежур торуы безнең өчен зур терәк. Спиртлы эчемлекләр белән, шулай ук 18 яше тулмаганнарны кичке 10 сәгатьтән соң мәдәният йортына кертмибез,—ди Миләүшә Вәлиева.
Бу хакта законнарны аңлатып ишеккә дә язып куелган. Шулай ук тәмәке тартучылар өчен махсус урын билгеләнгән. Җәмәгать урыннарында тәмәке тартырга ярамаганлыгын яшьләр дә аңлый башлаган.
—Шулай да төрле хәлләр була. Егет белән кыз парлашып килеп, соңыннан матур гына кайтып китсә, ярар иде дә. Спиртлы эчемлекләр кулланганнары да очрый, кичке сәгать 10 соң чыгарга яраткан балигъ булмаган яшүсмерләр дә бар. Аларны тоткарласак, беркетмә төзү өчен, Арча эчке эшләр бүлегенең балигъ булмаганнар белән эшләү бүлеге өлкән инспекторы Алсу Һидиятуллина янына алып киләбез,—ди шул көнне дежурда булган полиция хезмәткәре Ранил Шәмсетдинов.
—“Колос” мәдәният йортында да дискотека тыныч үтте. 18 яше тулмаганнар 10 тулганчы кайтып китте,—диде Алсу Һидиятуллина.
Ул көнне Арча эчке эшләр бүлегенең ЮХИДИ бүлек-чәсе хезмәткәрләре дә төнге рейдка чыккан иде. Алар белән без Арча — Наласа арасындагы юлда очраштык. “УАЗ” буханка машинасы юл кырыена төшеп киткән. “КамАЗ” белән аны өстерәтеп чыгарганчы, эвакуатор килеп, соңыннан “УАЗ”ны аңа төягәнче, беркетмә төзегәнче юл–патруль хезмәте хезмәткәрләренә хәйран тоткарланырга туры килде. Исерек килеш руль артына утырып юлга чыккан машина хуҗасы Ф.да аларга тынгылык бирмәде.
—Нәрсә булган соң монда шулкадәр? Трагедия ясадыгыз. Минем хатыным зур табиб. Сез дә килерсез әле минем ишек төбемә. Менә шунда күрербез,—дип янады Ф., машинасын үзенә бирергә теләмәгән полиция хезмәткәрләренә.
Нәкъ менә полиция хезмәткәрләре тоткарлавы нәтиҗәсендә аянычлырак хәвеф–хәтәр булмый калуын ул һич аңларга теләмәде. ЮХИДИ бүлекчәсе инспекторы Нияз Бариев аның белән тыныч кына сөйләште, аңлатты, алай гына да түгел, машина туктатып, шуңа утыртып та җи-бәрде. Исерек килеш юлга чыкканы өчен зур күләмдә штраф түлисен һәм правасыз калачагын ул айныгач кына аңлаячак. Сабак булса ярый ла.
Яңасала авылында полиция туктаткан “ВАЗ–2112” машинасын йөртүче Д. аңа караганда да катырак исерек иде. Үзе кебек үк яшь һәм исерек ике егетне утырт-кан да, геройланып урам әйләнергә чыккан. Бәхетенә ерак китә алмаган. Югыйсә, бу сәяхәте, белмим, ничек тәмамланган булыр иде. Ул да: “Мин исерек түгел, нигә бәйләнәсез. Сезнең хакыгыз юк”,—дип, үзенең аек булуын исбатларга тырышты.
—Җәмәгать урынында (клуб янында) исерек килеш йөргән өчен аның ике дусты Административ хокук бозулар кодексының 20.21 маддәсе нигезендә штрафка тартылды, ә Д.ның машинасы штрафстоянкага озатылды. Аңа да хәзер суд карары нигезендә 30 мең сум штраф түләргә һәм правасыз калырга туры килә-чәк,—ди полиция хезмәткәре Фәнил Гайнетдинов.
Бу көнне барлыгы 35 административ беркетмә төзелде. Алкогольле эчемлек кулланган килеш җәмәгать урынында пәйда булган өчен тагын ике егеткә 500 сум штраф түләргә туры киләчәк. Ә шәһәр үзәгендә, ягъни, рөхсәт ителмәгән урында салют кулланганы өчен бер кеше 2000 сум күләмендә штрафка тартылды. 30 очрак юл хәрәкәте куркынычсызлыгы кагыйдәләрен бозган транспорт белән идарә итүчеләргә кагыла. Сәбәпләре һаман бер—куркынычсызлык каешын куймыйча, балалар өчен махсус җайланманы кулланмыйча йөрү, тиешсез урында узарга чыгу, укылмый торган номерлар һәм башкалар.
Соңыннан Россия Эчке эшләр министрлыгының Арча районы буенча эчке эшләр бүлеге җитәкчесе урынбасары (җәмәгать тәртибен саклау буенча), полиция подполковнигы Ленар Минһаҗев рейдка нәтиҗә ясады.
Гөлсинә ЗӘКИЕВА