Контракт буенча эшкә чакырабыз

Контракт буенча эшкә чакырабыз
Татарстан Республикасы хәрби комиссариатының Арча һәм Әтнә районнары буенча бүлеге ир–егетләрне контракт буенча эшкә чакыра.
— Ир–егетләрнең төрлесе бар, — дип сөйли бүлек җитәкчесе, подполковник Алмаз Борһанов. — Эчеп, эшләмичә, өйләнмичә әти–әни җилкәсендә көн итүчеләре дә юк түгел. Шактые — төзелештә шабашкада. Анысы да эш булганда гына. Ә гаиләне алып барасы, балаларны үстерәсе бар. Кайберәүләр фатир юклыктан интегә. Чарасызлыктан аптырап көн үткәргәнче, хәрби контракт буенча эшкә китәргә кирәк. Эчүеңне дә ташлыйсың, тәртипкә дә өйрәнәсең. Әти–әни, гаилә, балалар, туган җир, Ватан алдында җаваплылык хисләре тәрбияләнә.
Чыннан да, һөнәрең, даими эш урының булмыйча, адашкан каз шикелле үз юлыңны тапмыйча гомернең үтеп тә китүе бик ихтимал. Андый очраклар бар. Тормышның иртә язында ук контракт буенча эшкә китүең хәерлерәк түгелме икән?! Дөрес, һөнәр алып, тормышта үз урыннарын тапканнар да күп.
Контракт буенча эшкә китүчеләрне мин тәвәккәл ир–егетләр, дияр идем. Җылы өеңнән, әни пешергән ризыктан аерылып чыгып китүе әллә җиңелме?! Әмма “җылы мич башында” кем дә яши, ә менә син читләргә китеп кара.
Узган ел районнан 31 ир–егет контракт буенча эшкә алынган. Быел да шул чама булыр, дип көтелә. Егетләрне тупларга Татарстан Республикасы хәрби комиссариатыннан Рифат Габделбәров кайткан.
—Мин үзем Арчадан, — дип сөйли Рифат. — Узган елның декабреннән контракт буенча өч елга эшкә алындым. Һөнәрем буенча югары белемле укытучы. Татарстан Республикасы хәрби комиссариатында эшлим. 23 мең сум хезмәт хакы алам. Моннан тыш, өстәп түләүләр дә булачак. Фатир алырга тупланма ипотека системасына исәпкә бастым. Иң мөһиме — даими эш урыным бар, хезмәт хакы әйбәт, фатир да булачак. Без үзебез дүрт бала, өчебез малай. Энекәш тә контракт буенча эштә. Ул Ерак Көнчыгышта 10 ел хезмәт итә инде. Шунда гаилә корды.
— Узган елның ноябрендә Арчадан Артем Бохаров Таҗикстанга контракт буенча эшкә китте, — дип сөйли хәрби комиссариатта гражданнарны контракт буенча эшкә җыю буенча җаваплы Илмира Шәкүрова. — Телефоннан шалтыратып хәлен белдем. Артем үзенең хезмәтеннән канәгать. Югары уку йортына керергә уйлый. Анда бер ел эшләү өч елга тиң. Пособие һәм оклад икеләтә арттырып түләнә. Хезмәт хакы 40 мең сумнан башлана. Чираттагы ялны алганда юл чыгымнары каплана, ике оклад күләмендә матди ярдәм бирелә. Шифаханә–курортта дәвалану шулай ук компенсацияләнә. Бер уңайдан шуны да әйтеп үтим, Севастопольдә һәм Төньяк Кавказда бер ел хезмәт итү ел ярымга тиң.
— Ир–егетләр үзләре теләгән урынга, хәтта үзе хезмәт иткән частька контракт буенча эшкә бара ала, —ди Алмаз Борһанов. —Беренче контракт өч елга төзелә, икенчесе — 5 елга. Контракт буенча 20 ел эшләүчеләр хәрби пенсиягә чыга. Пенсия-ләре начар түгел. Авырулар һәм хөкем ителгәннәр контракт буенча эшкә алынмый. Бүген безнең егетләр Алания, Кабардино–Балкария, Чечня, Таҗикстан Республикаларында, Украинада (Кырым, Севастополь шәһәре), Ульяновск, Чиләбе, Мәскәү өлкәләрендә, Мари Илендә, Удмуртия, Самара, Казанда эшли. Беренче контракт буенча эшләгәннән соң, икенче контрактны төзегән ир–егетләргә Россия Федерациясе Оборона министрлыгы тарафыннан фатир алу өчен 3 млн. сум акча бирелә. Фатирны теләсә кайсы шәһәрдән алырга мөмкин. Хезмәт хакы 23–25 мең сумнан башлап, өстәмәләр белән 35–40 мең сумга җитә. Өйләнмәгән егетләр тулай торак белән тәэмин ителә. Шулай ук вакытлыча фатирда да яшәргә була. Фатирга түләү өчен бер айга 3мең 600 сум акча каралган. Берничә егет бергә фатирга кереп торырга да мөмкин. Гаилә белән килүчеләргә фатир бирелә. 4 кешелек гаилә ай саен фатирга түләү өчен 5 мең 400 сум акча ала. Балалар бакча, мәктәп белән тәэмин ителәчәк. Бакчага түләү өчен ташламалар бар. Шулай ук ир–егетләр читтән торып югары уку йортында белемнәрен күтәрә ала. Ни өчен армиягә эшкә ир–егетләр кирәк, дигән сорау туарга мөмкин. Чөнки хәзер солдатларга хәрби хезмәт бер генә ел каралган, икенчедән, армиягә әзерлекле белгечләр кирәк. Контракт буенча ир–егетләр элемтәче, машина йөртүче, пулеметчы һ.б булып хезмәт итә. Армиядә кем булып хезмәт иткән — шул һөнәр буенча эшлиләр. Контракт буенча эшләргә теләге булганнарны (40 яшькә кадәр) хәрби комиссариатка чакырабыз.
Румия САТТАРОВА