Ярый әле, сез бар

Ярый әле, сез бар
“Ак Барс–агро” (хәзер “Ак барс” агрокомплексы”) ширкәте төзелүгә быел ун ел тула икән. Әле кайчан гына муниципаль район башлыгы Алмас Назиров колхозчылар җыелышында районга инвесторлар киләчәге, бу зонадагы өч хуҗалыкны “Ак барс” холдинг компаниясе алырга теләк белдерүе турында сөйләгән иде. Вакыт бик тиз уза, әмма ул бик яхшы хөкемдар.
Шактый булды алар, инвесторлар. Бүген инде кайсы бар, кайсы юк. Шуларның иң игелеклесе “Ак барс” холдинг компаниясе булды. 3 февральдә Сикертәндә былтыр ачылган күп функцияле үзәктә узган җыелышта муниципаль район башлыгы Алмас Назиров холдинг компаниясе җитәкчесе Иван Егоров адресына бик җылы сүзләр әйтте.
— Бернинди проблемасыз эшлисез, бу минеке, бу синеке дип карау юк, — диде ул. — Бердәм булганда гына шундый уңышларга ирешеп була, хезмәтегез өчен зур рәхмәт!
Ширкәт директоры Шәйдулла Сәлахов үзенең чыгышында үткән елларны да искә алды.
— Бик авыр чорлар булды, — диде ул. — Колхозлар соңгы елларында хезмәт хакын да вакытында бирә алмый башлаган иде, эш шартлары да уңай булмады. Әти–әниләр шуларны күреп балаларын авылдан этәрә башлады. Әмма соңгы ун елда бар да үзгәрде, хезмәт хаклары елдан–ел арта, бүгенге уңайлыклар турында өлкән буын кешеләре хыяллана да алмый иде.
— Миңа төрле районнарда булырга туры килә, — диде үзенең чыгышында холдинг компаниясе департаментының механикалаштыру бүлеге җитәкчесе урынбасары Эдуард Хөсәенов. — Шуңа күрә чагыштыру мөмкинлеге бар. Безнең 19 агрофирма арасында “Ак барс” агрокомплексы” ширкәте иң алдынгы урынны тота. Игенчелек, орлыкчылык, терлекчелек, нәсел эше белән ныклап шөгыльләнәсез, бөтен яктан акча эшлисез, бүгенге шартларда бу бик әйбәт.
Чыннан да, бүгенге көндә 12 чәчү әйләнеше белән эшләүче тагын нинди хуҗалык бар? Баш агроном Рөстәм Мөхәммәдиев узган елгы шартларда да ничек итеп иген-нәрнең гектарыннан уртача 42 центнер уңыш алып булганлыгын бик аңлаешлы итеп сөйләде (белгечләр, гомумән, бик әзерлекле чыгышлар ясады, моны район башлыгы да билгеләп үтте).
Баш белгечнең төп фикере — җирне алдап булмый. Минераль ашлама кертү әйбәт, әмма ул туфракның ачылыгын арттыра. Ширкәтнең басулары соры урман һәм көлсу туфрактан тора. Анда нәрсә җитми, нәрсә артык — шуны белмәсәң, уңыш турында нинди сүз алып барырга мөмкин?
— Узган ел 700 гектардан артык җир известьладык, — ди баш белгеч. — Бездә хәзер ачы туфраклы басулар юк.
Ширкәт басуларында 10 төрле бөртекле культураның 19 сорты игелә. Орлыкчылык иң югары дәрәҗәгә куелган. Үсемлекләрне саклауның кешегә һәм табигатькә зыян китерми торган биологик ысулларына күчә баралар.
Терлекчелектә дә шулай. Хәзерге вакытта ширкәт көн саен 30 тонна сөт сата. Бер литрының бәясе 24 сум. 93 проценты — югары сортлы.
Нәсел эше белән ныклап шөгыльләнәләр. Ясалма орлыкландыру технигы Зөлфия Миннеханованың узган ел республика ярышында беренче урынны яулап, Россия күләмендә дә сынатмавы күп нәрсә турында сөйли.
Сеҗе авыл җирлеге башлыгы Гөлфия Гыйбадуллина узган елгы эшләргә хисап тотты. Салымнар планнары үтәлгән, мәктәпләр, мәдәният учаклары, медпунктлар, мәчетләр, тормыш өчен кирәкле төрле хезмәтләр нормаль эшли. Биредә ширкәт, авыл җирлеге, мәктәп җитәкчеләре уртак тел таба белә, кирәк вакытта бәрәңгесен, чөгендерен дә алалар, амбарда да эшлиләр, терлек азыгы әзерлиләр. Ширкәт җитәкчелеге дә бер өлкәне дә ярдәменнән ташламый.
Хезмәтенә күрә хөрмәте дә бар. Кунаклар да буш кул белән килмәгән. Ширкәт җитәкчесе Шәйдулла Сәлахов алдынгыларга акча салынган конвертлар өләште, “Ярый әле, сез бар!” — дип һәркайсына җылы сүзләр әйтте.
Шундый матур җыелышка өлкән сыйныф укучыларының да чакырылуы тирән мәгънәгә ия. Алар өчен онытылмаслык дәрес булды бу.
Ильяс ФӘТТАХОВ