Тормышка әзерлекле булсыннар

Тормышка әзерлекле булсыннар
“Казан арты” тарих–этнография музеенда үткән җыелышта районның мәгариф хезмәткәрләре 2013 уку елына йомгак ясады, 2014 елга бурычлар турында сүз алып барды.
Район мәгариф идарәсе җитәкчесе Рина Бәдриева узган уку елында башкарган эшләрне, ирешкән уңышларны тагын бер кат искә төшерде. Районда мәгариф өлкәсендә ел дәвамында күп эшләр алып барылды. Мәктәпләр яңартыла, балалар бакчаларына зур игътибар бирелә, уку–укыту процессы уңай үзгәрешләр кичерә, яңа ысуллар кулланыла.
—Арча педагогика көллияте яңарыш кичерде. Быел анда зур күләмдә төзекләндерү эшләре башкарылды. Аның милли кадрлар әзерләү үзәге булуы да зур әһәмияткә ия,—диде үзенең чыгышында Рина Бәдриева. Ул мәгарифне үстерүгә керткән өлеше өчен район башлыгы Алмас Назировка истәлекле бүләк тапшырды.
Пөшәңгәр һәм Сеҗе мәктәпләре җитәкчеләре Раушан Котдусов белән Марс Абдуллин хезмәт тәрбиясенә зур урын бирүләре, бу өлкәдә ирешкән уңышлары турында сөйләделәр, Арчаның беренче мәктәбе директоры Эльмира Сафина Сингапур программасы буенча укытуда ирешкән уңышлар турында әйтеп үтте, беренче балалар бакчасы мөдире Энҗе Абдуллина мәктәпкәчә яшьтәге балаларны тәрбия-ләүдә инновацион технологияләр кулланып эшләүләре хакында сөйләде.
—Районда гына түгел, республикада да мәгарифкә игътибар зур. Төрле грантлар булдырыла, хезмәт хаклары арта, — диде муниципаль район башлыгы Алмас Назиров. — Бездә 2013 елда мәгариф хезмәткәрләренең уртача хезмәт хакы 16 мең сум булды. Алар балаларга тиешенчә белем биреп кенә калмыйча, әхлакый нигезләр, тирә–яктагыларга карата ихтирам, патриотик, гражданлык хисе һәм үзара тату яшәү культурасын да тәрбияләргә тиеш. Хәзер инде белемгә, мәгълүматка ия булу гына җитми, яшьләрне җитез, тормышка әзерлекле, проблемаларны мөстәкыйль хәл итәрлек, җаваплылык тоя торган итеп тә тәрбияләргә кирәк. Балалар бакчалары да игътибардан читтә калмый. Шәһәрнең көньяк өлешендә 260 урынга исәпләнгән балалар бакчасы төзү планлаштырыла. Гаилә балалар бакчалары оештыру буенча да эшне дәвам итәргә кирәк. Бердәм дәүләт имтиханнарына әзерлек буенча да җаваплылыкны арттыру таләп ителә. Монда артта калучылар булмаска тиеш. Кимчелекләрне дә бетерү өстендә эш алып барырга кирәк. Хезмәтегез өчен зур рәхмәт. 2014 елда тагын да зуррак уңышларга ирешүегезне телим.
—Район житәкчелеге талантлы балаларны да читтә калдырмый. 2013 елда 21 укучы республика һәм Бөтенроссия олимпиа-далары, спорт ярышлары җиңүчеләре, “Авылның 100 талантлы баласы” республика акциясе стипендиатлары, 29 укучы районның Габдулла Тукай һәм Гариф Ахунов премияләре ияләре булды. Талантлы балалар Анапага юлламалар белән бүләкләнә, “Арча йолдызлары” аллеясы яңадан–яңа йолдызлар белән тулылана, ә иң талантлы 30 балага елга ике тапкыр Арча районы башлыгы стипендиясе бирелә,—диде Арча Укучылар сараеның балалар җәмәгать оешмасы белән эшләү буенча җитәкче урынбасары Лия Ильина.
Алмас Назиров беренче мәктәптән Әмир Ильясовка, Диләрә Гафуровага, икенче мәктәп укучылары Айнур Зиннуров, Алинә Галиуллина, Йолдыз Мингалимовага, бишенче гимназиядән Расил Даутовка, Ашытбаштан Илшат Гыйлаҗев, Нәркизә Кавиевага, Лесхоздан Марат Зәйнуллин, Дамир Шиһабиевка, Наласа мәктәбеннән Фаяз Зариповка, Яңа Кырлайдан Ләйсән Галим-җановага, Иске Чүриледән Ләйлә Вәлиевага район башлыгы стипендияләрен тапшырды.
—Без Арча районында яшәвебез белән горурланабыз. Сезнең ышанычыгызны акларбыз, — дип рәхмәтләрен белдерде соңыннан стипендия ияләре.
Гөлсинә ЗӘКИЕВА