Бәяне халык бирә

Бәяне халык бирә
Район Советының социаль мәсьәләләр буенча даими комиссиясенең утырышы булды. Аны муниципаль район башлыгы урынбасары Любовь Осина алып барды. Утырышта 2013 елда башкарылган эшләр һәм 2014 елга планнар турында сөйләшенде.
Утырыш күңелле котлаудан башланып китте. Район архивы секторы мөдире булып эшләгән Сания Гатауллина тырыш һәм намуслы хезмәте өчен Федераль архив агентлыгының Мактау грамотасы белән бүләкләнде. Ул хәзер район башкарма комитетының инфраструктура үсеше бүлеге җитәкчесенең торакны исәпкә алу һәм бүлү буенча урынбасары. Сания Гатауллина районда адреслы программалар нигезендә субсидияләр, социаль ипотека буенча торак шартларын яхшырткан гаиләләр турында сөйләде.
— “2013 елга кадәр авылның социаль үсеше” дигән Федераль максатчан программа озынайтылды, — дигән күңелле хәбәр житкерде ул. — Федераль программа “2014–2017 елларга һәм 2020 елга кадәр авыл территориясен ныклап үстерү” дип атала.
Бу программа буенча 2006–2013 елларда 236 гаилә торак шартларын яхшырту өчен субсидия алган.
— Җыелышларда, очрашуларда халыкка дәүләт ярдәме, районда башкарылган эшләр турында сөйләгез, аңлатыгыз, белеп торсыннар, — дип киңәш итте Любовь Осина.
Район мәшгульлек үзәге житәкчесе вазыйфаларын башкаручы Роза Әхмәтҗанова халыкны эш белән тәэмин итү мәсьәләсе турында сөйләде. Мәшгульлек үзәгенә узган ел 3409 кеше мөрәҗәгать иткән. Шуның 1799ы эш сорап килгән. 773 кеше эш белән тәэмин ителгән. 2014 елның 1 гыйнварына районда 210 эшсез теркәлгән. Тагын бер кызыклы мәгълүмат: 63 инвалид эш булмасмы, дип килгән, шуның 43е эш белән тәэмин ителгән.
Район социаль яклау идарәсе җитәкчесе Илдус Әһлиевның чыгышы шулай ук мәгълүматларга бай иде. Дәүләтнең халыкка булган социаль ярдәме миллионнарча сумнарга җыела. Бүлек хезмәткәрләренең башкарган хезмәтләре зур.
—Халык өчен миһербанлы кирәкле эш башкарасыз, — дип билгеләп үтте аларның хезмәтен Любовь Осина. — Элек сезнең бүлек адресына халыктан шикаятьләр кергәли иде, соңгы елларда аларның ишетелгәне юк.
Опека һәм попечительлек буенча сектор мөдире Гүзәл Шакирҗанова ятим балаларны социаль яклау максатыннан үткәрелгән чаралар турында сөйләде. Җирлек башлыклары, бакча, мәктәп ярдәме белән имин булмаган гаиләләрне вакытында ачыкларга кирәклеге турында сүз булды. Бала хокукларын дәүләт яклый. Гаиләсендә тиешле тәрбия күрмичә азапланган балалар язмышына берәү дә битараф булырга тиеш түгел. Дәүләтнең өстенлекле программасы нигезендә фатир алу өчен районда 58 ятим бала чиратта тора. Узган ел шуның 2се фатирлы булган.
Яшьләр эшләре, спорт һәм туризм бүлеге җитәкчесе Зиннур Сәгыйтов чыгышыннан район халкының 32,65 проценты спорт белән шөгыльләнүе билгеле булды. Авыл районнары арасында “Сәламәтлек” спартакиадасы буенча безнең районның беренче урынны алуы күңелле хәл. Районда дәүләтнең өстенлекле программасы нигезендә 2006 елдан башлап 52 яшь гаилә торак шартларын яхшырткан.
ЗАГС җитәкчесе Люция Фатыйхова 2013 елда 26 бала күбрәк тууын әйтеп үтте. Барысы 678 бала туган. Үлүчеләр — 709.
Район мәдәният идарәсе җитәкчесе Илнур Котдусов:
— Хезмәт хакы артса да, кадрлар мәсьәләсе белән кыен, — дип сөйләде. — Мәдәният йортларына, клубларга 2 млн. сумлык җиһазлар алынды. 1 млн. сумлык сәхнә костюмнары тектерелде. Мәдәният учакларын компьютерлар белән тәэмин итәсе бар.
Мәгариф идарәсе җитәкчесе Рина Бәдриева:
— 2014 елда 260 урынлык балалар бакчасы төзү планлаштырыла, — дип сөендерде.
Район башкарма комитеты җитәкчесенең социаль мәсьәләләр буенча урынбасары Надия Мифтахетдинова:
— Халык җыеннары башланачак, безнең эшләгәнгә бәяне алар бирәчәк, — диде.
Румия НАДРШИНА