Чаңгычылар старт алды

Чаңгычылар старт алды
Кышкы спорт төрләрен яратучылар өчен салкыннар да куркыныч түгел. Температура 25 градустан да түбән булуга карамастан, чаңгычылар Арча стадионына ярышка җыелды. Бу көнне биредә Фәнил Гарәфиев истәлегенә багышлап чаңгыда узышлар үткәрелде.
Фәнил Гарәфиев үзе исән вакытта ук һәр ел гыйнвар ахырында чаңгы ярышлары оештыруны матур традициягә әверелдергән иде. Хәзер аны хатыны, “Металл” ширкәте җитәкчесе Лилия Гарәфиева дәвам итә.
—Фәнил бик оста чаңгычы иде. Бу спорт төрен районда да җәелдерүне үзенә максат итеп куйды. Шуңа бу башлангычны дәвам итәргә булдым. Менә өченче ел инде аның истәлегенә ярышлар үткәрелеп килә. Быел да чаңгычылар Фәнилне ихтирам итеп чаңгы юлына баса, без җиңүчеләргә һәм катнашучыларга медальләр, кубоклар, махсус призлар әзерләдек,—ди Лилия Гарәфиева.
Фәнил Гарәфиев истәлегенә багышланган чаңгы ярышларын ачу тантанасында район башлыгы урынбасары Любовь Осина һәм район башкарма комитеты җитәкчесе урынбасары Надия Мифтахетдинова да катнашты.
—Фәнил Гарәфиев үзенең матур һәм изге эшләре белән танылып калды. Балаларга да, яшьләргә дә, өлкәннәргә дә һәрьяклап ярдәм итәргә тырышты. Аның тырышлыгы белән төрле чаралар оештырылды. Бүгенге чаңгы ярышлары шуларның берсе. Фәнил Гарәфиев кебек тырыш, кешелекле һәм изге күңелле булыгыз,—диде Любовь Осина чаңгычыларга мөрәҗәгать итеп һәм аларга уңышлар теләде.
Бу чаңгы ярышларында мәктәп укучылары гына түгел, әлеге спорт төрен үз иткән һәркем катнаша. Яңа Кенәрдән Гыйниятулла Гатауллин аны бер ел да калдырмый. 81 яшендә булуына карамастан, ул быел да чаңгы юлына басты.
—Фәнилгә карата ихтирам йөзеннән килдем. Чын чаңгычы мондый чараны калдыра алмый,—ди ул.
Гыйниятулла Гатауллин отставкадагы хәрби, 1954 елдан бирле чаңгы узышларында катнашкан, спорт мастеры исемен горур йөртә. Узган ел ул Универсиада утын да алып барды.
“Арча нефть продуктлары” акционерлык җәмгыятендә эшләүче Нияз Әхмәдуллин да, 50 яшькә якынлашуына карамастан, мондый ярышларны калдырмый.
—Мәктәптә укыганда ук чаңгы, хоккей белән шөгыльләнә башладым. Шуннан бирле бернинди мөмкинлекне дә кулдан ычкындырмаска тырышам. Минем өчен җиңү түгел, күңелне тынычландыру мөһим,— ди ул.
Ярышлар берничә төркемгә бүленеп үтте. 22 мәктәп һәм Арча педагогика көллиятеннән 136 кеше катнашты. Урта Курсадан Фәнүзә Сәлахова, икенче мәктәптән Ринат Зыятдинов, Түбән Мәтәскәдән Лилия Рәхмәтуллина, беренче мәктәптән Илназ Ибәтуллин, Курса–Почмактан Ландыш Гыйлаҗиева, Арча педагогика көллиятеннән Александр Борисов, Руслан Исмәгыйлев, Дилә Кәлимуллина үз төркемнәрендә беренче урыннарны яуладылар. Командалар арасында Иске Кырлай, Лесхоз мәктәпләре, Арча педагогика көллияте беренче булды.
Соңыннан җиңүчеләргә медальләр, бүләкләр, җиңүче командаларга кубоклар тапшырылды. Өченче мәктәптән 2нче сыйныф укучысы Данил Сөләйманов —иң яшь, Яңа Кенәрдән Гыйниятулла Гатауллин иң өлкән чаңгычы буларак билгеләп үтелде.
Гөлсинә ЗӘКИЕВА