Эш аны, ул эшне дәрәҗәле итте

Эш аны, ул эшне дәрәҗәле итте
Аның күз алдыннан гел бер күренеш китми: “Төнлә әтинең йомшак кына башымнан сыйпавына уянып киттем. Каядыр җыенган сыман яшел кожан кигән. Әллә аның киеменнән төштеме, шулчак күземә чүп кергәне хәтердә калган”. 70 елдан артык элек булганны бүгенгедәй күз алдыңда саклап яши Сәрия апа. Баксаң, ул әтисенең сугышка чыгып киткән мизгеле булган икән... Әниләре 7 бала белән калганда ниләр кичергәндер?..
Сәрия Габделхакова — сугыш чоры баласы. Балачагын 41нең дәһшәтле еллары тартып алган. Сугыш чоры балаларының барысы кебек кечкенә Сәриягә дә басудан черек бәрәңге җыю, акбаш, кузгалаклар белән “тамак туйдыру”ны үз башыннан кичерергә туры килә. Әтиләре фронттан яраланып кайта. Сәрия апага тигез канатлы гаиләдә үсү насыйп булса да, ашарга җитмәү, юклык арттан калмый. Апаларының берсе юрган сыруга, икенчесе ашханәгә урнашкач, Сәриягә дә чират җитә: җидене бетерүгә кыз Иске Төрнәле фермасына эшкә килә. Әнә шуннан гомерен хезмәткә багышлый инде.
“И, балам, 40 ел сыер гына саудым мин. Эшләмәгән эш калмады...” Үткән гомере турында сораганда Сәрия апаның күзләрендә очкыннар кабынды, күңеле белән яшьлегенә әйләнеп кайтты сыман.
Элек барысы да кул хезмәтенә җайлашкан, бик күп көч сарыф итәргә кирәк, сыер савучылар инде иртәнге өчтә аякта була иде. Ләкин еллар узу белән авырлыклар да онытыла, Сәрия апа үзенә шөһрәт–дәрәҗә китергән эше, бергә эшләгән хезмәттәшләре турында бүген сагынып искә ала. “Хезмәттәшләремнең берсе арабызда юк инде... Ә башкалар белән очрашып телефон аша да аралашып торабыз”, — ди. Шөһрәт–дәрәҗә дигәннән, мактаулы хезмәте аны СССРның бишмеңчеләр клубы әгъзасы итә, Мактау грамоталары, Рәхмәт хатлары белән бүләкләнүгә этәргеч була.
Тормыш иптәше Расил абый белән дә шул хезмәт урыны таныштыра аларны. Гомерләрен авыл хуҗалыгы өлкәсенә багышлап яшәгән гаиләдә туган биш бала да әти–әниләре үрнәгендә эшләргә өйрәнеп, намуслы, тырыш хезмәт нәтиҗәсендә генә уңышларга ирешеп буганлыгын аңлап, белемгә омтылып үсә. Бүген Халисәләре Әлмәттә —хастаханәдә, Рәсимәләре Яр Чаллыда —китапханәдә, Васыйллары—Арча агросәнәгать көллиятендә, Гөлүсәләре —5нче гимназиядә, Камиләләре “Болгар” радиосында эшли. 9 оныклы, 3 оныкчыклы бай Сәрия апа улы Васыйл белән килене Флера тәрбия-сендә бәхетле ана булып гомер итә. Ана өчен балаларының уңышларыннан да олы шатлык бармы соң?! Тик Расил абый гына якты дөньяны вакытсыз калдырып китте...
Заманалар үзгәргән саен терлекчелек тармагына да үзгәрешләр керә. Сәрия апа лаеклы ялга чыкканда инде кул хезмәте автоматлаштыру белән алышынган, эшләр шактый җайлашкан була. “Үзебез гомер буе тездән саз ерып яшәгәнгә, авылның яшәешендә дә үзгәрешләр булыр дип өметләнгән идек, ләкин өметләр акланып бетмәде. Авыл эчендә юлларның булмавы бик борчый”, — дип зарларын белдерә героем. Булыр, замана гел алга атлый бит, авыл эчләренә юллар салыныр әле. Дога кылган саен Аллаһы Тәгаләдән елларның имин булуын, адәм баласына бары шатлык кына китерүен тели ул.
Розалия ЗИННӘТОВА