Бәйге дәвам итә

Бәйге дәвам итә
Узган ел укучылар арасында оештырылган һәм Татарстан Республикасы дәүләт һәм муниципаль хезмәтләр порталын куллануны популярлаштыруга юнәлдерелгән “IT–чемпион” республика бәйгесендә Арча районыннан алты меңнән артык укучы катнашты.
Республика буенча бәйгедә катнашырга 253 меңнән артык укучы теркәлде, алар өлкәннәргә дәүләт хезмәтләре порталында үз шәхси кабинетларын ачарга һәм шуның аркылы коммуналь хезмәтләр өчен, штрафлар түләргә, түләүләр, салымнар буенча бурычларын белергә, балалар бакчаларына нинди чиратта торуларын ачыкларга, табибка кабул итүгә язылырга булышты. Мәктәп укучылары ярдәме белән теркәлгән шәхси кабинетлар саны 900 меңнән артып китте, Татарстанда күрсәтелүче электрон хезмәтләр саны айга 60 процент-ка артты һәм, иң мөһиме, бу халык өчен уңайлы гына түгел, ә ай саен 850 мең сәгатьтән артык вакытларын янга калдырырга ярдәм итте. Чиратларда торуга нәкъ шуның кадәр вакыт сарыф ителгән булыр иде.
“IT–чемпион” бәйгесе өч этапта үткәрелде. Беренче этапның нәтиҗәләре май ахырында билгеле булган иде, икенче этапныкы — сентябрь ахырында, өченче этапныкы декабрь ахырында ачыкланды. Бәйгенең өченче этабында 154 катнашучы җиңүче дип табылды һәм iPadлар белән бүләкләнде. Аларның өчесе Арча районыннан. Менә алар — 1нче мәктәпнең V сыйныф укучысы Илдан Фәйзуллин, 7нче мәктәпнең VI сыйныф укучысы Дамир Сафиуллин һәм 1нче мәктәпнең V сыйныф укучысы Зәлия Вәлиева. Бу номинациядә катнашучыларга өлкәннәр дәүләт хезмәтләре порталындагы шәхси кабинет аша үткәргән һәр түләү өчен һәр мәктәп укучысына бирелгән логин күрсәтелгән очракта баллар бирелеп барды.
Шулай ук ел ахырында “Дәүләт һәм муниципаль хезмәтләр порталын үстерү” иҗади номинациясенең дә җиңүчеләре билгеле булды. Укучыларның эшләре берничә категориядә бәяләнде: “Электрон хезмәтләр өчен иң яхшы баннер яки логотип”, “Иң яхшы видеоролик”, “Иң яхшы презентация”, “OC Android өчен иң яхшы мобиль кушымта”, “Интернет–браузерлар тота торган иң яхшы Интернет–кушымта”. Иҗади номинациягә барлыгы 298 эш кабул ителеп, шуның 14е жюри тарафыннан иң яхшылары дип табылды. Җиңүчеләр шулай ук iPadлар белән бүләкләнде. 2013 елда “IT–чемпион” бәйгесе 474 иң актив катнашучыга iPad планшетлары алырга мөмкинлек бирде. Әмма бу әле моның белән генә чикләнмәде: “IT–чемпион” бәйгесенең партнерлары да иң актив катнашучыларга, шулай ук MasterCard, Maestro банк карталары аша иң күп түләүләр башкарган өлкәннәргә дә үзләренең бүләкләрен тапшырды. Бу— Париж Диснейландына өч кешелек сәяхәткә, гаилә сәяхәтенә, Казанда инглиз теле мәктәбендә белем алуга сертификатлар, спорт велосипедлары комплекты, OZON.ru Интернет–кибетенең сертификатлары һәм башка призлар. Теләге булган һәр укучы ел ахырына кадәр җыелган балларны призларга алыштыра алды.
ТР Хөкүмәте башлыгы Илдар Халиков әйткәнчә, проект барлык көтелгән нәтиҗәләрне узып китте һәм бу балаларның гына түгел, ә укытучыларның, директорларның, мәгариф идарәләре җитәкчеләренең дә хезмәте. Республика Премьер–министры, республика Президенты карары белән “IT–чемпион” бәйгесенең 2014 елда да дәвам итәчәген билгеләп үтте. Шулай булгач, укучылар, катнашыгыз һәм җиңегез!
Гөлназ ГЫЙНИАТУЛЛИНА

— Ильяр белән без игезәкләр. “IT–чемпион” бәйгесе турында электрон көндәлектән белдек, мәктәптә дә аның турында сөйләделәр. Киңәшләшеп, бәйгедә катнашырга уйладык. Әти–әни, туганнар, дуслар да безне хуплады. Дәүләт хезмәтләре порталы турында белүчеләре дә бар, алар аның аша коммуналь хезмәтләр өчен түлиләр. Ләкин алар арасында бу хакта ишетмәүчеләр дә күп иде. Аның өстенлекләрен аңлаттык. Планшет күптәнге хыялыбыз, шуңа күрә җиң сызганып эшкә керештек. Май аенда Ильяр беренче урынга чыкты һәм күптән көткән бүләк —iPad иясе булды. Сөенеп туя алмадык. Хыялны тормышка ашырып була икән! Менә — бүген мин дә җиңүче!