Яхшылыкны үлчәп эшләмиләр

Яхшылыкны үлчәп эшләмиләр
Белеме буенча математик, энергетика өлкәсен җитәкли, Арчаның кайсы почмагына барма, берсеннән–берсе матур, затлы йортлар төзи. Чын мәгънәсендә талантлы кеше. Заман таләбе белән генә йөрми, йөрәге кушканны күңел биреп эшли. Бу сүзләр эшчәнлеген төрле юнәлештә җәелдереп, һәркайсында югары үрләр яулауга ирешүче “Энергосервис” ширкәте җитәкчесе Рамил Әхмәтгалиев турында.
Моннан тыш, ул тыйнаклыгы белән дә сокландыра. Күп сөйләшми, мактанырга һәм мактаганны яратмый, башлаган эшен бервакытта да ярты юлда калдырмый, алдына максат куеп эшли һәм шуңа ирешмичә туктамый. Изге гамәлләре белән дә районда таныш Рамил Әхмәтгалиев. Тик ул хакта сөйләүне генә кирәк тапмый.
—Яхшылыкны үлчәп эшләмиләр һәм биргән сәдака турында мактанып сөйләп тә йөрмиләр. Мин Аллаһы Тәгалә ризалыгы өчен дип, күңел биреп ярдәм итәм. Адәм баласы ярдәм сорап килгән һәркем өчен кулыннан килгәнне эшләргә тиеш,—ди ул.
Әмма изгелек җирдә ятмый. Үзе сөйләмәсә, ул кеше теленә керә. Ә кешенең бер рәхмәте мең бәладән коткара. Шәһәрнең Көнбатыш өлешендәге мәчеткә дә аның хезмәте керде.
—Мәчетне ут белән тәэмин итүне тулысынча ул башкарды. Азан әйтү өчен аппаратуралар урнаштырды. Кич белән мәчет яныннан үткәнегез булса, игътибар итми калмагансыздыр, яшел утлар белән әллә каян күренеп, матур булып күзгә ташланып тора. Манараны һәм мәчетнең тирә–юнен яшел диодлы яктырткычлар белән әйләндереп алу да Рамил Әхмәтгалиев җитәкләгән оешма хезмәте,—ди Рәмис хәзрәт.
Янгыннан соң ярдәм сорап килүчеләр булса да, берсен дә кире бормый, яңа төзелешләренә ут кертүдә булыша. Башка очракларда да берәүне дә ярдәмсез калдырмый. Ширкәттә 9 пенсионер бар. Аларга да җитәкче олылап, ихтирам белән карый, бәйрәмнәрдә зурлый, кулыннан килгәнчә булышырга, хезмәткәрләренә дә һәрчак һәм һәрдаим ярдәм итәргә тырыша.
Изгелек кеше күңеленә балачактан кереп урнашадыр, дип саныйм. Монда ата–ана тәрбиясе дә зур роль уйный. Рамил Әхмәтгалиев үзе Казанбаш авылыннан. Әтисе Зиннур гади колхозчы булган, хәзер лаеклы ялда. 77 яшьтә булса да тик ятмый, умартачылык белән шөгыльләнә, мәчеткә йөри. Әнисе Ания пенсиядәге укытучы, хәзер дин юлында, биш вакыт намазын калдырмый.
—Без гаиләдә ике малай, ике кыз үстек. Әни кечкенәдән бисмиллалы булырга, әти үз көчең, намуслы хезмәтең белән эшләп табарга өйрәтте. “Хәрәм ризык ашатмадым, сезгә дә ирек бирмәм”,—дия иде әти. Аларның тәрбиясе, әтинең шул сүзләре гомер буена миңа чын сабак булды. Ә акчаны байлыкка санамыйм мин. Эш алып бару өчен инструмент кына ул. Сәламәтлегем бар, әти–әнием исән–сау, гаиләм тигез, балаларым тәрбияле—менә минем иң зур байлыгым,—ди Рамил Әхмәтгалиев.—Кеше башкаларга да кулдан килгәнчә ярдәм итәргә тиеш. Минем төп максатым да—кешелекле булып калу. Шунда гына Аллаһы Тәгалә сиңа йөз белән борыла. Уңышларымны мин шуннан күрәм. Аллаһы Тәгалә моңарчы ташламады, моннан соң да ташламасын иде.
Гөлсинә ЗӘКИЕВА