Хәзер газ өчен дә онлайн–банк аша түләп була

Хәзер газ өчен дә онлайн–банк аша түләп була
Коммуналь хезмәтләр, штрафлар, балалар бакчалары өчен түләүнең төрле ысуллары турында без һәрдаим язып торабыз. Күпләр моңа ияләнеп бетте һәм түләүләрне Интернет аша башкаруның бар яктан да отышлы булуына инанды. Вакыт та, акча да янга кала.
Тик май аеннан башлап республиканың дәүләт хезмәтләре порталында да, онлайн–банкның шәхси кабинетында да, ни өчендер, газга түләп булмый башлады. Бүген, ниһаять, штрих–код кертү белән бәйле җитешсезлекләр бетерелде дип әйтә алабыз.
Дәүләт хезмәтләре порталы аша түләүләрнең тәртибен кабатлап аңлатабыз.
Теләсә кайсы Интернет–браузерның эзләү юлында “ТР дәүләт хезмәтләре” (“Госуслуги РТ”) дигән сүзне кертәбез һәм эзләргә дигән сылтамага басабыз. Тәкъдим ителгән исемлектән “Татарстан Республикасының дәүләт һәм муниципаль хезмәтләре порталы http://uslugi.tatar.ru” (“Портал государственных и муниципальных услуг Республики Татарстан http://uslugi.tatar.ru”)ны эзлибез. Кагыйдә буларак, Ул исемлектә беренче булып тора. Шулай итеп, дәүләт хезмәтләре порталына килеп чыгабыз.
Хәзер сайтта теркәлергә кирәк. Моның өчен нәрсә эшләргә? “Теркәлегез. Кәрәзле телефон номерыгызны кертегез” (“Зарегистрируйтесь. Введите номер мобильного телефона”) дигән юлга номерны язасыз (беренче “8”дән башка) һәм “Куллану кагыйдәләре белән риза” (“С правилами пользования согласна”), аннан соң “СМС белән пароль алырга” (“Получить пароль по СМС”) сылтамасына басабыз. Берничә минут эчендә телефоныгызга пароль (9–10 урынлы сан) белән мәгълүмат килә, бу санны “Парольне кертегез” (“Введите пароль”, ул телефон номеры астында чыгачак) юлына кертәбез. Аннан соң —“Керергә” (“Войти”). Шулай итеп, шәхси кабинет дигән бит чыга.
Шәхси кабинетны көйләү өчен биш адым ясарга киңәш ителә: автомобиль, салымнар, торак–коммуналь хез-мәтләр, балалар һәм башка мәгълүмат. Әгәр коммуналь хезмәтләр өчен булган бурычыгыздан, штрафлардан һәрдаим хәбәрдар буласыгыз, табибка җайлы һәм тиз языласыгыз килсә, аларны тутыра аласыз. Бу бары бер тапкыр эшләнә, тик башка вакытта шәхси кабинетка кергәндә бу мәгълүмат инде экранда күренеп торачак. Ә юл йөрү кагыйдәләрен бозган өчен штрафларыгыз булса, андый мәгълүмат телефоныгызга да СМС–хәбәр рәвешендә килеп барачак. Әгәр дә вакытыгыз тыгыз булса, бу мәгълүматны башка вакытта да тутыра аласыз.
Бүген без газ өчен түләргә өйрәнәбез. Моның өчен порталда күрсәтелүче хезмәтләр исемлегенә керергә һәм “Халык өчен электрон хезмәтләр” (“Услуги в электронном виде для жителей”) сылтамасын табып, “Торак-коммуналь хезмәтләр”гә (“ЖКХ”) басабыз, “Коммуналь хезмәтләр өчен түләү” бите ачылачак, “Газ өчен түләү” (“Оплатить за газ”) сылтамасына басабыз. Килеп чыккан биттә газ белән тәэмин итү яки техник хезмәт күрсәтү өчен килгән квитанциянең штрих–кодын (28 урынлы сан) кертәбез. “Дәвам итәргә” (“Продолжить”) сылтамасына басабыз. Икенче тәрәзәчектә сумма, исәпләү приборы күрсәткечен һәм күрсәткеч алган көнне кертәбез. “Дәвам итәргә”, “Түләүче турында мәгълүмат” (“Информация о плательщике”) дигән тәрәзәчек чыга, анда түләүченең фамилиясен, исемен, әтисенең исемен, адресын язарга кирәк. “Дәвам итәргә”. Түләүне расларга һәм банк (хезмәт хакы, пенсия...) картасы буенча иясенең исемен, 16 урынлы номерын, картаның гамәлдән чыгу вакытын, өчсанлы код (картаның икенче ягында) кертергә. “Дәвам итәргә”. Шуннан соң түләүнең уңышлы башкарылуы турында мәгълүмат чыгачак. Башкарган түләүләр турындагы мәгълүматыгыз “Операцияләр тарихы”нда (“История операции”) сакланып бара һәм сез үзегезгә уңай вакытта аларны бастырып ала аласыз.
Гөлназ
ГЫЙНИАТУЛЛИНА