Энҗе —“Район килене–2014” бәйгесе җиңүчесе

Энҗе —“Район килене–2014” бәйгесе җиңүчесе
Узган елның ноябрендә киленнәр бәйгесе старт алган иде. Беренче этабы авыл мәдәният йортларында үтте. Җиңүчеләр зона ярышларында көчләрен сынап карады. Биш зонадан иң яхшы дип табылган биш киленне жюри район бәйгесенә сайлап алды.
Арча станциясендәге күп функцияле спорт үзәгендә “Район килене—2014” бәйгесенең финал ярышы булды. Биредә киленнәрне төрлечә сынадылар. Башта алар үзләре белән таныштырды, интеллектуаль сорауларга җаваплар бирде, аннан инде төрле ярышларда үз осталыкларын күрсәтте. Гаиләдә төрле хәлләр килеп туа. Җайлы гына итеп, берәүгә дә авырлык китермичә алардан ничек чыгарга? Киленнәр үз тормыш тәҗрибәләреннән чыгып, иң уңай юлларны чагылдырырга тырышты. “Уены–чыны бергә” дигән бәйгедә дә тормышта очраган кызыклы мизгелләргә тукталдылар. Бу юлы инде алар үзләренең актерлык осталыкларын да күрсәтте. Киленнәр “күчтәнәчләр” дә әзерләп килгәннәр иде. Әмма күчтәнәч дигән сүз тәм–томнар пешереп алып килүне генә аңлатмый. Биредә һәр килен нинди кул эшенә осталыгын исбатлады. Аш–суга кулы ятканы ризыклар пешергән, икенчеләре мендәр тышлары чиккән, бәйләгән әйберләрен алып килгән. Хәтта кул белән ясалган чәчәк вазасына кадәр бар иде. “Гаилә белән җырлыйбыз” дигән бәйгедә катнашу өчен киленнәр якыннарын да чакырган. Җырлар бәйгенең үзен дә тулыландырып, ямьләндереп җибәрде.
Әлеге спорт үзәген соңгы вакытта тамашачы аеруча үз итте. Һәр чарага халык яратып йөри, чыгышларны җылы каршы ала. Киленнәр бәйгесендә дә тамашачы–җанатарлар күп иде.
Ярышлар тәмамланды, чират бәйгенең иң күңелле мизгеленә—бүләкләү өлешенә күчте. Башта зона ярышларында катнашкан һәр киленне истәлекле бүләкләр белән билгеләп үттеләр. Финал ярышында көч сынашучыларның осталыклары номинацияләр буенча бәяләнде. “Иҗади килен” номинациясендә Шурабаштан Олеся Антипова җиңү яулады, Иске Төрнәледән Резеда Абдуллина “Сөйкемле килен” булып танылды, Иске Ашыттан Фәния Хәйруллина “Уңган килен” булып чыкты, Айваннан Светлана Хаҗиевага “Хуҗабикә килен” номинациясе җиңүчесе дигән исем бирелде. Гөберчәктән Энҗе Сәйфетдинова “Район килене—2014” бәйгесе җиңүчесе булды. Киленнәрнең һәрберсенә дипломнар һәм кыйммәт-ле бүләкләр тапшырылды.
Гөлсинә ЗӘКИЕВА