11 тәүлеккә арестка алынды

11 тәүлеккә арестка алынды
Үткән сишәмбедә җәмәгать судьясы Гүзәлия Гыйльмуллина рәислегендә узган утырышта юл–транспорт кагыйдәләрен бозган өчен вакытында штраф түләмәүчеләрнең (өчәү) эше каралды. Дүртенчесе — спиртлы эчемлек кулланган хәлдә, янында транспорт йөртү таныклыгы булмаган килеш руль артына утырып, икенче машина белән бәрелешеп, юл һәлакәте китереп чыгару нәтиҗәсендә кузгатылган административ эш.
Юл–транспорт кагыйдәләрен бозучылар штрафны вакытында түләмәүләрен “онытылган” дип аңлаттылар. ЮХИДИ бүлекчәсе мәгълүматларына караганда, районда узган ел барысы 65 мең 611 юл–транспорт кагыйдәләрен бозу очраклары теркәлгән, шуның 57 мең 826 очрагын фото–видео–фиксация төшереп алган, калган 7 мең 785е ЮХИДИ хезмәткәрләре тарафыннан билгеле булган. Бүген сүзебез әнә шул ЮХИДИ хезмәткәрләре тарафыннан теркәлгән очраклар турында барыр.
— Гаебемне таныйм, — ди Арчада яшәүче Рәнис (фамилиясен язмауны үтенде). —Тизлекне арттырмаска кирәген дә беләм, әмма бу кагыйдәне үтәп җиткермибез шул. Гомумән алганда, машина йөртүчеләрнең бер–берсенә һәм җәяүлеләргә карата хөрмәте юк. Юл бирәселәре килми, каядыр ашыгалар, очалар. Уңга яки сулга борыласы булса, алдан искәртмиләр.
Вакытында штраф түләмәгән өчен административ җаваплылыкка тартылган өч машина йөртүчегә дә 1әр мең сум штраф салынды, моннан тыш алар ЮХИДИ карары нигезендә билгеләнгән штрафны да түләргә тиеш.
—Узган ел шундый юл–транспорт кагыйдәләрен бозган өчен штраф түләмәгән гражданнарга карата 132 эш керде, — дип сөйли җәмәгать судья-сы Марат Камаев. — Вакытында штраф түләмәү-челәргә Россия Федерациясе Административ хокук бозулар турындагы кодексының 20.25нче маддәсе 1нче бүлеге нигезендә икеләтә штраф яки кимендә 1 мең сум штраф салына, яки аларны 15 тәүлеккә кадәр административ арестка алалар, яки 50 сәгатькә кадәр мәҗбүри эшкә тарталар.
— РФнең Административ хокук бозулар турындагы кодексның 32.2нче маддәсе 1нче бүлеге нигезендә штраф салу карары үз көченә кергән көннән штраф 60 көн эчендә түләнергә тиеш, — дип аңлата ЮХИДИ бүлекчәсе җитәкчесе вазыйфаларын башкаручы Илдар Нотфуллин. — Карар белән риза булмаучылар 10 көн эчендә дәгъва белдерә ала. Шулай итеп, штраф түләмәгән өчен җаваплылык карар чыкканның 71нче көнендә гамәлгә керә. Вакытында түлән-мәгән штрафлар күләме 21 млн. сумнан артык. Аларны суд приставлары, җәмәгать судьялары тарафыннан җыеп аласы бар.
Судта каралган дүртенче эш катлаулырак. 47 яшьлек А.Әгъзамов үзенең гамәлләрен болай дип аңлата:
— Алдагы көнне туган көндә булган идем. Шунда эчелгәннәр чыгып бетмәде. Кыз кайтасы иде. Машина комачауламасын дип, аны кертеп куярга руль артына утырдым. Күз ачып йомганчы икенче машина килеп житеп чәкәләштек. Шуннан ЮХИДИ хезмәткәрләре килеп җитте.
А.Әгъзамов алкогольле эчемлек дәрәҗәсен ачыклау өчен медицина тикшерүеннән баш тарта. Җитмәсә, янында машина йөртү таныклыгы да булмый. А.Әгъзамов, суд карары нигезендә, РФнең Административ хокук бозулар турындагы кодексының 12.26 маддәсе 2нче бүлегендә каралганча, транспорт йөртү таныклыгыннан башка руль артына утырганы һәм спиртлы эчемлек кабул итү дәрәҗәсен билгеләү максатыннан медицина тикшерүеннән баш тартканы өчен 11 тәүлеккә арестка алынды.
— А.Әгъзамов, сәламәтлеге буенча арестка алырлык хәлдә булмаса (1, 2нче төркемдәге инвалидлар), 12.26 маддәнең 2нче бүлеге нигезендә 30 мең сумга штрафка тартылган булыр иде, — ди җәмәгать судьясы Гүзәлия Гыйльмуллина.
— 25 ел машина йөртеп, мондый хәлнең булганы юк иде, — ди А.Әгъзамов.
— Сабак алдыгызмы? — дип сорыйм.
— Бәйрәм итә белмибез.., — дип җавап бирде ул. Икенче көнгә зыяны калмаслык итеп эчә белергә кирәк, дип киңәш итүе иде аның.
Румия НАДРШИНА